«Հայաստանն ընդդեմ Ադրբեջանի» դատական գործերից հրաժարվելու հարց ՀՀ օրակարգում առկա չէ․ Նաիրա Զոհրաբյանը սխալ տեղեկություն է տարածել

Միջազգային իրավական հարցերով ներկայացուցչի գրասենյակից վստահեցնում են՝ միջազգային ատյաններում քննվող «Հայաստանն ընդդեմ Ադրբեջանի» դատական գործերից հրաժարվելու հարց Հայաստանի Հանրապետության կառավարության օրակարգում չկա՝ այդպիսով հերքելով հակառակը պնդող հայտարարությունները։

Սեպտեմբերի 2-ին՝ Լեռնային Ղարաբաղի անկախության օրը, ԼՂ ներկայացուցչության գրասենյակի դիմաց տեղի ունեցած ճեպազրույցի ժամանակ հասարակական գործիչ Նաիրա Զոհրաբյանը հայտարարել էր, որ միջազգայի դատական ատյաններում «Հայաստանն ընդդեմ Ադրբեջանի» բոլոր քրեական գործերը սառեցված են։ «Հաագայի արդարադատության դատարանում բոլոր էն քեյսերը, որոնք Ադրբեջանի դեմ ներկայացված են` որպես ռազմական հանցագործ, էթնիկ զտման հետ կապված, ռազմագերիների հետ կապված, բոլոր այդ դատական գործընթացները սառեցված են, որովհետև խաղաղության պայմանագրի մասին Ալիևի ուղարկած փաթեթի մեջ 10–րդ կետում նշված է, որ Հայաստանը պետք է հրաժարվի միջազգային կառույցներում Ադրբեջանի դեմ ներկայացված բոլոր հարցերից»,- հայտարարել էր Զոհրաբյանը։ 

«Փաստերի ստուգման հարթակը»/Fip.am հարցում էր ուղարկել Միջազգային իրավական հարցերով ներկայացուցչի գրասենյակ՝ փորձելով հասկանալ՝ ի՞նչ փուլում է Արդարադատության միջազգային քրեական դատարանում «Ռասայական խտրականության բոլոր ձևերի վերացման մասին» միջազգային կոնվենցիայի շրջանակներում քննվող «Հայաստանն ընդդեմ Ադրբեջանի» գործերի քննությունը։

Ի պատասխան, Միջազգային իրավական հարցերով ներկայացուցչի գրասենյակից տեղեկացրել են․ ««Ռասայական խտրականության բոլոր ձևերի վերացման մասին» միջազգային կոնվենցիայի հիման վրա Արդարադատության միջազգային դատարանում քննվող «Հայաստանն ընդդեմ Ադրբեջանի» դատական գործով 2024 թվականի ապրիլի 15-19-ը կայացած դատարանի իրավազորության վերաբերյալ առարկությունների մասին դատական լսումներից հետո Դատարանը կայացնելու է վճիռ՝ Դատարանի կանոնների համաձայն։ Դատարանն իր իրավազորության վերաբերյալ վճռի կայացումից հետո սկսելու է գործի ըստ էության քննությունը՝ համաձայն Դատարանի կանոնների 99-րդ հոդվածի»։ 

Արդարադատության միջազգային դատարանի կանոնների 99-րդ հոդվածը սահմանում է դատավճռի վերանայման կարգը, որի համաձայն՝ մինչև գանգատը ընդունել–չընդունելու մասին վճռի կայացնելը, կարող է կողմերին լրացուցիչ հնարավորություն ընձեռվել ներկայացնելու իրենց դիրքորոշումները դրա վերաբերյալ։ Իսկ եթե դատարանը համարում է, որ գանգատն ընդունելի է, ապա սահմանում է ժամկետներ՝ այն ըստ էության քննելու համար։ 

Fip.am-ն իր հարցման մեջ նշել էր, որ ընդդիմախոսներից հնչում է պնդում, որ Արդարադատության միջազգային դատարանում «Հայաստանն ընդդեմ Ադրբեջանի» քրեական բոլոր վարույթները սառեցված են, և հետաքրքրվել էր՝ արդյո՞ք հայկական կողմը պատրաստվում է հրաժարվել Ադրբեջանի դեմ ներկայացված միջազգային քրեական հայցերից։ 

Գրասենյակից արձագանքել էին․ «Հայտնում ենք, որ ներկայումս միջազգային ատյաններում քննվող «Հայաստանն ընդդեմ Ադրբեջանի» դատական գործերից հրաժարվելու հարց ՀՀ կառավարության օրակարգում առկա չէ»։

Հասմիկ Համբարձումյան