ՓԱՍՏԱՉԱՓ
Խոշորացույց
Թիվ-թվանք
Տեսանյութեր
հյ
en
ру
Հայաստանի Հանրապետական կուսակցության 2012 թվականի նախընտրական ծրագրում առկա են բազում չիրականացված խոստումներ։ Դրանց մի մասը վերաբերում է գյուղատնտեսության զարգացմանը։
Մասնավորապես, Հանրապետականը խոստացել է, հստակ քայլեր կատարելով, գրավիչ դարձնել գյուղատնտեսությամբ զբաղվելը, որի արդյունքում ջերմոցային տնտեսության տարածքները պետք է ավելանային 3 անգամ և ստեղծվեր շուրջ 30 հազար աշխատատեղ։
Մեր հարցմանն ի պատասխան գյուղատնտեսության նախարարությունից հայտնեցին, որ 2012 թվականին հանրապետությունում ջերմոցային տնտեսության ընդհանուր տարածքը կազմել է 614 հեկտար, իսկ 2016 թվականին 1220․8 հա, այնինչ խոստման համաձայն այդ ցուցանիշը պետք է գերազանցեր 1800 հեկտարը։
Նմանատիպ պատկեր է նաև խոստացված աշխատատեղերի պարագայում։ Գյուղատնտեսության նախարարությունից ստացված նույն գրության համաձայն՝ այսօր ջերմոցներում աշխատում է շուրջ 10-12 հազար մարդ, որոնց գերակշիռ մասը ջերմատների սեփականատերերն են և նրանց ընտանիքի անդամները, այնինչ այդ թիվը պետք է կազմեր 30 հազար։
Հիշեցնենք, որ սա առաջին կիսով չափ չիրականացված խոստումը չէ, ավելի վաղ ներկայացրել էինք Սերժ Սարգսյանի 2008թ․-ի նախագահական ընտությունների քարոզարշավին տրված և մինչ այսօր չիրականացած տնտեսության կարևոր կետերի մասին խոստումները։
