Միլիոնավոր դրամների գնումներ՝ Արթիկի փոխհամայնքապետի հետ կապվող ԱՁ-ից

Արթիկի համայնքապետարանը 2022 թվականին 2.7 մլն դրամի գնման երկու պայմանագիր է կնքել փոխհամայնաքապետ Արման Աջամօղլյանի հետ կապվող «Արմինե Հակոբյան» ԱՁ-ից (անհատ ձեռնարկատեր)։ 

Այս ԱՁ-ի հետ է կապվում նաև համայնքապետարանի ֆինանսատնտեսական, եկամուտների հաշվառման և հավաքագրման բաժնի գլխավոր մասնագետ Մարիամ Փանոյանի անունը, որը, ըստ FIP.am-ի տեղեկությունների, համատեղում է համայնքային ծառայության ու ԱՁ-ի հաշվապահի աշխատանքները։ 

«Փաստերի ստուգման հարթակն» ուսումնասիրել է ԱՁ-ի գործունեությունն ու կապերը համայնքապետի տեղակալի ու աշխատակցի հետ, ինչպես նաև համայնքի հետ կնքված գնման պայմանագրերը։ 

ԱՁ-ն գրանցվել է Աջամօղլյանի՝ համայնքում պաշտոն զբաղեցնելուց ամիսներ հետո

ՀՀ արդարադատության նախարարության էլեկտրոնային E-register.am համակարգից տեղեկանում ենք, որ «Արմինե Հակոբյան» ԱՁ-ն հիմնադրվել է 2022 թվականի փետրվար ամսին․ այն գրանցված է Արթիկի Շինարարների փողոց 9, 37 հասցեում։ 

Սա այն հասցեն է, որտեղ, համաձայն ՀՀ ընտրողների ռեգիստրի, փաստացի գրանցված է և բնակվում է Արմինե Հակոբյանը։ 

ԱՁ-ն, սակայն, ձեռնարկատիրական գործունություն է ծավալում համայնքի Գարեգին Նժդեհի ⅓ հասցեում՝ որպես սննդի և ժամանցի «Պիցցա-Նիցա» անունով հաստատություն։ 

Արմինե Հակոբյանը ներկայացված է որպես ԱՁ հիմնադիր և տնօրեն։ 

Հատկանշական է, որ ԱՁ-ի գրանցումից ամիսներ առաջ՝ 2021 թվականի նոյեմբերին, Արման Աջամօղլյանը ՀՀ վարչապետ Նիկոլ Փաշինյանի որոշմամբ նշանակվել է Արթիկ համայնքի ղեկավարի ժամանակավոր պաշտոնակատար։ 

Այդ տարի համայնքում տեղի են ունեցել ՏԻՄ ընտրություններ, որոնցում հաղթել է կառավարող «Քաղաքացիական պայմանագիր» կուսակցությունը. համայնքի ղեկավար է դարձել կուսակցության թեկնածու Անանիկ Ոսկանյանը, իսկ Աջամօղլյանը նշանակվել է համայնքապետի տեղակալ։ 

Վերջինս նախկինում եղել «Օրինաց երկիր» կուսակցության անդամ։

Գնման պայմանագրեր՝ ճոխ հյուրասիրությունների համար

Համայնքապետարանն արդեն 2022 թվականի հուլիս ամսին համայնքի կարիքների համար ճաշկերույթների և ֆուրշետների կազմակերպման ծառայության մատուցման պայմանագիր է կնքել «Արմինե Հակոբյան» ԱՁ-ի հետ՝ 1․8 մլն դրամ արժեքով։

«Արմինե Հակոբյան» ԱՁ-ի հետ երկրորդ պայմանագիրը համայնքապետարանը կնքել է 2022 թվականի դեկտեմբերին, այս անգամ ամանորյա միջոցառման համար հյուրասիրության ծառայության նպատակով՝ 900,000 դրամ արժեքով։ 

Կապը համայնքապետարանի աշխատակիցների հետ

FIP.am-ի տրամադրության տակ են հայտնվել տեղեկություններ, համաձայն որոնց, Արթիկի համայնքապետարանի ֆինանսատնտեսական, եկամուտների հաշվառման և հավաքագրման բաժնի գլխավոր մասնագետ Մարիամ Փանոյանը համատեղում է համայնքային ծառայողի գործունեությունը փոխհամայնքապետ Աջամօղլյանի հետ կապվող ԱՁ-ի հաշվապահի պարտականությունների հետ։ 

Այս տեղեկությունը հաստատվում է գնման պայմանագրերի ուսումնասիրությունից ի հայտ եկած ուշագրավ մի փաստով։ Այսպես․ ամանորյա հյուրասիրության նպատակով կնքված գնման պայմանագրում մրցույթին մասնակցող ԱՁ կոնտակտային էլեկտրոնային հասցեն նշված է հենց Մարիամ Փանոյանի անունով։    

Մենք հարցում ուղարկեցինք Արթիկի համայնքապետարան՝ ճշտելու, թե որքանո՞վ է Փանոյանը ներգրավված գնման գործընթացներում, ինչին ի պատասխան համայնքապետարանից նշեցին, որ Փանոյանն առհասարակ ներգրավված չէ գնման որևէ գործընթացում։

Հատկանշական է, որ այս տեղեկությունը չի համապատասխանում իրականությանը․ ճիշտ է՝ Փանոյանը չի եղել վերոհիշյալ երկու գնումների մրցութային հանձնաժողովներում, սակայն համայնքի գնման այլ գործընթացներում նա ներգրավված է որպես հանձնաժողովի անդամ։  

FIP.am-ը փորձեց ճշտել իր տրամադրության տակ հայտնված տեղեկությունը, համաձայն որի՝ «Արմինե Հակոբյան» ԱՁ-ի իրական սեփականատերը փոխհամայնքապետ Արման Աջամօղլյանն է։ Մենք կապ հաստատեցինք ԱՁ-ի կողմից շահագործվող «Պիցցա-Նիցա» հաստատություն և խնդրեցինք տրամադրել Արման Աջամօղլյանի հեռախոսահամարը։ Ի պատասխան ասացին, որ Արմանը տեղում չէ, բայց հեռախոսահամարը տրամադրեցին։ 

Հատկանշական է, որ հաստատությունից տրամադրեցին այն նույն հեռախոսահամարը, որը նշված է Spyur.am-ում գրանցված «Պիցցա-Նիցայի» կոնտակտային տվյալներում։ 

Այս համարով մեր հեռախոսազանգին պատասխանելիս Արման Աջամօղլյանն ասաց, որ որոշ ժամանակ առաջ աշխատել է ձեռնարկությունում, սակայն այլ մանրամասներ չհայտնեց։ 

Փաստացի՝ հարցը, թե ինչո՞ւ է իր անձնական հեռախոսահամարն առ այս պահը Spyur.am-ում նշված որպես կոնտակտային հեռախոսահամար, ինչպես նաև այն, թե ինչո՞ւ են աշխատակիցները հարցերի համար իրեն ուղղորդում, մնացին չպարզաբանված։

Այսպիսով, FIP.am-ի՝ գնման գործընթացի ուսումնասիրության արդյունքում ի հայտ եկան փաստեր, որոնք հաստատում են «Արմինե Հակոբյան» ԱՁ-ի փոխկապակցվածությունը Արթիկի համայնքապետարանի երկու պաշտոնյաների՝ փոխհամայնքապետի և բաժնի պետի հետ։ 

Նանե Մանասյան