Դավթաշենի կամուրջը երթևեկության կազմակերպման փոփոխությունների համար իսկական փորձադաշտ է դարձել․ վերջին փոփոխությունը կատարվել է 2024 թվականի դեկտեմբերին, որի մասին, ի դեպ, պաշտոնական հայտարարություն բաց աղբյուրներում չկա։
Եթե 2023 թ․ դեկտեմբերի 7-ին որոշվել էր Դավթաշենի կամրջի՝ Տիգրան Պետրոսյան փողոցից դեպի Խաչատրյան փողոց (Դավթաշենից դեպի Արաբկիր) ուղղությամբ երթևեկությունը կազմակերպել 4 գոտիով, ապա 2024 թվականի տարեվերջին Դավիթաշենի կամրջով երթևեկության փոփոխությունը չեղարկվեց, և 4 երթևեկելի գոտին դարձավ 3 գոտի:
Քաղաքացիներն այդ փոփոխությունը նկատել էին ու սոցցանցի հարթակներում կատակել՝ կամուրջը դարձել է սևագրություն։ Հիմա էլ վարորդները շարունակում են կամ չորս գոտով երթևեկել կամ՝ ում ինչպես հարմար է։
Արտապատկերումը ֆեյսբուքյան «Տուգանք» խմբից
Ի դեպ, կամրջի երթևեկելի հատվածներից մեկը չորս գոտի դարձնելը որոշակիորեն բեռնաթափել էր այդ հատվածում նախկինում գրեթե մշտապես առաջացող խցանումները։
Պատկերը՝ Google maps-ից
«Փաստերի ստուգման հարթակը» Երևանի քաղաքապետարանից փորձել է պարզել՝ ինչ հիմնավորմամբ է կատարվել այս վերջին փոփոխությունը, հատկապես՝ ինչ հաշվարկներ և այլ պատճառաբանություններ են դրվել դրա հիմքում։ Ի պատասխան, տեղեկացրել են, որ Դավթաշենի կամրջի երթևեկության փոփոխության չեղարկումը կատարվել է նախագծող, փորձաքննությունն իրականացրած, ինչպես նաև սպասարկող կազմակերպություններից ստացված եզրակացությունների հիման վրա։
2023 թ․ դեկտեմբերին կամրջի վրա երթևեկության կազմակերպման փոփոխությունից առաջ միջին նորոգման աշխատանքներ էին իրականացվել, սակայն դա չէր օգնել, որ մասնագետները արդեն փոփոխությունից հետո ահազանգեն՝ 7 գոտիով երթևեկությունը խախտում է կամուրջը շահագործելու կարգը։
Երևանի քաղաքապետարանից FIP.am-ին կից գրությամբ ուղարկել են «Կամուրջշին» փակ բաժնետիրական ընկերության եզրակացությունը, որում նշվում է, որ կամուրջը նախատեսում է 3 երթևեկելի շերտ Դավթաշեն-Կոմիտաս և 3 երթևեկելի շերտ Կոմիտաս-Դավթաշեն ուղղություններով։
Արտապատկերումը՝ «Կամուրջշին» ՓԲԸ-ի եզրակացությունից
«Հետևաբար, 4+3=7 երթևեկելի շերտերով իրականացված գծանշումը խախտում է Դավթաշեն կամրջի նախագծով նախատեսված հաշվարկային բեռնավորման սխեման, առաջացնում է կամրջի վրա գերբեռնավորում, որի հետևանքով կամրջի թռիչքային կառուցվածքի և հենարանների կոնստրուկցիաներում ստեղծվում է գերլարված իրավիճակ, ավելանում են թռիչքային կառուցվածքի ճքվածքները, որոնք նույնպես նախագծով սահմանափակած են»,- նշվում է դեռևս 2023 թ․ դեկտեմբերի 12-ին, այսինքն՝ երթևեկության փոփոխությունից 4 օր անց Երևանի տրանսպորտի վարչությանը «Կամուրջշին» ընկերության ներկայացրած մասնագիտական եզրակացության մեջ։
Ընկերությունը քաղաքային իշխանություններին խնդրել էր «հնարավորինս շտապ» փոխել գծանշումները և դրանք համապատասխանեցնել սահմանված պահանջներին այնպես, որ երթևեկելի հատվածն ունենա 6 շերտ, «ինչպես դա նախատեսված է Դավթաշենի կամրջի նախագծով, այլ դեպքում կամրջով օրից օր երթևեկելը դառնալու է վտանգավոր»։
2023 թ․-ին կատարված փոփոխությունից մի քանի օր անց իր հերթին եզրակացություն է ներկայացրել նաև Երևան քաղաքի կամուրջների սպասարկման ծառայություն իրականացնող «Կամրջային ե/բ կոնստրուկցիաների գործարան» ՓԲԸ-ն։
Երևանի քաղաքապետարանի տրանսպորտի ու շինարարության և բարեկարգման վարչությանը, ինչպես նաև ՃՈ պետին ուղարկված գրության մեջ ընկերությունը նշել է, որ կամրջի բեռնվածությունը հաշվարկված է 6 երթևեկելի գոտու համար, իսկ բեռնվածության նման փոփոխությունը կարող է առաջացնել կամրջի գործունակության խաթարում։
Արտապատկերումը՝ «Կամրջային ե/բ կոնստրուկցիաների գործարան» ՓԲԸ-ի եզրակացությունից
Ի դեպ, այս գրության մեջ նշվում է, որ երթևեկելի գոտիները 8-ն են, բայց այդպես չէր․ երթևեկության կազմակերպման փոփոխության արդյունքում ստեղծվել էր երթևեկելի 7 գոտի՝ 3+4։ Ինչևէ, մասնագետներն ահազանգ էին հնչեցրել ու հորդորել էին քաղաքային իշխանություններին փոխել գոտիների քանակը։
«Հաշվի առնելով կամրջի երկարությունը և կամրջի կրողականությունը, խնդրում ենք անհապաղ երթևեկությունը փոփոխել ու դարձնել 6 գոտի։ Կամրջի բեռնվածությունը հաշվարկված է 6 երթևեկելի գոտու համար, ուստի փոփոխությունը կարիք ունի հավելյալ փորձաքննության և համապատասխան թույլտվությունների, քանզի բեռնվածության նման փոփոխությունը կարող է առաջացնել կամրջի գործունեության խաթարմանը»,- նշվել է պատկան մարմիններին ուղարկված մասնագիտական գրության մեջ։
Այսպիսով, չնայած մասնագիտական շրջանակների ահազանգներին, Երևանի քաղաքային իշխանություններն անտեսել են Երևանի Դավթաշենի կամրջի շահագործման կանոնները, և կամրջի վրա երթևեկությունը շուրջ մեկ տարի շարունակվել է այդ կանոնների խախտմամբ։ Այժմ էլ, թեպետ Երևանի քաղաքապետարանից հաստատում են, որ երթևեկության փոփոխություն է տեղի ունեցել, դեպի Կոմիտաս հատվածը դարձել է 3 գոտի, միևնույն է, վարորդները շարունակում են երթևեկել 4 գոտով, քանի որ նախկին գծերը մաքրված չեն։
Սյուզաննա Համբարձումյան