Իշխանյանը սխալվում է․ քաղհասարակությունը դատապարտել է «Երկիր Մեդիայի» տնօրենի ձերբակալությունը

Հունիսի 14-ին 168 TV-ի «Ռիվյու» հաղորդման ընթացքում լրագրող, ռեժիսոր Հովհաննես Իշխանյանը հայտարարել է, թե քաղաքացիական հասարակությունը, մասնավորապես, մի շարք մեդիա կազմակերպություններ, չեն դատապարտել «Երկիր Մեդիա» հեռուստաընկերության տնօրեն Բագրատ Եսայանի ձերբակալությունը։ 

«Բագրատ Եսայանին՝  «Երկիր Մեդիայի» տնօրենին, երբ որ տարան ԱԱԾ, շենքի ներսից, Ամերիկայի դեսպանատանը, բանը․․․ լուր հայտնեցին՝ նկարներով, սիրուն, բան․․․, որ ազատ խոսքի շուրջ հավաք ենք կատարել Հայաստանում։ Երևանի մամուլի ակումբի նախագահն էր ներկա՝ Բորիս Նավասարդյանը, Նունե Սարգսյանը՝ Մեդիա նախաձեռնությունների կենտրոնից, այսինքն, որոնց գործունեությունը կապված է բանի հետ․․․ մամուլի ազատության հետ։ Բայց ո՛չ Երևանի մամուլի ակումբը, ո՛չ Մեդիա նախաձեռնությունների կենտրոնը որևէ պաշտպանական հայտարարություն և դատապարտող չեն արել»-, ասել է Հովհաննես Իշխանյանը։ 

Բագրատ Եսայանին իր իսկ աշխատասենյակից բերման էին ենթարկել հունիսի 10-ին և տարել Նալբանդյան փողոցում գտնվող ԱԱԾ մեկուսարան։ Ըստ Եսայանի փաստաբան Վահե Եփրիկյանի հաղորդագրության՝ Եսայանին մեղադրանք է առաջադրվել ՀՀ Քրեական օրենսգրքի 38-225 հոդվածի 2-րդ մասի (Զանգվածային անկարգությունների ժամանակ դրանց մասնակցի կողմից բռնություն գործադրելը, ջարդ կամ հրկիզում իրականացնելը, գույք ոչնչացնելը կամ վնասելը․․․) և 164 հոդվածի 1-ին մասի (Լրագրողի մասնագիտական օրինական գործունեությանը խոչընդոտելը կամ նրան տեղեկություններ տարածելուն կամ տարածելուց հրաժարվելուն հարկադրելը) հատկանիշներով։

Այս մեղադրանքները վերաբերում են 2020 թվականի նոյեմբերի 10-ի գիշերը «Ազատություն» ռադիոկայանի երևանյան գրասենյակի վրա հարձակմանը, ինչի առթիվ քրեական գործ էր հարուցվել: 

«Փաստերի ստուգման հարթակը» պարզեց, որ հունիսի 13-ին ավելի քան մեկ տասնյակ մեդիա կազմակերպություններ՝ այդ թվում նաև Երևանի մամուլի ակումբը և Մեդիա նախաձեռնությունների կենտրոնը, Եսայանի ձերբակալությունը դատապարտող հայտարարություն են տարածել։  

Դրանում նշվում է, որ «ի գիտություն ընդունելով այն փաստը, որ Եսայանը, որպես վերոհիշյալ միջադեպի մասնակից, չի խոչընդոտել նախաքննությունը և չի խուսափել ցուցմունքներ տալուց, անթույլատրելի էր նրան բերման ենթարկելն ու ձերբակալելը»։ 

«Առավելևս, երբ այդ գործողությունները իրականացվել են ցուցադրաբար, Եսայանի ղեկավարած լրատվամիջոցի շենքում, առանց նախնական ծանուցման։ Այս առնչությամբ մենք ողջունում ենք Երևանի ընդհանուր իրավասության դատարանի հունիսի 11-ին կայացրած որոշումը, որով մերժվել է Բագրատ Եսայանին կալանավորելու ԱԱԾ միջնորդությունը։ ․․․Ուստի նախաքննություն իրականացնող մարմնից պահանջում ենք գործել բացառապես օրենքի շրջանակներում, անշեղորեն պահպանել դրա տառն ու ոգին և քաղաքական որևէ շահարկման առիթ չտալ»,- նշվում է հայտարարության մեջ։

Այսպիսով, Հովհաննես Իշխանյանի պնդումը, թե քաղհասարակությունը և, մասնավորապես, Մեդիա նախաձեռնությունների կենտրոնն ու Երևանի մամուլի ակումբը չեն դատապարտել իրավապահների գործողությունները «Երկիր Մեդիայի» տնօրենի նկատմամբ, չեն համապատասխանում իրականությանը։ 

Հովհաննես Իշխանյանը լրագրող է, վավերագրական ֆիլմերի ռեժիսոր։ Նա նաև համագործակցել է քաղաքացիական հասարակության ինստիտուտների հետ, մասնավորապես, եղել է «Հանրային տեղեկատվություն և գիտելիքի կարիք» («Փինք Արմենիա») իրավապաշտպան ՀԿ-ի «Ինչպես դու» էլեկտրոնային պարբերականի խմբագիրը և զբաղվել է Հայաստանում ԼԳԲՏ անձանց իրավունքների իրավիճակի հետազոտմամբ։ 

Նանե Մանասյան