Հայ փորձագետը, հիմնվելով deep-fake-ի վրա, 168 TV-ի եթերում սխալ պնդում է արել Թրամփի մասին

168 TV-ի տաղավարում բանախոս Սերգեյ Մելքոնյանը պնդել է, թե իբր ԱՄՆ նորընտիր նախագահ Դոնալդ Թրամփը հայտարարել է՝ «Մեքսիկան ու Կանադան պետք է դառնան ԱՄՆ նոր նահանգներ»։

Թրամփը կատակել է Թրյուդոյի հետ

ԱՄՆ նորընտիր նախագահ Դոնալդ Թրամփն ու Կանադայի վարչապետ Ջասթին Թրյուդոն, FoxNews-ի փոխանցմամբ, հանդիպել են այս տարվա նոյեմբերի վերջին, Թրամփին պատկանող Մար-ա-Լագո կալվածքում։ Հանդիպման ընթացքում Թրամփը սպառնացել է, որ պաշտոնապես Սպիտակ տուն վերադառնալուց հետո 25% մաքսատուրք կսահմանի կանադական և մեքսիկական ապրանքների նկատմամբ, քանի որ երկրները ձախողել են դեպի ԱՄՆ ապօրինի ներգաղթի ու թմրանյութերի շրջանառության վերահսկողությունը սահմաններին։ 

Ի պատասխան, Թրյուդոն արձագանքել է, որ դա կսպանի կանադական տնտեսությունը, Թրամփն էլ, իր հերթին, հարցրել է, թե արդյո՞ք Կանադայի տնտեսությունը կարող է գոյատևել միայն «ԱՄՆ-ից 100 միլիարդ դոլարի չափով օգուտ քաղելով», ապա կատակել է՝ առաջարկելով Կանադային խուսափել մաքսատուրքերից՝ դառնալով ԱՄՆ-ի 51-րդ նահանգը։

Աղբյուրի փոխանցմամբ, Թրամփի խոսքերն առաջացրել են ներկաների, այդ թվում նաև Թրյուդոյի «նյարդային ծիծաղը»։  

Deep-fake՝ Թրամփի մասնակցությամբ

Ավելի ուշ, X-ում հայտնվել է մի տեսանյութ, որում Թրամփը իբրև թե ուղերձ է հղում Կանադայի ժողովրդին՝ սպառնալով, որ բարձր մաքսատուրքեր է սահմանելու և որ Կանադայի՝ ԱՄՆ 51-րդ նահանգը դառնալու հեռանկարն անխուսափելի է։

 

Donald Trump Reveals Plan To Annex Canada pic.twitter.com/2JX9F9FMUw

— Danny Polishchuk (@Dannyjokes) December 4, 2024

Ամերիկացի փաստեր ստուգողները պարզել են, սակայն, որ տեսանյութը կեղծ է և ստեղծված է արհեստական բանականության միջոցով․ մասնավորապես, checkyourfact.com կայքը, տեսանյութը ներբեռնելով ԱԲ միջոցով ստեղծված նյութերի հայտնաբերման համար նախատեսված True Media հարթակ, տեսանյութի կեղծ լինելու ապացույցներ է արձանագրել։ Փաստեր ստուգողները պարզել են նաև, որ տեսանյութը գեներացրել է նման այլ կատակներով հայտնի երգիծաբան Դեննի Պոլիշչյուկը։  

Այսպիսով, ըստ ամերիկյան աղբյուրների, թեև Թրամփը Թրյուդոյի հետ հանդիպմանը կատակել է Կանադայի՝ ԱՄՆ 51-րդ նահանգը դառնալու մասին, այդ մասին պաշտոնապես հայտարարություններ չի արել։ Սրանից զատ, Թրամփին վերագրվող՝ ԱՄՆ կողմից Կանադան ու Մեքսիկան բռնակցելու վերաբերյալ ուղերձի տեսանյութը կեղծ է՝ deep-fake։ Հետևաբար, 168 TV-ի բանախոսը, հիմնվելով deep-fake-ի վրա, իրականությանը չհամապատասխանող պնդում է արել։ 

Նանե Մանասյան