Ասֆալտը ջրի մեջ Երևանում

Վերջին 1-2 ամիսների բնակլիմայական դաժան պայմանների արդյունքում Երևանի փողոցներում հայտնվեցին սարսափելի մեծ թվով փոսեր, ինչը, բնականաբար, սկսեց անհարմարություներ պատճառել մայրաքաղաքի բնակիչներին:

Օրերս քաղաքապետարանը սկսեց փոսերի ասֆալտապատման աշխատանքները, որոնց իրականացումը, սակայն, մեղմ ասած խնդրահարույց է:

Շինարարական նորմերով և կանոններով (այսպես կոչված СНИП-երով) նախատեսված են մի շարք կարգավորումներ:
Այդ թվում՝

— ասֆալտի տակ պետք է մազութային շերտ լցվի, որը կապահովի կպչունությունը,

— ասֆալտը չի կարելի փռել +15 ցելսիուսից ցածր ջերմաստիճաններում,

— ասֆալտը չի կարելի փռել անգամ խոնավ մակերևույթի վրա, քանի որ ասֆալտի մեջ առկա բիտումը լուծվում և կորցնում է իր հատկությունները ջրում:

Ասֆալտապատողները, սակայն, Երևանի քաղաքապետարանի պատվերով և հարկատուների վճարած գումարներով ոտնահարում են բոլոր այդ կանոները և հաճախ ասֆալտը փռում են հենց ջրով լի փոսի մեջ: Բնականաբար՝ առանց մազութի:

Առաջիկայում մենք կպարզենք, թե որքա՞ն գումար է ծախսվել համայնքային բյուջեից ասֆալտը ջրի մեջ գցելու համար:

Սակայն այժմ փաստենք, որ այդպես լցված ասֆալտը կարող է անպիտանի դառնալ անգամ մեկ գիշերում, քանի որ դրա տակ մնացած ջուրը սառույցի վերածվելիս հենց տակից կքանդի ասֆալտի շերտը: