Արդյոք վերացվել է Վարդան Ղուկասյանի (Դոգ) միջազգային հետախուզումը. Ներքին գործերի նախարարությունը թաքցնում է տեղեկությունը

Հայաստանի Ներքին գործերի նախարարությունը գաղտնի է պահում տեղեկությունը՝ արդյոք «Դոգ» մականունով հայտնի Վարդան Ղուկասյանի նկատմամբ նախորդ տարի ամռանը հայտարարված միջազգային հետախուզումը վերացվել է։ 

Հուլիսի 15-ին փաստաբան Լևոն Բաղդասարյանի ղեկավարած գրասենյակը հայտարարել էր, որ «Ինտերպոլից» ստացված տեղեկության համաձայն, Վարդան Ղուկասյանի նկատմամբ միջազգային հետախուզումը վերացվել է։

«Փաստերի ստուգման հարթակը» հուլիսի 17-ին գրավոր հարցմամբ դիմել էր Ներքին գործերի նախարարություն՝ հստակեցնելու, թե արդյո՞ք ճիշտ է տեղեկությունը, որ Ղուկասյանի նկատմամբ վերացվել է միջազգային քրեական հետախուզումը, և եթե վերացվել է, ապա ի՞նչ հիմքով։

Սակայն ՆԳՆ-ից նախընտրել են լռել՝ թաքնվելով «Անձնական տվյալների պաշտպանության մասին» օրենքի հետևում։ Մասնավորապես, վկայակոչելով նույն օրենքի 15-րդ հոդվածի 5-րդ կետը, տեղեկացնում են, որ «տվյալների սուբյեկտին անձնական տվյալները տրամադրվում են տվյալների սուբյեկտի կամ լիազորագրով հանդես եկող ներկայացուցչի կամ օրինական ներկայացուցչի գրավոր հարցման հիման վրա»։ 

Այնուհետև, վկայակոչելով «Տեղեկատվության ազատության մասին» օրենքի 8-րդ հոդվածի 1-ին մասի 2-րդ կետը, նշել են․ «․․․տեղեկատվության տրամադրումը մերժվում է, եթե դա խախտում է մարդու անձնական և ընտանեկան կյանքի գաղտնիությունը»։

«Ձեր կողմից հայցվող տեղեկությունները պարունակում են Վարդան Ղուկասյանի անձնական կյանքի վերաբերյալ տվյալներ, որոնք առանց այդ անձանց գրավոր համաձայնության տրամադրման ենթակա չեն»,- նշվում է ՆԳՆ նամակում։

Վարդան Ղուկասյանը, որն ապրում է ԱՄՆ-ում ու հայտնի է իր հայհոյախառն եթերներով, հետախուզվում էր անցած տարի մայիսից և այդ մասին հայտարարվել էր պաշտոնապես։ Մասնավորապես, Քննչական կոմիտեն հաղորդագրություն էր տարածել, որում բառացի նշվում էր հետևյալը․ «Ոստիկանությունը միջոց է ձեռնարկել «Ինտերպոլի» միջոցով Վ․ Ղուկասյանի նկատմամբ միջազգային հետախուզում իրականացնելու նպատակով։ Միաժամանակ, քրեական վարույթի շրջանակներում ձեռք են բերվել տվյալներ առ այն, որ Վ․ Ղուկասյանը գտնվում է Ամերիկայի Միացյալ Նահանգներում։ Ելնելով դրանից՝ քրեական վարույթին առնչվող բոլոր անհրաժեշտ փաստաթղթերի փաթեթը, ինչպես նաև Վ․ Ղուկասյանին հայտնաբերելու, գործող իրավական մեխանիզմներով վերջինիս ՀՀ իրավասու մարմիններին փոխանցելու հարցում անհրաժեշտ օժանդակություն ցուցաբերելու վերաբերյալ ԱՄՆ իրավասու մարմիններին ուղղված իրավական օգնության միջազգային հարցումը փոխանցվել է ՀՀ գլխավոր դատախազությանը՝ այդ ուղղությամբ անհրաժեշտ ընթացակարգ ապահովելու նպատակով»:

Այսպիսով, Վարդան Ղուկասյանի նկատմամբ հետախուզում հայտարարելու մասին տեղեկությունը, որը մեկ տարի առաջ հանրայնացրել էին իրավապահ մարմինները, հիմա սահուն կերպով գաղտնի են պահում հանրությունից՝ թաքնվելով անձնական տվյալների պաշտպանության օրենսդրության հետևում։

«Դոգ» մականունով հայտնի Վարդան Ղուկասյանը ոստիկանության նախկին աշխատող էր և համակարգից դուրս գալուց հետո հեռացել էր Հայաստանից։ Ղուկասյանին Հայաստանի իրավապահները մեղադրում են մի քանի դրվագով՝ շորթման, դատարանի նկատմամբ անհարգալից վերաբերմունքի, տարբեր անձանց նկատմամբ բռնություն գործադրելու հրապարակային կոչերի համար։

Ըստ պաշտոնական հաղորդագրության, Ղուկասյանը գործարար Տիգրան Արզաքանցյանից 110 հազար դոլար է պահանջել, հակառակ դեպքում սպառնացել է, որ նրա և նրա կնոջ վերաբերյալ իր հաղորդաշարով կհրապարակի նրանց համբավն արատավոր տեղեկություններ։ Արզաքանցյանն էլ գումարը չի տվել և դիմել է իրավապահներին։ Բացի այդ, Ղուկասյանը նաև երևանյան գիշերային ակումբներից մեկի ներկայացուցչից է պահանջել 60-100 հազար դոլար ակումբի մասին հրապարակումները դադարեցնելու դիմաց։ Բայց սա ամենը չէ. քրեական գործերով են անցնում նաև Ղուկասյանի կուսակիցներն ու մտերիմները, որոնք ևս գումար շորթելու համար են մեղադրվում։ Ինքը՝ Ղուկասյանը, հերքել էր այս մեղադրանքները։

Հասմիկ Համբարձումյան