Նիկոլ Փաշինյանի մանիպուլյատիվ ելույթը

Փետրվարի 14-ին Ազգային ժողովը եռօրյա քննարկումներից հետո հավանություն տվեց կառավարության գործունեության հնգամյա ծրագրին: Խորհրդարանում քվեարկությունից առաջ վարչապետ Նիկոլ Փաշինյանի ունեցած եզրափակիչ ելույթը բավականին էմոցիոնալ ստացվեց ու արժանացավ բուռն արձագանքի՝ թե՛ թիմակիցների և թե՛ հանրության լայն շրջանակների կողմից:

Փաշինյանի խոսքը, սակայն, բացի էմոցիոնալ լինելուց, հագեցած էր նաև անհիմն ու մանիպուլյատիվ թեզերով, որոնք ներկայացնում ենք ստորև։

Վարչապետն իր ելույթի մի բավականին մեծ հատված նվիրեց «Լուսավոր Հայաստան» խմբակցության պատգամավորների ելույթներին հակադարձելուն, որի ընթացքում, խեղաթյուրելով ընդդիմադիր խմբակցության ղեկավար Էդմոն Մարուքյանի խոսքերը, վերջինիս մեղադրեց Սերժ Սարգսյանին պաշտպանելու մեջ։

Մասնավորապես, Փաշինյանը, դիմելով Մարուքյանին, ասաց. «Ձեզ պարզ չի՞, թե Սերժ Սարգսյանն ինչով է մեղավոր: Մեղավոր է նրա համար, որ այո՛, ասում էր ամեն մարդ չի կարող բիզնես անել, ով կգա, կմուծվի, նա էլ բիզնես կանի: Որ եղբայրն ամեն տեղ 50 տոկոս փայ էր մտած, դրանում է մեղավոր»։

Իրականում, սակայն, Էդմոն Մարուքյանն իր ելույթում համաձայնել էր Փաշինյանի այն մտքի հետ, թե մարդկանց ուղեղներում պետք է կատարվի հեղափոխություն: Անդրադառնալով նախորդ նախագահների կառավարությունների օրոք ձևավորված համակարգին՝ Մարուքյանը նշել էր, որ ժողովուրդը չի դադարելու երկրի առաջնորդից պատասխանատվություն պահանջելուց, և երկրի առաջնորդի հայտարարությունն այն մասին, որ աղքատությունը ժողովրդի գլխում է, հարց է առաջացնելու, թե այդ դեպքում ինչո՞վ էին մեղավոր նախկին երեք նախագահները։ Փաշինյանի եզրափակիչ ելույթում այս միտքը կտրվել է համատեքստից՝ խեղաթյուրելով Մարուքյանի խոսքի տրամաբանությունը:

Ի դեպ, Փաշինյանի կողմից հնչեցված հակադարձումը խնդրահարույց է մեկ այլ կողմից ևս: Մասնավորապես, հայտարարությունն այն մասին, որ Սերժ Սարգսյանի եղբայրը «ամեն տեղ 50 տոկոս փայ էր մտած», ըստ էության, մեղադրանք է հանցագործության մեջ, որը մինչ այս չի հիմնավորվել, և չկա հարուցված քրեական գործ:

Շարունակելով ելույթը՝ Փաշինյանը «Լուսավոր Հայաստան» խմբակցությանը վերագրեց այն թեզը, թե հեղափոխություն տեղի չի ունեցել․ «Մեկ էլ ասում են՝ հեղափոխություն չի եղել: Բա որ հեղափոխություն չի եղել, դուք 18 հոգով ի՞նչ գործ ունեք այստեղ նստած»:

Հարկ է նշել, որ «Լուսավոր Հայաստան» խմբակցության ոչ մի պատգամավորի ելույթում չի հնչել այս թեզը: Ինքը՝ Մարուքյանը, բազմիցս խոսել է հեղափոխության և հեղափոխության արժեքների մասին: Ընդ որում, Մարուքյանի այդ հայտարարություններից մեկը հնչել է հենց կառավարության ծրագրի քննարկման ժամանակ, որտեղ, քննադատելով իշխանությունների կադրային քաղաքականությունը, Մարուքյանը նշել էր. «Տնտեսական բլոկում հին իշխանական կադրեր են, որոնք չեն հավատում, որ հնարավոր է ունենալ 5%-ից բարձր աճ, որովհետև չունեն այն երազանքը, որ պետք է ունենան հեղափոխականները»:

Թերևս, հենց այս միտքն է, որ խեղաթյուրվել և ներկայացվել է որպես պնդում, թե հեղափոխություն տեղի չի ունեցել: