Գյումրու քաղաքապետարանը հերքում է ՌԴ ՊՆ-ին՝ ռազմաբազան ձյուն չի մաքրել

Դեկտեմբերի 15-ին ՌԴ պաշտպանության նախարարության մամուլի ծառայությունը հայտնել է, որ «Ռուսական ռազմաբազայի զինծառայողները Հայաստանում տեղի բնակիչներին օգնել են ձյան տեղումների դեմ պայքարում»։

Բառացիորեն այսպիսի ձևակերպմամբ վերնագրով է հրապարակված ՌԴ ՊՆ հաղորդագրությունը, որում ասվում է, որ այդ նպատակով ստեղծվել է ռուս զինծառայողների 50 հոգանոց խումբ, որոնց տրամադրվել են 10 ԿամԱԶ մեքենաներ և այլ տեխնիկա։

Ըստ հաղորդագրության, այդ խումբը եղանակային անոմալ պայմանների պատճառով առաջացած արտակարգ իրավիճակներում պետք է օգնի բնակչությանը։ Սակայն ըստ հաղորդագրության վերնագրի՝ այդ օգնությունն արդեն իսկ տրամադրվել է։ Ավելին՝ հրապարակումն ուղեկցվում է ԿամԱԶ-ի նկարով, որը կարծես հենց այդպիսի օգնություն է ցուցաբերում։

Մենք փորձեցինք պարզել այս տեղեկությունների իսկությունն ու կապվեցինք Գյումրիի քաղաքապետարանի հետ։ Քաղաքապետի մամուլի քարտուղար Սոնա Առաքելյանը, սակայն, հայտնեց, որ քաղաքապետարանը ռուսական ռազմաբազայից որևէ օգնություն չի ստացել։

«Ռուսական ռազմաբազայից մենք չենք ստացել ձնահավաք տեխնիկա կամ որևէ այլ օգնություն»,- հայտնեց մամուլի քարտուղարը։ Առաքելյանը նաև նշեց, որ քաղաքապետարանն ունի անհրաժեշտ քանակությամբ տեխնիկա, որի միջոցով իրականացվում են ձնամաքրման աշխատանքները։«Ձնամաքրման աշխատանքները վաղուց արդեն ավարտվել են, Գյումրիի բոլոր փողոցները մաքրված են իդեալական»,- վստահությամբ պնդեց մամուլի քարտուղարը։

Չանդրադառնալով Առաքելյանի այս վերջին պնդմանը՝ փաստենք, սակայն, որ վերջինս պաշտոնապես հերքեց ռուսական ռազմաբազայի մասնակցությունը Գյումրի քաղաքի ձնամաքրման աշխատանքներին։

Փաստենք, որ այսպիսի «մեքենայությունները» հատուկ են ռուսական գրեթե բոլոր պաշտոնական լրատվական կայքերին, սակայն այս դեպքում գործ ունենք ոչ թե ինչ-որ գործակալության, այլ ՌԴ ՊՆ մամուլի ծառայության հետ։