Հավաքների ազատությունը սահմանափակելը ամենևին էլ անցյալում չէ․ Նիկոլ Փաշինյանը մանիպուլացնում է

Այսօր՝ հուլիսի 1-ին անցկացվող Ժողովրդավարության հայկական երրորդ ֆորումի ընթացքում ունեցած իր ելույթում ՀՀ վարչապետ Նիկոլ Փաշինյանը խոսել է ՀՀ-ում ժողովրդավարության իրավիճակի մասին։

Անդրադառնալով երկրում հավաքների ազատությանը՝ նա, մասնավորապես, ասել է. 

«Յոթ-ութ տարի առաջ քննարկում էինք հավաքների ազատության կամ որոշակի տեղերի հասանելիության սահմանափակումները քաղաքական ուժերի կամ քաղաքացիական հասարակության համար։ Հիմա Հայաստանում մոռացել են, բայց ներկաներից շատերն են հիշում, որ տեղեր կային, ընդհուպ բացօթյա, որտեղ հանրահավաքներ անելը էդքան էլ  հեշտ չէր, եթե չասենք անհնարին։ Էլ չեմ ասում հյուրանոցային դահլիճներում քաղաքական միջոցառումներ անցկացնելու համար»:

«Փաստերի ստուգման հարթակը» ներկայացնում է այն դեպքերը, երբ ՀՀ գործող իշխանության օրոք արգելվել կամ սահմանափակվել են քաղաքական ուժերի կամ քաղհասարակության ներկայացուցիչների հանրային վայրում հավաքների անցկացման իրավունքները, հետևաբար նման դեպքերը ամենևին էլ չեն մոռացվել։

Սուրեն Սահակյանի ակցիան Մաշտոցի պուրակում

2023 թվականի օգոստոսի 17-ին Երևանի Մաշտոցի պուրակում վրան տեղադրելու փորձի ժամանակ ձերբակալվել էին «Քաղաքացու որոշում» կուսակցության գործադիր խորհրդի նախկին անդամ, հասարակական գործիչ Սուրեն Սահակյանը ու ևս երկու քաղաքացի։ Նրանք տեղափոխվել էին ոստիկանական բաժանմունք։ Նրանց թույլ չէր տրվել վրան տեղադրել և իրենց բողոքի խաղաղ ակցիան իրականացնել Պուրակում։

«Ազատության» հետ զրույցում Սուրեն Սահակյանը ոստիկանների գործողություններն անօրինական էր որակել։ Նա նշել էր, որ իրենց գործողություններով իրենք ոչ մի օրենք չէին խախտում և վրան տեղադրելով փորձ էր արվում ստեղծել հարթակ՝ քաղաքացիների հետ երկրի մարտահրավերների վերաբերյալ քննարկումներ անցկացնելու համար։

Գործող իշխանության վարած քաղաքականության դեմ բողոքն արտահայտելու համար վրան չէին թույլ տվել տեղադրել նաև Արթուր Վանեցյանին։

2022 թ․ ապրիլին «Պատիվ ունեմ» խմբակցության ղեկավար Արթուր Վանեցյանի առաջնորդած շարժումը նստացույց էր իրականացնում Ազատության հրապարակում։ Ապրիլի 18-ին Վանեցյանը լրատվամիջոցների հետ զրույցում հայտնել էր, որ ոստիկանները շարժման մասնակիցներին չեն թույլատրում տաքացուցիչներ բերել կամ վրան տեղադրել։ Խոսելով արգելքի մասին՝ նա նշել էր, որ ըստ ամենայնի՝ պատճառը շարժման ընթացքը կասեցնելն է։ 

Այսպիսով, Նիկոլ Փաշինյանի այն պնդումը, որ հավաքների ազատությունը սահմանափակելը մոռացված պրակտիկա է և բնորոշ էր միայն նախկին իշխանություններին, չի համապատասխանում իրականությանը։ 

ժողովրդավարության հայկական երրորդ ֆորումը, ի դեպ, կազմակերպել են «Իրազեկ քաղաքացիների միավորում» ՀԿ-ն և Freedom House միջազգային իրավապաշտպան կազմակերպությունը։

Արփինե Հովհաննիսյան