Ռուստամյանի փոփոխական կարծիքը վարչապետի լիազորությունների մասին

«Հայ հեղափոխական դաշնակցության» պատգամավոր Արմեն Ռուստամյանը, 2015 թվականին ընդունված նոր Սահմանադրությամբ վարչապետին տրվող լիազորությունների մասին խոսելով, հայտարարել էր, որ ոչ մի սուպերվարչապետ էլ չի տեսնում Սերժ Սարգսյանին տրվելիք լիազորություններում։

Նա, մասնավորապես, պնդում էր, որ «վարչապետի վրայից ամբողջ դատական իշխանությունն է անջատված, որը շատ կարևոր է։ Երկրորդ գլխավոր փոփոխությունը, որ կա, ինքը վարչապետը և կառավարությունն ամբողջությամբ հաշվետու է Ազգային ժողովի առաջ, որը մինչև հիմա չկար»։

Սերժ Սարգսյանի հրաժարականից հետո, մայիսի 7-ին, Ռուստամյանը արդեն խոսում էր վարչապետի լիազորությունները նվազեցնելու անհրաժեշտության մասին։

«Վարչապետի լիազորությունները պետք է սահմանափակվեն: Ոստիկանության, ազգային անվտանգության նկատմամբ վերահսկողություն ունենալը բխում է խորհրդարանական համակարգի տրամաբանությունից։ Դրանց նկատմամբ վերահսկողություն նաև ԱԺ-ն պետք է ունենա»,- հայտարարում էր նա։

Լրագրողների հարցին ի պատասխան, թե ինչու է փոխվել նրա դիրքորոշումը, Ռուստամյանը պատասխանել է, որ այդ հարցը ՀՅԴ-ն բարձրացրել է ներսում՝ ելնելով էթիկայի սկզբունքներից:

Հոկտեմբերի 2-ին՝ ԱԺ կանոնակարգ օրենքի վիճահարույց փոփոխության շուրջ իրադարձություններից հետո, Ռուստամյանը կրկին խոսեց վարչապետի լիազորությունների մասին՝ այս անգամ օգտագործելով, իր իսկ կողմից մերժված, «սուպերվարչապետ» եզրույթը։

«Հայաստանի սուպերվարչապետական համակարգը պետք է փոխարինվի վարչապետական համակարգով, որն իրենից ենթադրում է առնվազն ոստիկանության վերաենթակայեցում Կառավարությանը, իսկ այդ փոփոխությամբ նաև Ազգային ժողովը կկարողանա վերահսկողություն իրականացնել ոստիկանության վրա»,- հայտարարեց նա՝ Փաշինյանի կառավարությունից ՀՅԴ-ի դուրս գալուց հետո։

Հովհաննես Նազարեթյան

 

ՈՒՇԱԴՐՈՒԹՅՈՒՆ

Հարգելի՛ ընթերցող, տեղեկացնում ենք, որ SUT.am–ը շուտով հանդես է գալու նոր՝ «Փաստերի ստուգման հարթակ» անունով և FIP.am կայքով։