ՓԱՍՏԱՉԱՓ
Խոշորացույց
Թիվ-թվանք
Տեսանյութեր
հյ
ру
en
Խաչատուր Սուքիասյանը սեպտեմբերի 3-ին Factor.am լրատվամիջոցին տված հարցազրույցում մանիպուլյատիվ հայտարարություն է արել 2020 թվականի 44-օրյա պատերազմի մասին։
Նա, մասնավորապես, անդրադառնալով լրագրողի դիտարկմանը, որ ըստ արցախցիների՝ Հայաստանի Հանրապետությունը ռազմական գործողությունների ժամանակ Արցախին միայնակ է թողել ու օգնության չի հասել, պատասխանել է․
«Դուք ուսումնասիրեք, թե 2020 թվականի զոհերից ինչքանն է Հայաստանի Հանրապետության տարածքից եղել, ինչքան են ՀՀ-ից գնացել էնտեղ գրանցված եղել և ինչքանն են Արցախից եղել ․․․Շատ կզարմանաք, թե 2020 թվականի պատերազմին ինչքանն են Հայաստանի Հանրապետությունից մեր եղբայրները զոհվել, մեր երեխաները զոհվել, ինչքան են Ղարաբաղում գրանցվածները զոհվել, և ինչքան են Ղարաբաղի գրանցում ունեցողները զոհվել»։
Այսպիսով, կարելի է ենթադրել, որ ՔՊ-ական պատգամավորն ակնարկում է, որ Արցախի գրանցում ունեցողները չեն ունեցել ամենաշատ զոհերը 2020 թվականի 44-օրյա պատերազմի ընթացքում։
Դեռևս 2022 թվականի հոկտեմբերին «Փաստերի ստուգման հարթակը» հրապարակել էր 44-օրյա պատերազմի զոհերի տվյալները՝ ըստ համայնքների, որոնց համաձայն, զոհերի թիվը կազմում էր 2523:
Данные о погибших в 44-дневной войне по общинам: инфографика
2022 թ․ ապրիլին ԱԺ-ում վարչապետ Փաշինյանը հայտնել էր, որ այդ պահի դրությամբ 2020 թ․ պատերազմի զոհերի թիվը 3825 է։ Քննչական կոմիտեն, սակայն, հարցմանը ի պատասխան, հայտնել էր, որ զոհերի թիվը 3749 է։
Ըստ համայնքներից ստացած հարցումների պատասխանների, բնակչության թվի համեմատ ամենաշատ զոհեր եղել են հենց Արցախից։
Տվյալ ժամանակ գործող՝ Արցախի մարդու իրավունքների պաշտպանի գրասենյակի տրամադրած տեղեկության համաձայն՝ 44-օրյա պատերազմում զոհվել է 763 զինծառայող և 72 քաղաքացիական անձ, ընդհանուր թվով՝ 835 անձ։
Հայաստանի և Արցախի ընդհանուր բնակչությունը 2020 թվականի դրությամբ կազմում էր 3 միլիոն 105 հազար մարդ, որի 4․7 տոկոսը կազմել է Արցախի բնակչությունը։ Ըստ պաշտոնապես հայտարարված զոհերի տվյալների, 2020 թ․ պատերազմում Արցախից զոհերը կազմել են ընդհանուր զոհերի 21․8 տոկոսը։
Այսպիսով, Խաչատուր Սուքիասյանի հավանական ակնարկը, որ Արցախում գրանցված անձինք ավելի քիչ տոկոս են կազմում զոհերի մեջ, չի համապատասխանում իրականությանը։
Արփինե Հովհաննիսյան
