Հակակոռուպցիոն կոմիտեի նախագահի կանխիկ ու անկանխիկ միջոցները նվազել են

«Փաստերի ստուգման հարթակը» շարունակում է ներկայացնել Հայաստանի օրենսդիր, գործադիր և դատական իշխանությունների ներկայացուցիչների հայտարարագրերը և նրանց եկամուտների մասին տվյալները:

Այս անգամ դիտարկել ենք ՀՀ հակակոռուպցիոն կոմիտեի նախագահ Սասուն Խաչատրյանի ու նրա կնոջ՝ Լիլիթ Խաչատրյանի՝ Կոռուպցիայի կանխարգելման հանձնաժողով ներկայացած 2022 և 2023 թվականների գույքի ու եկամուտների հայտարարագրերը։

Ըստ 2022 և 2023 թվականների հայտարարագրերի, միանձնյա սեփականության իրավունքով Սասուն Խաչատրյանին է պատկանում բնակարան և հողամաս, համատեղ սեփականության իրավունքով՝ բազմաբնակարան շենքի ոչ բնակելի տարածք, 2022 թվականին՝ համատեղ, ապա 2023 թվականին բաժնային սեփականության իրավունքով՝ բնակարան։ Հայտարարագրված բոլոր անշարժ գույքերը գտնվում են Երևանի Քանաքեռ-Զեյթուն վարչական շրջանում։

Հակակոռուպցիոն կոմիտեի նախագահը 2023 թվականի մայիսին 8 մլն դրամով ձեռք է բերել 2012 թվականի արտադրության PORSCHE մակնիշի ավտոմեքենա։ 

2022 թվականի հայտարարագրում տարեկան եկամուտներ բաժնում Խաչատրյանը, որպես եկամտի տեսակ, ներկայացրել է հակակոռուպցիոն կոմիտեից ստացած աշխատավարձը՝  30 մլն 080,390 դրամ, իսկ ահա հաջորդ տարի նրա տարեկան եկամտի չափը հակակոռուպցիոն կոմիտեից նվազել է․ ըստ 2023-ի հայտարարագրի՝ հակակոռուպցիոն կոմիտեից ստացած աշխատավարձը 28 մլն 459,217 դրամ է կազմել։ Բացի այդ, հայտարարագրել է ՀՀ պետական եկամուտների կոմիտեից ստացած եկամուտներ՝ 881 հազար 347 դրամ։ 

Այսպիսով, Հակակոռուպցիոն կոմիտեի նախագահի տարեկան ընդհանուր եկամուտը 2023-ին կազմել է 29 մլն 340,564 դրամ։

2022-ի տարեվերջի դրությամբ Խաչատրյանի բանկային հաշիվներին եղել է 6 մլն 115,071 դրամ, իսկ 2023-ի տարեվերջի դրությամբ՝ 176 եվրո և 2 մլն 152,286 դրամ։

Սասուն Խաչատրյանի կանխիկ գումարը 2022 թվականին կազմել է 32 մլն 600 հազար դրամ, իսկ 2023 թվականին՝  20 մլն 100 հազար դրամ։

Սասուն Խաչատրյանը հայտարարագրել է նաև հանձնված և վերադարձված փոխառություններ․ 2022 թվականի տարեվերջին՝ 13 մլն 265,263 դրամ և 7 մլն 111,500 դրամ, իսկ 2023-ի տարեվերջին՝ 28 մլն 111,500 դրամ։

Խաչատրյանի հիփոթեքային վարկի մայր գումարի մնացորդը 2022 թվականի տարեվերջին կազմել է 14 մլն 028,735 դրամ, իսկ 2023 թվականի տարեվերջին՝ 11 մլն 128,869 դրամ, վարկի մարմանն ուղղել է 3․7 մլն դրամ։

2023 թվականին Սասուն Խաչատրյանը հանգստի համար ծախսել է 4․6 մլն դրամ։

Սասուն Խաչատրյանի կինը՝ Լիլիթ Խաչատրյանը, 2022 թվականին հայտարարագրել է բաժնային սեփականության իրավունքով բնակարան՝ Երևանի Էրեբունի վարչական շրջանում։ Ֆինանսական միջոցներ պաշտոնյայի կինը չի հայտարարագրել։ Իսկ կնոջ ներկայացրած 2023 թվականի հայտարարագիրը դատարկ է, ՀԿԿ նախագահի կինը, ամենայն հավանականությամբ, ունեցվածք չունի: 

Այսպիսով, ընդհանուր առմամբ, Հակակոռուպցիոն կոմիտեի նախագահի եկամուտները և կանխիկ գումարները 2022 թվականի համեմատ 2023-ին նվազել են։

Սյուզաննա Համբարձումյան