Ավագանու խմբակցությունները ստանում են մեկական ծառայողական մեքենա

Սեպտեմբերին տեղի ունեցած Երևանի ավագանու արտահերթ ընտրություններում երկրորդ տեղը զբաղեցրած և 5 մանդատ ստացած «Բարգավաճ Հայաստան» կուսակցության ներկայացուցիչները  այսօր մամուլի ասուլիս էին հրավիրել, որում անդրադարձան Երևանի բյուջետային միջոցներին, ծախսերի օպտիմալացմանն ու ճիշտ բաշխմանը։

ԲՀԿ անդամները նշեցին, որ ներկայացված են լինելու բոլոր հանձնաժողովներում՝ առկա խնդիրների ամենաարդյունավետ լուծումը ստանալու համար, ինչպես նաև աշխատելու են հարկային և լիցենզիոն բեռները իջեցնել։

Ուշագրավ էր կուսակցության ավագանու ցուցակում 3-րդ տեղը զբաղեցնող Արման Աբովյանի հետևյալ հայտարարությունը՝ կապված բյուջետային ծախսերը ճիշտ տնօրինելու հետ․

«Ինչպես ասում են, եթե ինչ-որ բան ենք անում, պետք է սկսենք առաջին հերթին մեզանից [․․․] Երևանի «ԲՀԿ» խմբակցությունը՝ հանձինս ինձ՝ ԲՀԿ խմբակցության ղեկավարի, հրաժարվում  ենք մեր ծառայողական մեքենայից [․․․] և բոլոր ծախսերից՝ մեքենայի հետ կապված»,- նշեց Աբովյանը։

Մամուլում, սակայն, այս հայտարարությունը տարընթերցման առիթ հանդիսացավ՝ վերջինիս ոչ միանշանակ մեկնաբանության պատճառով։ Օրինակ, «Հրաժարվում ենք ծառայողական մեքենաներից. ավագանու ԲՀԿ խմբակցության անդամ (տեսանյութ)» վերնագրից տպավորություն է ստեղծվում, որ դրանց թիվը անցնում է մեկից։

Իրականում, սակայն, ավագանիում ծառայողական մեքենաներ ստանում են ոչ թե անհատները, այլ խմբակցությունները, յուրաքանչյուր խմբակցության՝ մեկ ավտոմեքենա։ Հետևաբար, սեպտեմբերին կայացած արտահերթ ընտրությունների արդյունքում ձևավորված ավագանիում ծառայողական ավտոմեքենաների թիվը լինելու է 3-ը՝ համապատասխան ավագանու կազմում ընդգրկված «Իմ քայլը», «Բարգավաճ Հայաստան» և «Լույս» խմբակցություններին։

Կարինե Կիրակոսյան