«Իմ քայլի» հաղթանակը բացարձակ էր, բայց ոչ ամեն տեղ

Չնայած «Իմ քայլը» դաշինքը խոշոր հաղթանակ է տարել Հայաստանի ամբողջ տարածքում, որոշ ընտրատարածքներում, այնուամենայնիվ, նրան լուրջ մրցակցություն է ցույց տրվել այլ քաղաքական ուժերի կողմից:

Դեկտեմբերի 9-ին կայացած Ազգային ժողովի ընտրություններում, ինչպես և կանխատեսել էին բոլոր հարցումները և քաղաքական մեկնաբանները, Նիկոլ Փաշինյանի գլխավորած «Իմ քայլը» դաշինքը տարավ խոշոր հաղթանակ և յոթերորդ գումարման ԱԺ-ում կունենա բացարձակ մեծամասնություն՝ ԱԺ տեղերի ուղիղ ⅔-ը կամ՝ 88 տեղ: Երկրորդ տեղով անցած «Բարգավաճ Հայաստան» կուսակցությունը կունենա 26 տեղ, իսկ «Լուսավոր Հայաստանը»՝ 18։

«Իմ քայլը» դաշինքը հաղթանակ է տարել բոլոր մարզերում և գրեթե բոլոր բնակավայրերում, սակայն կան մի քանի բացառություններ։

Մասնավորապես, տոկոսային հարաբերակցությամբ ԲՀԿ-ն ամենաշատ ձայները ստացել է Կոտայքի մարզում՝ թիվ 10 ընտրատարածքում։ ԲՀԿ ղեկավար Գագիկ Ծառուկյանի հայրենի մարզում կուսակցությունը հավաքել է 16.5%, որը կրկնակի ավել է, քան երկրով մեկ հավաքած 8.3%-ը:

Ավելին, ըստ ընտրությունների արդյունքների, ԲՀԿ-ի աջակցության ցուցանիշը առավել բարձր է 28 և 29 տարածքային ընտրական հանձնաժողովների լիազորության տակ գտնվող տարածքներում, որոնք ընդգրկում են Կոտայքի մարզի հարավային մասը՝ Աբովյան և Բյուրեղավան քաղաքներն ու շրջակա գյուղերը։ Այս երկու տարածքներում ԲՀԿ-ն հավաքել է ձայների, համապատասխանաբար, 19.1 և 21.5 տոկոսը։ Իսկ ահա Ծառուկյանի ծննդավայր Առինջ գյուղում ԲՀԿ-ն ստացել է ձայների մեծամասնությունը՝ 66%-ը, իսկ «Իմ քայլը» դաշինքը՝ ընդամենը  26%-ը։

Բացի սա, «Բարգավաճ Հայաստանը» հաղթանակ է տարել նաև Արարատի մարզի Ազատաշեն գյուղում և Արագածոտնի մարզի Ճարճակիս գյուղում: Այս երկու բնակավայրերում էլ ԲՀԿ-ն ստացել է ընտրողների 72%-ի աջակցությունը։ Ազատաշենի համայնքապետը, նշենք, ԲՀԿ անդամ Սարգիս Ստեփանյանն է։

ՀՅԴ-ն, որը անցողիկ շեմը չի հաղթահարել, հաղթանակ է տարել Գեղարքունիքի մարզի Գեղամավան գյուղում՝ ստանալով ձայների 75%-ը՝ «Իմ քայլը» դաշինքի 21%-ի դիմաց։ Այս գյուղի համայնքապետն է Վաչիկ Սաղաթելյանը, որն անկուսակցական է, սակայն սերտ կապեր ունի Դաշնակցության հետ։ Համայնքապետի հայրը ՀՅԴ գերագույն մարմնի անդամ Իշխան Սաղաթելյանն է, որն այս տարվա ընթացքում Փաշինյանի կողմից նշանակվեց և հետո հեռացվեց Գեղարքունիքի մարզպետի պաշտոնից։

Դաշնակցությունը զգալի տոկոս է ստացել նաև Արագածոտնի մի քանի գյուղերում, որոնցից են, օրինակ, Կաթնաղբյուրը՝ 44%, Ոսկեթասը՝ 41%, Գեղաձորը՝ 35%, Հարթավանը՝ 35%, Իրինդը՝ 27%, Սուսերը՝ 27%, Կաքավաձորը՝ 20%, Ուջանը՝ 19%։ Առաջին երկուսում ՀՅԴ-ն չի ստացել ձայների բացարձակ մեծամասնությունը, բայց ստացել է ավելի շատ քվե, քան «Իմ քայլը» դաշինքը։ Այս գյուղերն ավանդաբար համարվել են «դաշնակցական», և որոշներում գործող համայնքապետերը ՀՅԴ անդամներ են, օրինակ՝ Կաթնաղբյուրի, Ուջանի, Կաքավաձորի գյուղապետերը։

Դաշնակցությունը ձայների քանակով երկրորդն է եղել նաև Սյունիքի Շուռնուխ գյուղում։ Այնտեղ «Իմ քայլը» ստացել է ընտրողների քվեների 44%-ը, իսկ ՀՅԴ-ն՝ 31%-ը։

Միակ բնակավայրը, որտեղ հաղթանակ է տարել երկու տասնամյակ երկիրը կառավարած Հանրապետական կուսակցությունը, Արարատի մարզի Լանջազատ գյուղն է։ Այստեղ ՀՀԿ-ն ստացել է քվեների 57%-ը, իսկ «Իմ քայլը» դաշինքը՝ 32%-ը: Սա կարող է բացատրվել նրանով, որ Լանջազատի գյուղապետ Հրայր Հակոբջանյանը ՀՀԿ ռեյտինգային թեկնածու է։

ՀՀԿ-ն ձայների զգալի մասին է արժանացել նաև Արարատի մարզի Նոյակերտ գյուղում՝ 30%՝ «Իմ քայլի» 61%-ի դիմաց և Լոռվա մարզի Ալավերդի քաղաքում։ Այնտեղ ՀՀԿ-ն ստացել է ձայների 15%-ը։ Հատկանշական է, որ ՀՀԿ ռեյտինգային թեկնածու Էդուարդ Շարմազանովի հայրենի Սանահին-Սարահարթ թաղամասում, որտեղ բնակվում է Ալավերդու բնակչության մոտ կեսը, ՀՀԿ-ն ստացել է 19%։

Նորաստեղծ «Քաղաքացու որոշում» սոցիալ-դեմոկրատական կուսակցությունն էլ բավական մեծ աջակցություն է ստացել Տավուշի մարզի Ենոքավան գյուղում՝ հավաքելով քվեների 29%-ը։ Սա, թերևս, կարելի է բացատրել նրանով, որ Ենոքավանում գտնվող Yell Extreme Park-ի սեփականատեր Տիգրան Չիբուխչյանը ՔՈ-ի աջակից է և, ըստ մամուլի հրապարակումների, ֆինանսապես աջակցել է կուսակցությանը։

Եվ վերջում նշենք, որ Սասուն Միքայելյանի հայրենի թաղամասում՝ Հրազդանի Վանատուրում, «Իմ քայլը» դաշինքը ստացել է ձայների 93%-ը:

Հովհաննես Նազարեթյան