Ովքեր են պայքարում Արտաշատում, Արմավիրում ու Գավառում․ ընտրացուցակները՝ թվերով

2026 թվականի հոկտեմբերի 25-ին, ի թիվս այլ համայնքների, ՏԻՄ համամասնական ընտրություններ կանցկացվեն նաև Հայաստանի վեց մարզկենտրոն ներառող համայնքներում՝  Հրազդանում, Եղեգնաձորում, Իջևանում, Արտաշատում, Արմավիրում և Գավառում։

«Փաստերի ստուգման հարթակն» ուսումնասիրել և քարտեզագրել է այս համայնքներում ընտրություններին մասնակցող քաղաքական ուժերի ընտրացուցակները՝ ըստ թեկնածուների սեռի, տարիքի, կուսակցական պատկանելության և զբաղմունքի։ 

Այս հոդվածում  ներկայացնում ենք  Արտաշատի, Արմավիրի ու Գավառի ընտրացուցակների տվյալները։

Ովքեր են պայքարում Հրազդանում, Եղեգնաձորում և Իջևանում․ ընտրացուցակները՝ թվերով

Արտաշատ․ ՔՊ-ն՝ պետական և համայնքային համակարգի աշխատողներով, «Նոր դարաշրջանն» ու ՀՅԴ-ն՝ չաշխատողներով

«Նոր դարաշրջան» կուսակցության նախընտրական ցուցակում ընդգրկված է 21 թեկնածու։

Ըստ ներկայացված տվյալների՝ բոլոր 21 թեկնածուներն էլ չեն աշխատում։  

Ցուցակում ընդգրկված է 7 կին և 14 տղամարդ, որոնք կազմում են ցուցակի համապատասխանաբար 33.3%-ը և 66.7%-ը։

16 թեկնածու՝ 76.2%-ը, «Նոր դարաշրջան» կուսակցության անդամ է, երեքը՝ 14.3%-ը, «Ուժեղ Հայաստան» կուսակցության անդամ, իսկ երկուսը՝ 9.5%-ը, անկուսակցական։

Տարիքային կազմով 45–59 և 60 ու բարձր տարիքային խմբերում ընդգրկված է 7-ական թեկնածու՝ յուրաքանչյուրում ցուցակի 33.3%-ը։ Չորս թեկնածու ընդգրկված է 30–44, երեքը՝ 18–29 տարիքային խմբում։ Ցուցակի ամենաերիտասարդ անդամը 23, ամենատարեցը՝ 65 տարեկան է։

«Հայ Յեղափոխական Դաշնակցություն» կուսակցության նախընտրական ցուցակում ընդգրկված է 32 թեկնածու։

Ըստ ներկայացված զբաղվածության տվյալների՝ 27 թեկնածու՝ ցուցակի 84.4%-ը, չի աշխատում։ Աշխատավայր կամ զբաղմունք նշված է հինգ թեկնածուի համար՝ 15.6%։ 

ՀՅԴ-ի ցուցակում ընդգրկված է 11 կին և 21 տղամարդ, որոնք կազմում են ցուցակի համապատասխանաբար 34.4%-ը և 65.6%-ը։

23 թեկնածու՝ 71.9%-ը, ՀՅԴ անդամ է, 9-ը՝ 28.1%-ը, անկուսակցական։

Տարիքային կազմով ամենամեծ խումբը 30–44 տարեկաններն են՝ 13 թեկնածու կամ ցուցակի 40.6%-ը։ Ութ թեկնածու ընդգրկված է 45–59 տարիքային խմբում՝ 25.0%, յոթը՝ 60 և բարձր՝ 21.9%, չորսը՝ 18–29 տարիքային խմբում՝ 12.5%։ Ցուցակի ամենաերիտասարդ անդամը 20, ամենատարեցը՝ 67 տարեկան է։

«Քաղաքացիական պայմանագիր» կուսակցության նախընտրական ցուցակում ընդգրկված է 99 թեկնածու։

Ըստ ներկայացված տվյալների՝ 91 թեկնածու՝ ցուցակի 91.9%-ը, աշխատում է, իսկ 8-ը՝ 8.1%-ը, չի աշխատում։ Ըստ նշված աշխատավայրերի՝ 79 թեկնածու՝ ցուցակի 79.8%-ը, աշխատում է պետական կամ համայնքային մարմիններում, դրանց ենթակայության կազմակերպություններում։

ՔՊ-ի ցուցակում ընդգրկված է 33 կին և 66 տղամարդ, որոնք կազմում են ցուցակի համապատասխանաբար 33.3%-ը և 66.7%-ը։

Կուսակցական պատկանելությամբ՝ 79 թեկնածու՝ 79.8%-ը, ՔՊ անդամ է, իսկ 20-ը՝ 20.2%-ը, անկուսակցական։

Տարիքային կազմով ամենամեծ խումբը 30–44 տարեկաններն են՝ 56 թեկնածու կամ ցուցակի 56.6%-ը։ 45–59 տարիքային խմբում ընդգրկված է 23 թեկնածու՝ 23.2%, 60 և բարձր տարիքային խմբում՝ 12-ը՝ 12.1%, իսկ 18–29 տարեկանների խմբում՝ ութ թեկնածու՝ 8.1%։ Ցուցակի ամենաերիտասարդ անդամը 24, ամենատարեցը՝ 71 տարեկան է։

Արմավիր․ ընտրապայքարում միայն ՔՊ-ն է 

«Քաղաքացիական պայմանագիր» կուսակցության նախընտրական ցուցակում ընդգրկված է 67 թեկնածու։

Ըստ ներկայացված տվյալների՝ 62 թեկնածու՝ ցուցակի 92.5%-ը, աշխատում է, իսկ 5-ը՝ 7.5%-ը, չի աշխատում։ Ըստ նշված աշխատավայրերի՝ 43 թեկնածու՝ ցուցակի 64.2%-ը, աշխատում է պետական կամ համայնքային մարմիններում և դրանց ենթակայության կազմակերպություններում։

ՔՊ-ի ցուցակում ընդգրկված է 22 կին և 45 տղամարդ, որոնք կազմում են ցուցակի համապատասխանաբար 32.8%-ը և 67.2%-ը։

Կուսակցական պատկանելությամբ՝ 60 թեկնածու՝ 89.6%-ը, ՔՊ անդամ է, իսկ յոթը՝ 10.4%-ը, անկուսակցական։

Տարիքային կազմով ամենամեծ խումբը 30–44 տարեկաններն են՝ 35 թեկնածու կամ ցուցակի 52.2%-ը։ 45–59 տարիքային խմբում ընդգրկված է 21 թեկնածու՝ 31.3%, 60 և բարձր տարիքային խմբում՝ վեցը՝ 9.0%, իսկ 18–29 տարեկանների խմբում՝ հինգ թեկնածու՝ 7.5%։ Ցուցակի ամենաերիտասարդ թեկնածուն 22, ամենատարեցը՝ 68 տարեկան է։

Գավառ․ «Հայկական քվեն»՝ չաշխատողներով, «Ինքնիշխան Հայաստանը»՝ երիտասարդներով, «Համերաշխությունը»՝ խառը կուսակցական կազմով

Գավառում «Հայկական քվե» կուսակցության ցուցակում ընդգրկված է 14 թեկնածու։  Ըստ ներկայացված տվյալների՝ 12 թեկնածու՝ ցուցակի 85.7%-ը, չի աշխատում։ Աշխատավայր կամ զբաղմունք նշված է միայն երկու թեկնածուի համար՝ 14.3%։  Պետական կամ համայնքային մարմիններում և դրանց ենթակայության կազմակերպություններում աշխատողներ ցուցակում չկան։

Ցուցակում ընդգրկված է 4 կին և 10 տղամարդ, որոնք կազմում են համապատասխանաբար 28.6%-ը և 71.4%-ը։

Կուսակցական պատկանելությամբ՝ 10 թեկնածու՝ 71.4%-ը, «Հայկական քվե» կուսակցության անդամ է, իսկ 4-ը՝ 28.6%-ը, անկուսակցական։

Տարիքային կազմով ամենամեծ խումբը 30–44 տարեկաններն են՝ 9 թեկնածու կամ ցուցակի 64.3%-ը։ 18–29 և 45–59 տարիքային խմբերում ընդգրկված է երկուական թեկնածու՝ յուրաքանչյուրում 14.3%, իսկ 60 և բարձր տարիքային խմբում՝ մեկ թեկնածու՝ 7.1%։ Ցուցակի ամենաերիտասարդ թեկնածուն 19, ամենատարեցը՝ 60 տարեկան է։

«Համերաշխություն» կուսակցությունների դաշինքի նախընտրական ցուցակում ընդգրկված է 65 թեկնածու։

Ըստ ներկայացված տվյալների՝ 56 թեկնածու՝ ցուցակի 86.2%-ը, աշխատում է, 7 թեկնածու՝ 10.8%-ը, չի աշխատում, ևս 2 թեկնածու՝ 3.1%-ը, ուսանող է։Թվով 38 թեկնածու՝ ցուցակի 58.5%-ը, աշխատում է պետական կամ համայնքային մարմիններում և դրանց ենթակայության կազմակերպություններում։

Դաշինքի ցուցակում ընդգրկված է 23 կին և 42 տղամարդ, որոնք կազմում են ցուցակի համապատասխանաբար 35.4%-ը և 64.6%-ը։

Կուսակցական պատկանելությամբ՝ 34 թեկնածու՝ 52.3%-ը, «Գործարար» կուսակցության անդամ է, 21-ը՝ 32.3%-ը՝ ՔՊ անդամ, իսկ 10-ը՝ 15.4%-ը, անկուսակցական։

Տարիքային կազմով ամենամեծ խումբը 45–59 տարեկաններն են՝ 29 թեկնածու կամ ցուցակի 44.6%-ը։ 30–44 տարիքային խմբում ընդգրկված է 19 թեկնածու՝ 29.2%, 18–29 տարեկանների խմբում՝ ինը՝ 13.8%, իսկ 60 և բարձր տարիքային խմբում՝ ութ թեկնածու՝ 12.3%։ Ցուցակի ամենաերիտասարդ թեկնածուն 20, ամենատարեցը՝ 76 տարեկան է։

«Ինքնիշխան Հայաստան» կուսակցության նախընտրական ցուցակում ընդգրկված է 10 թեկնածու։

Ըստ ներկայացված տվյալների՝ 6 թեկնածու աշխատում է, 3-ը՝ չի աշխատում», իսկ 1-ը ուսանող է։

Ցուցակում ընդգրկված է 4 կին և 6 տղամարդ, որոնք կազմում են համապատասխանաբար 40%-ը և 60%-ը։

Կուսակցական պատկանելությամբ՝ 6 թեկնածու՝ 60%-ը, «Ինքնիշխան Հայաստան» կուսակցության անդամ է, իսկ չորսը՝ 40%-ը, անկուսակցական։

Տարիքային կազմով երկու խմբերը հավասար են․ 18–29 և 30–44 տարիքային խմբերում ընդգրկված է 5-ական թեկնածու՝ յուրաքանչյուրում ցուցակի 50%-ը։ 45 և բարձր տարիքային խմբերում թեկնածուներ չկան։ Ցուցակի ամենաերիտասարդ թեկնածուն 18, ամենատարեցը՝ 34 տարեկան է։

Այսպիսով, երեք համայնքների ընտրացուցակները տարբեր պատկեր են ցույց տալիս․ Արտաշատում ՔՊ-ն հիմնականում ներկայացված է պետական ու համայնքային համակարգում աշխատող թեկնածուներով, մինչդեռ «Նոր դարաշրջանի» և ՀՅԴ-ի ցուցակներում գերակշռում են չաշխատողները։ Արմավիրում ընտրություններին մասնակցում է միայն ՔՊ-ն․ այստեղ ևս ցուցակի մեծ մասը կապված է պետական ու համայնքային համակարգի հետ։

Գավառում իրավիճակը փոքր-ինչ այլ է․ «Հայկական քվեի» ցուցակում գերակշռում են չաշխատողները, «Ինքնիշխան Հայաստանի» ցուցակը կազմված է միայն երիտասարդ թեկնածուներից, իսկ «Համերաշխություն» դաշինքն առանձնանում է խառը կուսակցական կազմով՝ ներառելով «Գործարար» և ՔՊ անդամների, ինչպես նաև անկուսակցականների։

Գայանե Մարկոսյան