FIP.am-ի հրապարակման հետքերով դատավոր Արթուր Ստեփանյանի լիազորությունները դադարեցվեցին

Բարձրագույն դատական խորհուրդը (ԲԴԽ) հուլիսի 9-ին հրապարակել է որոշում, որի համաձայն, Երևանի առաջին ատյանի ընդհանուր իրավասության քաղաքացիական դատարանի դատավոր Արթուր Ստեփանյանին կարգապահական պատասխանատվության ենթարկելու վերաբերյալ միջնորդությունը բավարարվում է և դադարեցվում են դատավորի լիազորությունները՝ էական կարգապահական խախտման հիմքով։ Միջնորդությունը ԲԴԽ ներկայացրել էր ՀՀ արդարադատության նախարար Գրիգոր Մինասյանը՝ հիմնվելով «Փաստերի ստուգման հարթակի» (FIP.am) հրապարակման վրա։

Որոշումն ուժի մեջ է մտնում հրապարակման պահից և վերջնական է։ 

Նկատենք՝ ԲԴԽ անդամներ Արթուր Աթաբեկյանը, Էդգար Հովհաննիսյանը և Մերի Համբարձումյանը հայտնել են հատուկ կարծիք՝ համաձայն չլինելով տույժի տեսակին, և կողմ են քվեարկել խիստ նկատողության օգտին։

«Որպես պարզաբանում՝ հարկ ենք համարում նշել, որ միջնորդության ներկայացման համար հիմք է հանդիսացել այն, որ դատավորը բազմաթիվ դատական գործերով մի քանի տասնյակ վճիռները Դատական իշխանության պաշտոնական կայքում հրապարակել և վճռի օրինակը դատավարության կողմերին տրամադրել է օրենքով սահմանված ժամկետների կոպիտ խախտմամբ։

Հաշվի առնելով դատավորի կատարած իրավախախտման բազմակի բնույթը՝ խորհուրդը հանգել է դատավորի լիազորությունների դադարման որոշմանը»,- նշված է ԲԴԽ որոշման եզրափակիչ հատվածում:

«Փաստերի ստուգման հարթակը» պարզել էր, որ դատավոր Ստեփանյանն իր գործունեության ընթացքում օրենքով սահմանված ժամկետներից ուշացումով գործերի քննության, դատական ակտերի հրապարակման ավելի քան 100 դեպք է ունեցել։ Այսպես, դատավորն ունեցել է ընդհանուր 29 գործ, որոնց դատական ակտերը՝ հակառակ օրենքով սահմանված ժամկետների, երկար ժամանակ չեն հրապարակվել «Դատալեքս» տեղեկատվական կայքում. այդ ակտերից որոշները չեն հրապարակվել մեկ տարուց ընդհուպ մինչև երեք տարի ժամկետների խախտմամբ։ 

ԲԴԽ-ում ԱՆ միջնորդության քննության ժամանակ, օրինակ, պարզվել էր, որ դատավոր Արթուր Ստեփանյանի վարույթում «Ինգո Արմենիա» ապահովագրական ընկերության կողմից ներկայացված 100 հզ դրամ գումարի բռնագանձման պահանջի վերաբերյալ դատական ակտը տրամադրվել է 3 տարի ու 5 ամիս անց այն ստանալուց հետո։

Արթուր Ստեփանյանն իր վերաբերյալ միջնորդության քննարկման ժամանակ դիրքորոշում հայտնելիս նշում էր, որ դատարաններն ու դատավորները գերծանրաբեռնված են աշխատում։

Ի դեպ, Արթուր Ստեփանյանի վերաբերյալ ԲԴԽ-ում միջնորդության քննությունն առաջին անգամը չէր․ 2022-ին ևս դատավորը պատասխանում էր ԲԴԽ անդամների հարցերին։ Բարձրագույն դատական խորհուրդն այն ժամանակ որոշել էր բավարարել Արդադարատության նախարարության միջնորդությունը Երևան քաղաքի առաջին ատյանի ընդհանուր իրավասության դատարանի դատավոր Արթուր Ստեփանյանին կարգապահական պատասխանատվության ենթարկելու մասին և նկատողություն հայտարարել:

Հասմիկ Համբարձումյան