Մեկ անձից գնում՝ հեծանվարշավի կազմակերպման համար

Կառավարության որոշմամբ հավելյալ 3․160 մլն դրամ է հատկացվել վարչապետի աշխատակազմի «Հանրային կապերի և տեղեկատվական կենտրոն» ՊՈԱԿ-ին՝ «Tour de Sevan 2024» հեծանվարշավի հանրային իրազեկումն ապահովելու համար։

«Հայաստանի Հանրապետության վարչապետի աշխատակազմի և «Հանրային կապերի և տեղեկատվության կենտրոն» ՊՈԱԿ-ի տեխնիկական հագեցվածության բարելավման նպատակով անհրաժեշտություն է առաջացել ձեռք բերել  գրասենյակային գույք, համակարգչային տեխնիկա, էլեկտրոնային սարքեր և սարքավորումներ, ինչպես նաև միջոցառումների հետ կապված ծառայություններ՝ «Tour de Sevan 2024» Սևանի շուրջ հեծանվարշավի կազմակերպման նպատակով»,- նշվում է կառավարության նիստին ներկայացված նախագծի հիմնավորումներում։

«Հանրային կապերի և տեղեկատվության կենտրոն» ՊՈԱԿ-ին 3 մլն 160 հազար դրամը տրամադրվել է դրամաշնորհի ձևով: ՊՈԱԿ-ը, ըստ կառավարության որոշման, ապահովելու է «Tour de Sevan 2024» Սևանի շուրջ հեծանվարշավի հանրային իրազեկումը։

«Tour de Sevan 2024» հեծանվարշավի կազմակերպման համար պետական բյուջեից հատկացվում է 15 մլն դրամ, իսկ այդ միջոցառումը անցկացնելու համար անհրաժեշտ ծառայությունների ձեռքբերման նպատակով գնման ձև է ընտրվել հրատապության կարգով մեկ անձից գնում կատարելու ընթացակարգը, «քանի որ գնման որևէ մրցակցային ձևի կիրառումը ժամկետի առումով հնարավոր չէ»։

Հայաստանում տվյալ տարվա պետական բյուջեն ձևավորվում և Ազգային ժողովի կողմից ընդունվում է նախորդ տարվա վերջին, իսկ այս միջոցառումը նախատեսված էր դեռևս նախորդ տարվա վերջին հաստատված պետբյուջեով։ Հետևաբար, առնվազն տարօրինակ է ավելի վաղ, այսինքն, բյուջեով ծրագրված միջոցառման կազմակերպման համար վերջին պահին ժամկետների սուղ լինելու պատճառաբանությամբ հրատապ մեկ անձից գնման ընթացակարգ կիրառելը։

«ՀՀ Վարչապետի գավաթի» շրջանակներում գրեթե բոլոր մրցաշարերը կազմակերպելու համար գնման ընթացակարգերը եղել են դրամաշնորհային մրցույթի միջոցով։ Յուրաքանչյուր նման միջոցառումների համար պետբյուջեից հատկացվել է մի քանի տասնյակ միլիոն դրամ։

Օրինակ՝ 2021 թվականին «ՀՀ Վարչապետի գավաթ» սիրողական կրոսվազքի մրցաշարի անցկացման համար դրամաշնորհի ձևով «Հատիս» սպորտային բարեգործական հիմնադրամին տրամադրվել է 35 մլն 710 հազար դրամ (շուրջ 98 000 ԱՄՆ դոլար) գումար։

2022-ին սիրողական կրոսվազքի անցկացման համար «ՎՍ գրուպին» տրամադրվել է շուրջ 42 մլն դրամ։

2023-ին, դարձյալ դրամաշնորհի ձևով, բայց այս անգամ «Գևորգիան կոնցեռն» ՍՊԸ-ին է տրամադրվել 21 մլն 527 հազար դրամ՝ «ՀՀ Վարչապետի գավաթ» սիրողական խճուղային հեծանվավազքի մրցաշարն անցկացնելու համար։

Այս տարվա սկզբին ևս «ՀՀ Վարչապետի գավաթ» դպրոցականների խճուղավազք է կազմակերպվել, որ համար դրամաշնորհի ձևով «Պեցցո» ՍՊԸ-ին հատկացվել է 29 մլն դրամ։ 

«ՀՀ Վարչապետի գավաթ» խորագիրը կրող մարզական մասսայական միջոցառումները Հայաստանում անցկացվում են 2021 թվականից սկսած։ Գործադիրից վստահեցնում են, որ այդ միջոցառումների նպատակն է «հանրության շրջանում առողջ ապրելակերպ և ակտիվ հանգիստ արմատավորելը»։ 

Այսպիսով, «ՀՀ Վարչապետի գավաթի» շրջանակներում պետական բյուջեով նախատեսված Սևանի շուրջ հեծանվարշավի կազմակերպման համար բյուջեից հատկացվում է 15 մլն դրամ (39 հազար դոլար)։ Միջոցառման կազմակերպման համար գնումների մրցույթ չի հայտարարվել, և գնումն իրականացվելու է մեկ անձից՝ հրատապ կարգով այն դեպքում, երբ հեծանվարշավը վաղուց ծրագրված միջոցառում էր։

Հասմիկ Համբարձումյան