Նիկոլ Փաշինյանն այսօր՝ նոյեմբերի 20-ին, կառավարությունում տեղի ունեցած մամուլի ասուլիսի սկզբում անդրադարձավ ժամանակավոր կառավարության իրականացրած պարտավորություններին և նշեց, որ հետհեղափոխական կառավարությունը կատարել է բոլոր այն պարտավորությունները, որ ստանձնել էր ժողովրդի առաջ՝ Սերժ Սարգսյանի թիմի հեռացում, ընտրությունների կեղծման պրակտիկայի վերացում, կոռուպցիայի դեմ պայքար, մենաշնորհների վերացում, օրենքի առաջ բոլորի հավասարություն և արտոնյալ անձանց հեռացում, ինչպես նաև արտահերթ խորհրդարանական ընտրությունների իրականացում։
Պետք է նշենք, սակայն, որ Նիկոլ Փաշինյանի հետհեղափոխական կառավարությունը բաց է թողել մի քանի կետեր, որոնց իրականացումը կարևոր և առաջնային քայլեր էին համարվում հեղափոխության ընթացքում։ Դրանցից է, մասնավորապես, ընտրությունների անցկացումը նոր Ընտրական օրենսգրքով։
Հեղափոխության ընթացքում Նիկոլ Փաշինյանը բազմիցս անդրադարձել է արտահերթ խորհրդարանական ընտրությունների անցկացմանը՝ դրա կարևոր նախապայման համարելով Ընտրական օրենսգրքի փոփոխությունները․
«Ես կարծում եմ, որ մինչև ազատ արդար ընտրություններ անցակացնելը պետք է լրջագույն փոփոխությունների ենթարկել ընտրական օրենսգիրքը, և ընդհանրապես օրենսդրական դաշտում փոփոխություններ պետք է անել, և դա այնպես պետք է անել, որ հապճեպ ոտքի վրա արված փոփոխություններ չլինեն, որ մեծ պրոբլեմներ չառաջացնեն»,- հայտարարել էր Փաշինյանը մինչև վարչապետ ընտրվելը։
Հանրահավաքներից մեկի ընթացքում էլ, խոսելով իրենց ճանապարհային քարտեզի մասին, Փաշինյանը նշել էր․ «Մաքսիմալ արագ օրենսդրական փոփոխություններով, Ընտրական օրենսգրքի, կուսակցությունների մասին օրենքի փոփխություններով ստեղծվում են նաև օրենսդական երաշխիքեր, որ կարող են առաջիկայում տեղի ունենալ արտահերթ, ազատ, արդար խորհրդարանական ընտրություններ»։
Իսկ արդեն որպես վարչապետ՝ Փաշինյանի ներկայացրած կառավարարության ծրագրի երկրորդ կետը վերաբերում էր արտահերթ խորհրդարանական ընտրություններին, որտեղ, մասնավորապես, գրված է․ «․․․ կառավարությունը կարևորում է այնպիսի արտահերթ խորհրդարանական ընտրությունների անցկացումը, որը կլինի իրապես ազատ, արդար, թափանցիկ, ժողովրդավարական… փոփոխություններով անհրաժեշտ է՝ հրաժարվել ռեյտինգային ընտրական համակարգից և անցնել լիարժեք համամասնական համակարգի, ձևավորել նոր՝ իրական պատկերն արտացոլող ընտրական ցուցակներ… իրականացնել Ընտրական օրենսգրքի՝ ընտրողների ազատ կամարտահայտումը երաշխավորող այլ փոփոխություններ»։
Այդ նպատակն իրագործելու համար կառավարությունում ստեղծվել էր վարչապետին կից՝ Ընտրական օրենսգրքի բարեփոխումների հանձնաժողով: Սակայն, թեև գործադիրը հավանություն էր տվել հանձնաժողովի ներկայացրած փաթեթին, Ազգային Ժողովն այն տապալել էր։
Այսպիսով, փաստացի, դեկտեմբերի 9-ին կայանալիք ընտրություններն անցկացվելու են չփոփոխված Ընտրական օրենսգրքով։ Վարչապետի այն հայտարարությունը, թե կատարել են ժողովրդի առաջ ստանձնած բոլոր պարտավորությունները՝ առանց բացառության, մասնակի է համապատասխանում իրականությանը։
Այսօրվա ասուլիսում, սակայն, խոսելով առաջիկա ընտրությունների և տապալված ԸՕ-ի մասին, Փաշինյանը հայտարարեց, որ ինքը պարտավորություն է ստանձնել իրականացնել արտահերթ խորհրդարանական ընտրություններ, ինչը և անում է, իսկ թե ո՞ր Ընտրական օրենսգրքով՝ չի նշվել: «Մենք հանրապետության հրապարակում չենք քննարկել, թե Ընտրական օրենսգրքի ինչ տարբերակով դա պետք է տեղի ունենա, և եթե նույնիսկ քննարկած լինեինք, խորհրդարանական ուժերի քվեարկության արդյունքում պետք է որևէ օրենք անցնի, և ամեն ինչ տեղի է ունեցել ձեր աչքի առաջ։ Կառավարությունը ամեն ինչ արել է թույլատրելի սահմաններում, որ այդ օրենսգիրքը ընդունվի»,- մասնավորապես, ասել է Փաշինյանը:
Կարինե Կիրակոսյան
