«Քաղաքացիական պայմանագիր» կուսակցությունը մարտի 31-ին հրապարակեց Սերժ Սարգսյանի վարչապետ դառնալու դեմ պայքարի ճանապարհային քարտեզը: Այն հրապարակվեց Գյումրի քաղաքի Վարդանանց հրապարակում, որից հետո հայտարարվեց, որ ՔՊ անդամները քայլերթով Գյումրիից հասնելու են Երևան, որտեղ ապրիլի 13-ին հանրահավաք են անցկացնելու: Տպագիր ԶԼՄ-ները ամենօրյա ռեժիմով, իսկ էլեկտրոնային կայքերն օրական մի քանի անգամ անդրադառնում են մինչ օրս ընթացող քայլարշավին: Բացի ՔՊ-ի գործողություններից երեկվանից ակտիվ քննարկվում է ԵԼՔ դաշինքի մաս կազմող ուժերից երկուսի՝ ՔՊ-ի և «Լուսավոր Հայաստանի» հեռակա բանավեճը: Նշենք, որ «Լուսավոր Հայաստան» կուսակցությունն առաջարկում է ճնշում բանեցնելով որոշակի վերահսկողական լծակներ ստանալ, սակայն ՔՊ-ից հիշեցնում են, որ այդ ճանապարհով «ՕԵԿ-ն ու ՀՅԴ-ն արդեն անցել են»:
Եվ չնայած առցանց ԶԼՄ-ների ակտիվ լուսաբանման, ՔՊ-ի «Իմ քայլը» նախաձեռնությունը չի լուսաբանվում հայկական հեռուստաընկերություններով՝ այդպիսով նվազեցնելով նախաձեռնության մասին քաղաքացիների տեղեկացվածության աստիճանը։
Հանրային հեռուստաընկերություն, «Օրակարգ» լրատվական
ՔՊ-ի ճանապարհային քարտեզը հրապարկվեց մարտի 31-ի ցերեկը: Հանրայինի «Օրակարգի» հիմնական թողարկման նույն օրվա գլխավոր լուրերն էին՝ Ճրագալույցի պատարագը, որին ներկա է եղել Սերժ Սարգսյանը, «Ալեքսանդր» հյուրանոցի բացումը Երևանում, դիվանագետների կողմից Կարմիր բլուրում տեղի ունեցած ծառատունկը, սմարթ այգու հիմնադրումը, Աթեշյանի դեմ ակցիան Թուրքիայում, Չիվա գյուղի հյուրատան պատմությունը: Ապրիլի 1-ը կիրակի օր էր, Հանրայինը շաբաթն էր ամփոփում «360 աստիճան» թողարկմամբ, որի ժամանակ ոչ մի բառ «Իմ քայլը» ակցիայի մասին: Ապրիլի 2-ին «Օրակարգ»-ի հիմնական թողարկումը կարելի է ասել ամբողջությամբ նվիրված էր ապրիլյան պատերազմին: Ապրիլի 3-ի թողարկումը «Օրակարգ» լրատվականը սկսում է եղանակի վատթարացման մասին լուրով, որտեղ ներկայացվում էր, թե ինչպես սածիլները պաշտպանել ցրտից: Հետո խոսում են ջրամբարներից, վարկային կազմակերպություներից մեկի կողոպուտից, Մոսկվայում տեղի ուենցած հրդեհից, վիզաներ տրամադրող թուրքական ընկերությունից և վերջում կրկին եղանակից:
«Արմենիա» հեռուստաընկերություն, «Ժամը» լրատվական
Հանրային հեռուստաընկերության ոճը պահպանել է նաև «Արմենիա» հեռուստաընկերությունը, որը պատկանում է «Պանարմենիա մեդի գրուպ»-ին: «Ժամը» լրատվականի՝ մարտի 31-ից մինչև ապրիլի 3-ն ընկած ժամանակահատվածի բոլոր ռեպորտաժները շրջանցել են ՔՊ-ի «Իմ քայլը» քայլարշավիը: «Ժամը» լրատվականն այդ օրերին անդրադարձել է ճրագալույցի պատարագին, եղանակային փոփոխություներին, վարկային կազմակերպությունում տեղի ունեցած կողոպուտին, Սերժ Սարգսյան-երիտասարդ գիտնականներ հանդիպմանը, սննդի կետում տեղի ուենցած պայթյունին և այլն:
«Շանթ» հեռուստաընկերություն, «Հորիզոն» լրատվական
Այս հեռուստաընկերությունը, Հ1-ի և «Արմենիայի» հետ համարվում է Հայաստանի առաջատար հեռուստաընկերություններից մեկը: «Շանթ» հեռուստաընկերությանը ևս չի հետաքրքրում Սերժ Սարգսյանի դեմ պայքարի դուրս եկած քաղաքական ուժի գործունեությունը: Հորիզոնի և ոչ մի թողարկման ժամանակ ընդդիմադիրների գոյության և գործունեության մասին որևէ հիշատակում չկա:
Նյութը հրապարակելուց հետո պարզվեց, որ «Շանթ» հ/ը «Հորիզոն» լրատվականի ապրիլի 3-ի հաղորդման մեջ հակիրճ հաղորդվել է քայլերթի մասին, սակայն չի հիշատակվել, որ այն Սերժ Սարգսյանի դեմ է:
«Կենտրոն» հեռուստաընկերություն, «Էպիկենտրոն» լրատվական
«Կենտրոն» հեռուստաընկերության լրատվական թողարկումը նույնպես չի անդրադառնում Սերժ Սարգսյանի վարչապետ առաջադրվելու դեմ սկսված պայքարին: «Էպիկենտրոն» լրատվականը նույն հաջորդականությամբ լուսաբանել է պատարագը, ծառատունկը, ապրիլյան պատերազմը, Ծառուկյանի հանդիպումը զոհվածների հարազատներին, «Բուրգեր քինգում» տեղի ունեցած պայթյունը և այլն:
Նյութը հրապարակելուց հետո պարզվեց, որ «Կենտրոն» հ/ը «Ուրվագիծ» հաղորդման եթերում Քաղաքացիական պայմանագրի «Իմ քայլը» արշավը քննարկվել է։
«Երկիր մեդիա» հեռուստաընկերություն, «Երկիրն այսօր» լրատվական
«Երկիր մեդիա» հ/ը, հետ չմնալով մյուս հ/ը-ներից, «Երկիրն այսօր» ծրագրի մարտի 31-ի թողարկումը սկսվում է պատարագի մասին լուրով, ապա անդրադարձ կատարում ԿԳ ՀՅԴ-ական նախարար Լևոն Մկրտչյանի մոսկովյան այցին, նախկին ԱԳ նախարար Վարդան Օսկանյանի գործունեությանը, ծառատունկին և այլն: Ապրիլի 2-ի թողարկումն էլ նվիրված էր ապրիլյան պատերազմին, թուրք-կոսովոյական համագործակցությանը, Երևանում տեղի ունեցած պայթյունին և այլն: Ապրիլի 3-ի թողարկմանն էլ «Երկիրն այսօր» լրատվականը կրկին լուսաբանել է Երևանում տեղի ունեցած պայթյունի դեպքը, հետո անդրադարձել վարկային կազմակերպության կաղոպուտին, հունվարի 3-5-ը աշխատանքային օր դարձնելու նախագծին, ապա ջրամբարների խնդրին և Պուտինի Անկարա կատարած այցին: «Երկիրն այսօր» լրատվականը ևս ոչ մի կերպ չի հիշատակել «Իմ քայլը» ակցիան:
«Հ3» հեռուստաընկերություն, «Օրը» լրատվական
«Հ3» հեռուստաընկերությունը վերը նշված հ/ը-ների օրինակով ձեռնպահ է մնացել Սերժ Սարգսյանի դեմ պայքարողներին լուսաբանելուց: «Հ3»-ի միօրինակ լրատվությունը ոչ մի անգամ այս օրերին չի անդրադարձել ՔՊ-ի քայլարշավին:
«ԱՐ» հեռուստաընկերություն, «Ազդարար» լրատվական
«Գրանդ հոլդինգ» ընկերությանը պատկանող «ԱՐ» հեռուստաընկերությունը, որը մշտապես աչքի է ընկել ներքաղաքական գործընթացներին հնարավորինս քիչ անդրադառնալով, այս անգամ էլ չի փոխել իր գործելաոճը: «Ազդարար» լրատվականի թողարկումներում անդրադարձ է կատարվել ապրիլյան պատերազմին, վիրավոր զինծառայողների առողջական խնդիրներին, մեռելոցի խորհրդին, եղանակային անբարենպաստ պայմաններին և այլն:
«Արարատ» հեռուստաընկերություն, «Հայլուր» լրատվական
Այսքանից հետո տարօրինակ կլիներ, որ Սերժ Սարգսյանի դեմ պայքարը լուսաբաներ ՀՀԿ-ի կուսակցության շենքում տեղակայված «Արարատ» հ/ը-ն: «Հայլուր» լրատվականի այս օրերի ոչ մի թողարկում չի անդրադարձել «Քաղաքացիական պայմանագիր» կուսակցության սկսած քայլարշավին:
Այսպիսով, դիտարկելով Հայաստանի Հանրային, «Արմենիա», «Շանթ», «Երկիր մեդիա», «Կենտրոն», «Հ3», «Արարատ» և «ԱՐ» հեռուստաընկերությունների լրատվական թողարկումները, կարող ենք արձանագրել, որ ընդդիմադիր այս քաղաքական միավորի գործունեությունն ընդհանրապես չի լուսաբանվում հեռուստատեսությամբ: «Հ2» հեռուստաընկերության արխիվը համացանցում պահպանված չլինելու պատճառով չենք կարող միանշանակ պնդել՝ անդրադարձ եղել է ՔՊ-ի քայլարշավին թե՞ ոչ:
