Յուրաքանչյուր հյուրին՝ 114 հազար դրամի սնունդ․ Երևանի քաղաքապետարանի խոշոր գնումը

Դեկտեմբերի սկզբին ֆրանսիացի ճարտարապետ Ժան-Միշել Վիլմոտի Երևան այցելությունը թանկ է նստել Երևանի քաղաքապետարանի վրա․ քաղաքային իշխանությունները ֆրանսիացի ճարտարապետի ու նրա հետ եկած մյուս հյուրերի հյուրասիրության համար ծախսել են 1,6 մլն դրամ։ 

«Փաստերի ստուգման հարթակն» ուսումնասիրել է նշված պայմանագիրը և պարզել, որ Երևանի քաղաքապետարանը դեկտեմբերի 4-ին ֆրանսիացի ճարտարապետ Ժան-Միշել Վիլմոտի՝ Երևան այցի շրջանակներում մինչև 14 անձի համար հյուրասիրություն էր կազմակերպել։ Ծառայության մատուցման պայմանագիրը կնքվել է «Դափնի Գրուպ» ՍՊԸ-ի հետ, բայց միջոցառումից 5 օր անց՝ դեկտեմբերի 9-ին։

Ծառայությունը իրենից ենթադրել է «բարձր սպասարկում», նախուտեստներ, աղցաններ, 2 տաք կերակրատեսակ, հաց, աղանդեր, տարբեր տեսակի ըմպելիքներ։ Պայմանագրի ընդհանուր գինը կազմել է 1,6 մլն դրամ։ Հյուրասիրությանը մասնակցել է 14 անձ, այսինքն՝ յուրաքանչյուրի համար ընդհանուր հաշվարկով ծախսվել է 114 հազար դրամ։ 

Ֆրանսիացի ճարտարապետ Ժան-Միշել Վիլմոտը Երևան էր այցելել «Կասկադ» համալիրի վերակառուցման նախագծի իրականացման մեկնարկի շրջանակներում։ Հիշեցնենք՝ Երևանի քաղաքապետարանի և «Ջի Թի Բի դիվելոփմենթ» ՍՊԸ-ի միջև ստորագրվել է «Կասկադ» համալիրի անավարտ հատվածի վերակառուցման՝ «Կասկադ մշակութային հանգույց» նախագծի իրականացման պայմանագիրը։ Նոր կառուցվող հատվածում տեղակայված կլինի 1000 տեղանոց համերգասրահ, ժամանակակից արվեստի թանգարան՝ հագեցած նոր ցուցասրահներով։  Կձևավորվի մշակութային և ժամանցային նոր հանգույց՝ մոտավորապես 30 հազար քմ-ից ավելի տարածքով։ 

Ճարտարապետ Ջիմ Թորոսյանի հեղինակած լավագույն կառույցներից մեկի՝ «Կասկադ» համալիրի վերակառուցման էսքիզային առաջարկը ներկայացրել էր ճարտարապետ Ժան-Միշել Վիլմոտը, որը էսքիզի հեղինակն է: