Մանրամասներ՝ ՀՀ-ում ՄԱԿ-ի դպրոցական սննդի ծրագրի և ռուսական աջակցության մասին

Նախորդ շաբաթ հանդես էինք եկել «Դեսպանը ՌԴ-ին է վերագրում Հայաստանի ու ՄԱԿ-ի՝ դպրոցական սննդի ծրագիրը» հրապարակմամբ, որին անդրադարձավ թե՛ Երևանում ՌԴ դեսպանատունը, թե՛ ԿԳ նախարարությունը, իսկ այսօր ՀՀ կառավարությունը ոլորտն ավելի թափանցիկ դրաձնելու համար անգամ հատուկ հիմնադրամ ստեղծեց:

Դժգոհությունները

Դեկտեմբերի 20-ին Երևանում Ռուսաստանի Դաշնության դեսպանատան մամուլի ծառայությունը հանդես եկավ հրապարակմամբ, որով հրապարակումը որակեց «30 արծաթով գնված», «պատվիրված», «թարմ Պսակի» (ենթադրաբար նկատի ունենալով ԱՄՆ պետքարտուղարության նախկին խոսնակ Ջենիֆեր Պսակիին), «անստորագիր» և այլն:

Դեսպանատանը պնդում են, որ ՄԱԿ-ի՝ Հայաստանի դպրոցական սննդի ծրագրի հիմնական ֆինանսավորողը Ռուսաստանն է՝ 18 միլիոն դոլարով (չբերելով որևէ կոնկրետ հղում, բացի ոմն DLMN news կայքից): Sut.am-ի թիմը, իր հերթին հղվել է ՀՀ կրթության և գիտության նախարարության ֆինանսատնտեսագիտական և հաշվապահական հաշվառման վարչության պետ Գևորգ Եղինյանին, ով հայտնել է, որ ծրագիրը ֆինանսավորում են ՀՀ պետական բյուջեն ու ՄԱԿ-ը և ոչ Ռուսաստանը, իսկ ՄԱԿ-ի Պարենի համաշխարհային ծրագիրը, ըստ Եղինյանի, Ռուսաստանի հետ «համագործակցում է»  (աուդիոձայնագրությունը կգտնեք՝ այստեղ):

Հրապարակումը պատրաստելիս մեր թիմը իրապես ջանքեր է գործադիրել ամբողջական պատկերը ստանալու համար: Դրա հիմքում դրվել է թե՛ ԿԳՆ պաշտոնյայի ասածը և թե՛ այն, որ Ռուսաստանի Դաշնության դեսպանը «Իրազեկ քաղաքացիների միավորմանը» ուղղված գրությամբ վերջերս հայտնել էր, որ ՌԴ-ն ՀՀ պետական, տեղական և դատական մարմիններին որևէ դրամաշնորհ չի տրամադրում: Այդուհանդերձ պարզվեց, որ ՌԴ-ն մասնակցում է ՄԱԿ-ի սննդի համաշխարհային ծրագրին:

Չփորձելով անդրադառնալ դեսպանատան հայտարարության քաղաքական մասին ու մեղադրանքներին՝ ռուսական կողմի բողոքից հետո մենք ևս մեկ անգամ հետաքննեցինք խնդրո առարկա հարցը և որոշեցինք ընթերցողին ներկայացնել մանրամասները:

ՄԱԿ-ի ծրագիրը

Այսպիսով, համաձայն ՄԱԿ-ի՝ Սննդի համաշխարհային ծրագրի կայքի, «Դպրոցական սնունդ-200128» ծրագիրը 2010-2017 թվականներին իրականացվում է Հայաստանի, Իսրայելի և Ռուսաստանի ֆինանսական աջակցությամբ: Ծրագրով 7 մարզերում, ՄԱԿ-ի ՊՀԾ միջոցով, մոտ 60.000 երեխաների հաշվարկով դպրոցներին հատկացվում է յոթ տեսակի սնունդ (բրինձ, մակարոն, հնդկաձավար, ձեթ, ալյուր և այլն):

Ընդ որում, դեսպան ն.գ. Իվան Վոլինկինը, իր հարցազրույցում չնշեց, որ ծրագիրը իրականացվում է ՄԱԿ-ի միջոցով և շեշտեց միայն Ռուսաստանի մասնակցությունը:

Իսկ ՄԱԿ-ի ՊՀ ծրագրին Ռուսաստանը մասնակցում է, քանի որ փաստացի գործող կանոնների համաձայն այդ ծրագրից օգտված, իսկ ապա հարստացած երկրները պետք է ներդրում ունենան այլ երկրներում այդ ծրագրի իրագործմանը: Ռուսաստանն այս ծրագրով 1995-ից 2008 թվականներին ստացել է 103 միլիոն դոլարի հումանիտար օգնություն, որի դիմաց այժմ աջակցում է  Հայաստանում, Տաջիկստանում, Ղրղզստանում, Սիրիայում, Զիմբաբվեյում, Պաղեստինում, Հյուսիսային Կորեայում և այլ երկրներում ՄԱԿ-ի Պարենի համաշխարհային ծրագրերին (գումարային առումով, տարեկան մոտ 30-40 միլիոն դոլարի չափով):

Հ.Գ. Հարկ ենք համարում նկատել, որ օրեր շարունակ մենք ապարդյուն փորձում էինք կապնվել ՌԴ դեսպանատան մամուլի բաժնի հետ, որպեսզի ստանանք ու ընթերցողին ամբողջությամբ ներկայացնենք ռուսական կողմի դիրքորոշման հայերեն տարբերակը: