Լևոն Տեր-Պետրոսյանի դիրքորոշման փոփոխությունը Արցախյան կարգավորման շուրջ

Մարտի 21-ին Հայաստանի հանրային հեռուստաընկերության «Օրակարգից դուրս» հաղորդման հյուրն էր ՀՀ առաջին նախագահ Լևոն Տեր-Պետրոսյանը։ Հաղորդման ընթացքում առաջին նախագահը ներկայացրեց իր և «Կոնգրես-ՀԺԿ» դաշինքի տեսակետը Արցախյան կարգավորման շուրջ։

Անդրադառնալով կարգավորման ծրագրին, առաջին նախագահը, մասնավորապես, խոսեց Արցախի հարակից շրջանների Ադրբեջանին հանձնման անհրաժեշտության մասին՝ ասելով, որ դա նախատեսվում է անել առաջին փուլում: Միևնույն ժամանակ, սակայն, Լևոն Տեր-Պետրոսյանը չպատասխանեց լրագրողի հարցին, թե ինչ երաշխիք կա, որ դրան հաջորդող փուլերում և բանակցությունների ընթացքում Ադրբեջանը չի հրաժարվի իր ստանձնած պարտավորություններից և կճանաչի Արցախի անկախությունը։

Տեր-Պետրոսյանը հարցազրույցի ընթացքում ասաց, որ այսօր բանակցությունները տարվում են Մադրիդյան սկզբունքների հիման վրա՝ նշելով, որ դրանցից բացի որևէ այլ լուծում Ղարաբաղյան հարցի համար գոյություն չունի։

«Միջազգային հանրության առաջարկած ծրագիրը նորմալ, ըստ էության, բալանսավորված ծրագիր է, և եթե Հայաստանը վճռականորեն հայտարարի, որ պատրաստ է հենց այսօր ստորագրել այդ փասթաթուղթը՝ Ադրբեջանը չի կարող մերժել», — ասաց Տեր-Պետրոսյանը։

Չնայած վերջինիս այս պնդումներին, տարիներ առաջ առաջին նախագահը բոլորովին այլ տեսակետ ուներ և հրապարակավ քննադատում էր ինչպես Մադրիդյան սկզբունքները, այնպես էլ դրանց շուրջ բանակցող այսօրվա իշխանություններին։

Մասնավորապես, 2012 թվականի խորհրդարանական ընտրությունների քարոզարշավի ժամանակ Տեր-Պետրոսյանը բազմիցս հայտարարել է, որ Մադրիդյան սկզբունքների հիմքում ընկած է Ադրբեջանի կազմում Ղարաբաղին ավտոնոմ կարգավիճակ տալու ծրագիրը։

Մեղադրելով իշխանություններին և անձամբ Սերժ Սարգսյանին՝ Տեր-Պետրոսյանը հիշեցրել է, որ նույն ծրագիրը ժամանակին Լիսաբոնում առաջարկվել էր նաև իրեն, որի վրա, սակայն, ինքը վետո է դրել։

Այնինչ այսօր Տեր-Պետրոսյանի կարծիքը, կարծես, շրջադարձորեն փոխվել է։ Նա հայտարարում է, որ իշխանությունները հետևողականորեն տանում են հենց Մադրիդյան սկզբունքների հիման վրա մշակվող ծրագիրը և իրենք՝ Տեր-Պետրոսյանն ու «Կոնգրես-ՀԺԿ» դաշինքը, դրա հետ համաձայն են։