Sputnik Արմենիան «կեղծում է» Մոլդովայի ընտրությունները․ մանիպուլյացիա՝ քվեների արդյունքների վերաբերյալ

Sputnik Արմենիան, որը ֆինանսավորվում է ռուսական կառավարության կողմից, անդրադառնալով Մոլդովայում սեպտեմբերի 28-ին անցկացված խորհրդարանական ընտրությունների արդյունքներին, պնդել է, թե ռուսամետ «Հայրենասիրական բլոկ» (Blocul Patriotic) ուժը երկրի ներսում (մոլդովական սփյուռքի քվեները չհաշված,-խմբ․) հաղթել է ընտրությունները։ 

Նախորդ կիրակի երկրում անցկացված խորհրդարանական ընտրությունների նախնական արդյունքներով, հաղթել է Մոլդովայի նախագահ Մայա Սանդուի գլխավորած ուժը՝ «Գործողություններ և համերաշխություն» (PAS)՝ ստանալով ձայների 50․1%-ը։ Խորհրդարան է մտել անցողիկ շեմը հաղթահարած ևս 4 ուժ։ 

«Մոլդովայի ընդդիմությունը՝ ի դեմս «Հայրենասիրական բլոկի», երկրի ներսում հավաքել է 49,54% ձայն՝ առաջ Մոլդովայի նախագահ Մայա Սանդուի գլխավորած «Գործողություն և համերաշխություն» (PAS) կուսակցությունից, որը ստացել է 44,13%», — գրել է Sputnik Արմենիան։

«Փաստերի ստուգման հարթակի» ուսումնասիրությունը ցույց է տալիս, որ այս տեղեկությունը չի համապատասխանում իրականությանը, մասնավորապես, Մոլդովայի կենտրոնական ընտրական հանձնաժողովի կայքի համաձայն՝ միայն Մոլդովայի ներսում վերոհիշյալ ուժը՝ «Հայրենասիրական բլոկը» (Blocul Patriotic), հավաքել է ընդամենը 28․25%, մինչդեռ PAS-ը հավաքել է ձայների 44․13%-ը։ 

Նշենք, որ Sputnik Արմենիայի վկայակոչած 49,54% թիվը արտացոլում է միայն Մոլդովայի ներսում ստացած քվեների արդյունքում անցողիկ շեմը հաղթահարած բոլոր ոչ իշխանական ուժերի ընդհանուր տոկոսները։ 

Այնուհետև լրատվամիջոցը գրում է, թե Մոլդովայի նախագահ Մայա Սանդուի գլխավորած ուժը «արտերկրում տրված ձայների շնորհիվ, հավաքել է 49,85%»։ 

Սա ևս չթարմացված տվյալ է․ PAS-ը հավաքել է ընդհանուր՝ թե՛ Սփյուռքի, և թե՛ Մոլդովայի ձայների 50,16%-ը։ Նշենք, որ թիվը վերջնական չէ, քանի որ դեռևս չեն ամփոփվել երկու ընտրատեղամասերի արդյունքները։ 

Սփյուռքից ստացված քվեների արդյունքների համաձայն՝ Սանդուի ուժը հավաքել է 78․5%: 

Այսպիսով, Sputnik Արմենիայի պնդումը, թե միայն Մոլդովայի ներսում «Հայրենասիրական բլոկը» ստացած ձայներով առաջ է անցել իշխող ուժին, չի համապատասխանում իրականությանը։ 

Միևնույն ժամանակ, լրատվամիջոցը խորհրդարան անցած ընդդիմադիր 4 ուժերի՝ միայն Մոլդովայի ներսում հավաքած ձայները համադրելով իշխող ուժի ձայների հետ՝  ընտրությունների արդյունքների ոչ ամբողջական և մանիպուլյատիվ պատկեր է ստեղծում։ 

Նանե Մանասյան