Վաղարշապատի 14/5 ընտրատեղամասում լցոնումների պնդումը կեղծ է. ինչ են փաստում ուղիղ հեռարձակումն ու օրենքը․ տեսանյութ

TikTok սոցիալական ցանցում հրապարակված տեսանյութում պնդում է արվում, թե Վաղարշապատի թիվ 14/5 ընտրատեղամասում քվեաթերթիկներ են «լցոնել քվեատուփի մեջ»։ 

Տեսանյութի հեղինակը նման պնդում անելիս հիմնվում է ընտրատեղամասի հանձնաժողովի նախագահի՝ քվեատուփի ճեղքի վրա ամրացված կարմիր թելը քաշելով հանելու գործողության վրա՝ այն մկրատով կտրելու փոխարեն։ 

Հեղինակը պնդում է՝ կարմիր թելը կապված չէր, ինչը նշանակում է, որ քվեատուփը բաց է եղել, և լցոնում է արվել։ 

«Փաստերի ստուգման հարթակն» ուսումնասիրել է նշված ընտրատեղամասի ուղիղ հեռարձակումն ու ընտրական օրենսդրությունը և պարզել, որ պնդումը կեղծ է։

Ինչ է ասում օրենքը քվեատուփը բացել/փակելու վերաբերյալ

ՀՀ ընտրական օրենսգրքի 68-րդ հոդվածը սահմանում է, որ հանձնաժողովի նախագահը միայն փակում է քվեատուփի ճեղքը, խոսք չկա թել անցկացնելու կամ թելը կապելու մասին։

Փաստացի, ըստ օրենքի՝ հանձնաժողովի նախագահը պարտավոր է միայն փակել քվեատուփի ճեղքը, ոչ ավելին։ Հետևաբար, տեսանյութում հանձնաժողովի նախագահի արարքը ընտրախախտում չէ, իսկ քվեատուփի ճեղքի չկապված թելը լցոնումների պնդման հիմք չէ։

Ուղիղ հեռարձակումը փաստում է՝ լցոնում չի եղել

Վաղարշապատի թիվ 14/5 ընտրատեղամասից ուղիղ հեռարձակում է ապահովվել նոյեմբերի 15-ից՝ ընտրությունների նախորդ օրվանից, մինչև քվեարկության ամփոփման ու ընտրական հանձնաժողովի աշխատանքի ավարտը։ 

Փաստացի, ընտրատեղամասի քվեատուփն ամբողջ գործընթացի ընթացքում եղել է տեսախցիկների հսկողության ներքո, որոնք լցոնումներ չեն արձանագրել։ 

Միևնույն ժամանակ, տեսանյութում քվեարկության ավարտին (ժամը 20:00-ից սկսած) հաջորդած դրվագներում (ուղիղ հեռարձակման 33-րդ ժամից սկսած) հստակ երևում է հանձնաժողովի նախագահի՝ քվեատուփի ճեղքը փակելու գործողությունը։ Այդ պահից մինչև նախագահի կողմից քվեատուփի բացելը որևէ կասկածելի գործողություն չի արձանագրվել։

Տեսանյութը՝ Կենտրոնական ընտրական հանձնաժողովի հեռարձակումից։

Այսպիսով, տեսանյութում առկա պնդումը, թե լցոնումներ են եղել 14/5 ընտրատեղամասում,  փաստազուրկ է երկու պատճառով՝ նախ ՀՀ ընտրական օրենսգիրքը լցոնումների համար հիմք չի ստեղծում, և բացի այդ, ընտրատեղամասն ամբողջությամբ տեսագրվում է, տարածքում ցանկացած շարժ վայրկյաններով արձանագրվում է։

Նանե Մանասյան