«Կենսաբանական զենքերի» լաբորատորիան նաև ՌԴ-ից է փող ստանում

2016 թվականի նոյեմբերի 24-ին SUT.am-ը անդրադարձել էր «Բժշկա-կենսաբանական լաբորատորիաները Հայաստանի անվտանգության եւ ինքնիշխանության համատեքստում» թեմայով համաժողովին, որի ընթացքում սուտ տեղեկություններ էին հրապարակվել ՀՀ-ում ԱՄՆ ֆինանսավորմամբ կենսաբանական զենք ստեղծելու մասին։

Մասնավորապես, այդ համաժողովի ընթացքում հայտարարվել էր, թե ԱՄՆ պաշտպանության դեպարտամենտի «Վտանգների նվազեցման գործակալության» ֆինանսավորմամբ 2016 թվականին Երևանում, Գյումրիում և Իջևանում բացված ռեֆերենս լաբորատորիաները կարող են կենսաբանական զենք ստեղծել և օգտագործել ՌԴ ռազմավարական դաշնակից Հայաստանի բնակչության դեմ։

Խոսքը, ըստ այդմ, Առողջապահության նախարարության «Հիվանդությունների վերահսկման և կանխարգելման ազգային կենտրոն» ՊՈԱԿ-ի «Ռեֆերենս լաբորատոր կենտրոնի»  մասին էր, որը հենց, ըստ այդ ժամանակ տարածվող ապատեղեկատվության, զբաղվում է «կենսաբանական զենքի մշակմամբ՝ այն ՌԴ-ի դեմ օգտագործելու նենգ մտադրությամբ»։

Բացահայտելով այս հայտարարությունների անհեթեթությունը՝ մենք, այնուամենայնիվ, շարունակեցինք ուսումնասիրել թեման և ՀՀ Առողջապահության նախարարությունից ստացանք բավական ուշագրավ մի գրություն։

Համաձայն փաստաթղթի, ՀՀ և ՌԴ կառավարությունների միջև ԵԱՏՄ-ին անդամակցության շրջանակներում Հայաստանին տեխնիկական և ֆինանսական աջակցություն ցուցաբերելու մասին համաձայնագրի շրջանակներում ՀՀ առողջապահության նախարարության «Հիվանդությունների վերահսկման և կանխարգելման ազգային կենտրոն» ՊՈԱԿ-ի «Ռեֆերենս լաբորատոր կենտրոն» մասնաճյուղին Ռուսաստանի կողմից տրմադրվել են 14 տեսակի սարքեր-սարքավորումներ և  լաբորատոր կահույք՝ սանիտարա-քիմիական լաբորատորիայի համար։

Բացի սա, նույն համաձայնագրի շրջանակներում, հատուկ վտանգավոր վարակների լաբորատոր կարողությունների բարելավման (դաշտային պայմաններում հետազոտություններ իրականացնելու համար), բռնկումների արագ արձագանքման նպատակով՝ ՀՀ առողջապահության նախարարության «Հիվանդությունների վերահսկաման և կանխարգելման ազգային կենտրոն» ՊՈԱԿ-ին Ռուսաստանի կողմից տրամադրվել է ժամանակակից սարքեր-սարքավորումներով կահավորված 2 շարժական լաբորատորիա։

Ստացվում է, որ «Բժշկա-կենսաբանական լաբորատորիաները Հայաստանի անվտանգության և ինքնիշխանության համատեքստում» թեմայով համաժողովի բանախոսները եւ համաժողովը լուսաբանած լրատվականները հայտնվում են էլ ավելի անհեթեթ վիճակում։ Ըստ նրանց պնդումների՝ սույն ՊՈԱԿ-ը լծված է Ռուսաստանի դեմ «կենսաբանական դավադրություն» կազմակերպելով, այնինչ՝ ՊՈԱԿ-ը օժանդակություն է ստանում նաև Ռուսաստանից։

Այս տրամաբանական պարադոքսը, սակայն, չէր խանգարել քարոզիչներին «նկատել» կամ «նկարել» ամերիկյան ֆինասավորմամբ մի «ստոր գործընթաց» ընդդեմ հայ-ռուսական բարեկամության։ Այդ հրապարակումների և հայտարարությունների տրամաբանությամբ՝ եթե ՊՈԱԿ-ը օգնություն է ստանում ՌԴ-ից, ապա ըստ ամենայնի՝ պատրաստում է գերվտանգավոր ու հուժկու կենսաբանական զենք, օրինակ՝ մեգաթունավոր խավարասերներ՝ Վաշինգտոնի դեմ օգտագործելու համար։ Սա, սակայն, արդեն ոչ թե համաժողովի նյութ է, այլ պարզագույն խավարամտություն։