ՓԱՍՏԱՉԱՓ
Խոշորացույց
Թիվ-թվանք
Տեսանյութեր
հյ
ру
en
Ապրիլի 1-ն աշխարհում նշվում է որպես Ծիծաղի կամ հիմարների միջազգային օր։ Այդ օրը ձեզ կարող են խաբել ոչ միայն ձեր մտերիմներն ու ընկերները, այլ նաև ԶԼՄ-ները, տարբեր կայքեր ու էջեր։
«Փաստերի ստուգման հարթակն» ամփոփել է օրվա ընթացքում տարածված սուտ լուրերը։ Նման «լուրերը» հաճախ պարունակում են հումորային կամ աբսուրդային տարրեր, սակայն միշտ էլ լինում են մարդիկ, որոնք հավատում են դրանց։
«Աշխատաժամանակի տևողությունը 8-ից 7 ժամ»
LinkedIn սոցիալական ցանցում, որտեղ սովորաբար հրապարակվում են աշխատանքի հետ կապված հայտարարություններ, էջերից մեկը տեղեկություն է տարածել, թե աշխատաժամանակի տևողությունը 8-ից 7 ժամ դարձնելու մասին նախագիծն ընդունվել է։
«Վերջապե՜ս!!! Նախագիծն ընդունվեց… Աշխատաժամանակի տևողությունը այսուհետ դառնում է օրական 8-ից 7 ժամ, շաբաթական` 40-ից 35: Եվ ամենակարևորը` աշխատավարձային փոփոխություններ չեն սպասվում»,— գրել է էջը:
Աշխատաժամանակի տևողությունը կրճատելու առաջարկությունը, հիշեցնենք, արել էր Աշխատանքի և սոցիալական հարցերի նախարարությունը։ Աշխատանքային օրենսգրքում փոփոխություններ կատարելու օրենքի նախագիծը ներկայացված է Իրավական ակտերի հրապարակման միասնական կայքում, որտեղ նշված է, որ նախագիծը լրամշակման փուլում է։
«Երևանի ցայտաղբյուրները կաշխատեն մետաղադրամով»
Ֆեյսբուքյան էջերից մեկը գրել է, թե Երևանի բոլոր ցայտաղբյուրները կաշխատեն մետաղադրամով։
«Երևանի քաղաքապետարանը նախատեսում է մինչև գարնան ավարտը աստիճանաբար ներդնել մետաղադրամով աշխատող համակարգ բոլոր ցայտաղբյուրների վրա։ Փոփոխությունները կսկսվեն քաղաքի կենտրոնից և կմեկնարկեն դեպի ծայրամասեր։ Սակագինը դեռ որոշված չէ, բայց այն կարող է լինել 50-100 դրամ՝ 30 և 45 վայրկյան ջուր ստանալու համար։ Քաղաքապետարանի կոչը Բողոքելուց առաջ ուսումնասիրեք նախագծի նպատակը և մանրամասները։ Հավաքագրված գումարը կուղղվի պինգվինների իրավունքների պաշտպանությանը»,— գրել է էջը:
Նկատենք, որ էջի այս հրապարակմանը հավատացողներ, այնուամենայնիվ, եղել են։ Այս կատակ լուրին հավատացողներից ոմանք արձագանքել են նույնիսկ ծայրահեղ ձևով՝ մեկնաբանություններում նշելով, որ այն «ցեղասպանական ծրագիր» է։
Ցայտաղբյուրները Երևանի այցեքարտերից են։ Դրանք ծառայում են որպես հանրային անվճար ջրի աղբյուրներ, որոնք երկար տարիներ ապահովել են բնակիչներին և զբոսաշրջիկներին մաքուր խմելու ջրով, և դրանք մետաղադրամով դարձնելու նախագծեր չկան։
Սյուզաննա Համբարձումյան
