Ո՞ր դեսպաններն են նախկինում հրաժարվել պետական աշխատավարձերից

Կառավարության ապրիլի 25-ի նիստում որոշվեց հավանության արժանացնել ԱԳՆ նախարարի կողմից ներկայացված նախագիծը, որով առաջարկվում է ԱԳ նախարարությանը հատկացնել ավելի քան 347 մլն դրամ։ Համաձայն որոշման հիմնավորման, գումարի տրամադրումը պայմանավորված է այն հանգամանքով, որ նախկինում արտերկրում մի շարք ՀՀ դիվանագիտական ներկայացուցչությունների ղեկավարների պաշտոնում կատարվել են այնպիսի անձանց նշանակումներ, որոնք ԱԳՆ համակարգից չէին, և այդ անձինք հրաժարվել էին աշխատավարձերից, բժշկական ապահովագրություններից, որոշներն էլ հոգացել էին հյուպատոսարանների անձնակազմի բժշկական ապահովագրության ծախսերը։ Իսկ 2018 թվականի մայիսից, ԱԳՆ որդեգրած քաղաքականության շրջանակում, դեսպանները նշանակվում են ԱԳՆ համակարգից, ըստ այդմ՝ առաջացել է վերոնշյալ ծախսերի հատվածը ՀՀ պետական բյուջեից ապահովելու անհրաժեշտությունը:

Ըստ ԱԳՆ ներկայացրած որոշման նախագծի, նշված դիվանագիտական և հյուպատոսական ներկայացուցչությունները գտնվում են Վատիկանում, Լոնդոնում, Լիոնում, Լոս Անջելեսում և Ժնևում։

Տեսնենք, թե ովքեր են եղել այդ դեսպաններն ու հյուպատոսները։

Ըստ այդմ՝ Վատիկանում ՀՀ դեսպանը Միքայել Մինասյանն էր, որը ՀՀ երրորդ նախագահ Սերժ Սարգսյանի փեսան է։ Նա հետ է կանչվել այդ պաշտոնից 2018 թվականի նոյեմբերին։

Լոնդոնում արտակարգ և լիազոր դեսպանի պաշտոնում հանդես է եկել ՀՀ ներկայիս  նախագահ Արմեն Սարգսյանը։ Նա մինչև 2018 թվականը զբաղեցրել է այդ պաշտոնը, իսկ 2018 թվականի մարտի 2-ին ՀՀ Ազգային Ժողովի կողմից ընտրվել է Հայաստանի Հանրապետության նախագահ: Նրան դեսպանի պաշտոնում փոխարինում է Արմեն Կիրակոսյանը։

Լոս Անջելեսում ՀՀ գլխավոր հյուպատոս է եղել Սերգեյ Սարկիսովը։ Նա Ռուսաստանի քաղաքացի է, հայերենին չի տիրապետում, գործարար է, հանդիսանում է «РЕСО-Гарантия» ընկերության նախագահը։ Ըստ Forbes հեղինակավոր ամսագրի, Սարկիսովը Ռուսաստանի ամենահարուստ մարդկանց ցուցակում 96-րդն է։

Իր պաշտոնավարման ժամանակ Սարկիսովն իր վրա էր վերցրել նաև Գլխավոր հյուպատոսության անձնակազմի պարտադիր ապահովագրական ծախսերը։  2018 թվականի սեպտեմբերի 6-ից Սարկիսովին այդ պաշտոնում փոխարինում է Արմեն Բարբուդյանը։

Հետաքրքիր է, որ Լիոնում ՀՀ հյուպատոսի պաշտոնը զբաղեցնում է Սերգեյ Սարկիսովի եղբայրը՝ Նիկոլայ Սարկիսովը։ Նա շարունակում է զբաղեցնել Լիոնում Հայաստանի գլխավոր հյուպատոսի պաշտոնը։ Նիկոլայ Սարկիսովը «РЕСО-Гарантия» ընկերության փոխնախագահն է։

Ժնևում՝ Շվեյցարիայի Համադաշնությունում, ՀՀ արտակարգ և լիազոր դեսպանի պաշտոնը զբաղեցրել է ֆրանսահայ շանսոնյե Շառլ Անզնավուրը։ Նրա մահից հետո Ժնևում դեսպան դեռևս չի նշանակվել։