Հայաստանի Ազգային ժողովի փոխնախագահ Էդուարդ Շարմազանովը, որպես ՀԱՊԿ խորհրդարանական վեհաժողովի դիտորդական առաքելության ղեկավար, դիտարկել է նախօրեին Ռուսաստանում տեղի ունեցած նախագահական ընտրությունները և արել իրականությանը չհամապատասխանող հայտարարություններ:
Ռուսական ՌԻԱ գործակալությանը տված հարցազրույցում Շարմազանովը ՀԱՊԿ խորհրդարանական վեհաժողովի անունից պաշտոնապես հայտարարել է, որ ընտրություններն ընթացել են ռուսական սահմանադրության պահանջներին համապատասխան, նորմալ մթնոլորտում և ընտրախախտումներ չեն արձանագրվել։
«Ապահովված է բազմակարծությունը, բոլոր թեկնածուների համար ստեղծվել են հավասար պայմաններ, ընտրողների համար որևէ խնդիրներ չկան», — ասել է ԱԺ փոխխոսնակը։
Մինչ Շարմազանովը հայտնում է, որ ընտրություններն անցել են առանց խախտումների և հավասար պայմաններում, ԵԱՀԿ/ԺՀՄԻԳ ընտրությունների դիտորդական առաքելությանը, որը ևս դիտարկել է Ռուսաստանի նախագահական ընտրությունները հայտարարություն է հրապարակել ընտրությունների դիտարկման նախնական եզրակցություններով։
18 էջից բաղկացած զեկույցում կազմակերպությունը նշում է, որ ընտրությունները ընթացել են վերահսկվող քաղաքական և իրավական միջավայրում, չի պահպանվել թեկնածուների հավասար մրցակցային դաշտը, ինչը պայմանավորված էր ԶԼՄ-ների գործող նախագահի գործունեության կողմնակալ լուսաբանմամբ։ Բացի այս կառույցն արձանագրել է մի շարք խախտումներ՝ կապված քվեարկության գաղտնիության և ձայների հաշվարկի թափանցիկության հետ։
Հիշեցնենք՝ ի սկզբանե ԿԸՀ էր դիմել 36 նախագահի թեկնածու, որոնցից միայն 19-ին է թույլատրվել ստորգրությունների հավաքագրում իրականացնել (ՌԴ-ում առաջադրվելու համար ստորագրահավաք է պետք անել)։ ԿԸՀ-ն մերժել է նաև ընդդիմադիր գործիչ Ալեքսեյ Նավալնու թեկնածուության գրանցումը, որից հետո Նավալինի դիմել էր գերագույն դատարան որոշումը չեղարկելու պահանջով, սակայն կրկին մերժվել։
ԵԱՀԿ/ԺՀՄԻԳ դիտորդական առաքելությունը արձանագրել է նաև վարչական ռեսուրսի չարաշաման դեպքեր։ «Ահազանգներ են ստացվել, երբ աշխատակիցները, ուսանողները և դպրոցականների ծնողները ճնշումների են ենթարկվել, նրանց ստիպել են մասնակցել քվերկությանը», — նշված է հաղորդագրության մեջ։
Հավելենք նաև, որ մի շարք ընտրախախտումներ են արձանագրվել ընտրատեղամասերում տեղադրված տեսախցիկների միջոցով։ Այդ մասին ավելի մանրամասն կարող եք կարդալ այստեղ։ Արձանագրված են նաև լցոնումների բազմաթիվ դեպքեր, որոնց տեսագրությունները հասանելի են համացանցում։
Այսպիսով, կարող ենք փաստել, որ խախտումների բացակայության և թեկնածուների համար հավասար պայմանների մասին Էդուարդ Շարմազանովի հայտարարությունը հեռու է իրականությունից:
Հիշեցնենք, որ ՌԴ ԿԸՀ-ի հրապարակած տվյլաների համաձայն՝ ՌԴ գործող նախագահ Վլադիմիր Պուտինը հավաքել է 76,67% ձայն, երկրորդ տեղում է կոմունիստ Պավել Գրուդինինը՝ 11,79%, երրորդը Վլադիմիր Ժիրինովսկին՝ 5,66%, չորրորդ տեղը զբաղեցրել է Քսենիա Սոբչակը՝ 1,67%-ով։
