«Փաստերի ստուգման հարթակի» պատասխանը Արմեն Աշոտյանին

Հանրապետական կուսակցության փոխնախագահ Արմեն Աշոտյանը սեպտեմբերի 12-ին ֆեյսբուքյան գրառում է կատարել՝ անդրադառնալով «Փաստերի ստուգման հարթակի»՝ նույն օրը հրապարակած «Պատգամավորների գործուղումների ծախսերի մասին Արմեն Աշոտյանի հայտարարությունները կեղծ են» խորագրով հոդվածին։ 

Աշոտյանը մեղադրում է Fip.am-ին «հասարակությանը մոլորության մեջ գցելու» մեջ այն դեպքում, երբ ինքը շարունակում է ապատեղեկատվություն տարածել Ազգային ժողովի գործուղումներին հատկացված գումարների վերաբերյալ։ 

Այսպես, Fip.am-ը վերը նշված հոդվածում անդրադարձել էր Աշոտյանի օգոստոսի 29-ի ֆեյսբուքյան գրառմանը, որում ՀՀԿ փոխնախագահը հայտարարում էր, թե խորհրդարանն առաջին կիսամյակում արդեն ծախսել է տարեկան բյուջեով հաստատված գործուղումներին ուղղված ամբողջ գումարը, և կառավարությունը նոր միջոցներ է հատկացրել ԱԺ գործուղումներին։ 

Fip.am-ը դիմել էր Ազգային ժողովի աշխատակազմ՝ խնդրելով հայտնել, թե որքա՞ն գումար է 2019 թ. պետական բյուջեով հատկացվել խորհրդարանի գործուղումներին, առաջին կիսամյակի դրությամբ որքա՞նն է ծախսվել այդ գումարից և արդյո՞ք անհրաժեշտ է նոր գումարների ներգրավում գործուղումների համար։ 

Ազգային ժողովից պատասխանել էին, որ 2019 թ. հաստատված բյուջեով (հաստատվել է 2018 թ նոյեմբերին) գործուղումներին ուղղվել է 460 մլն դրամ և հուլիսի 15-ի դրությամբ՝ այդ գումարից ծախսվել է 258,266,593 դրամ։ Այսինքն՝ առաջին կիսամյակի դրությամբ ծախսվել է տարեկան բյուջեով նախատեսված գումարի 56 տոկոսը և ոչ ամբողջ գումարը, ինչպես գրել է ՀՀԿ փոխնախագահը։ 

2019 թ. պետական բյուջեից հատված

Արմեն Աշոտյանը սեպտեմբերի 12-ի գրառման մեջ, որով ակնկալում էր «հրապարակային ներողության» հայցում ստանալ «Փաստերի ստուգման հարթակից», նշում է ՀՀ կառավարության՝ այս տարվա մայիսի 16-ի նիստին ընդունված որոշման մասին, որով Ազգային ժողովին հատկացվել է լրացուցիչ 892,628,900 դրամ։ Նշենք, որ այդ միջոցներից 301.802.000 դրամը իսկապես հատկացվում է ԱԺ գործուղումներին, սակայն, ինչպես կարդում ենք կառավարության որոշման հիմնավորման մեջ, այդ գումարից մի մասը՝ 183,516,300 դրամ, հատկացվում է ԱԺ նախագահի այցերին (Ռուսաստանի Դաշնություն, Վրաստան, Բելգիա, Նիդերլանդներ, Ֆրանսիա (Ստրասբուրգ), Իտալիա, Մեծ Բրիտանիա, Իրան, Արաբական Միացյալ Էմիրություններ), իսկ մյուս մասի՝ 118,285,700 դրամ, հատկացումը պայմանավորվում է պատգամավորների թվի ավելացմամբ։ 

Ինչպես գիտենք, 2018 թ. դեկտեմբերի 9-ի խորհրդարանական ընտրություններից հետո ԱԺ պատգամավորների թիվը, ի տարբերություն նախորդ գումարման, 105-ից դարձավ 132՝ ավելանալով 27-ով, ինչը ենթադրում է նաև լրացուցիչ միջոցների ներգրավում, իսկ պետական բյուջեն հաստատվել էր դեռևս նոյեմբերին։  

Եվ այս դեպքում արդեն ՀՀԿ փոխնախագահը մանիպուլացնում է՝ կառավարության կողմից լրացուցիչ միջոցների տրամադրումը կապելով պետական բյուջեով գործուղումներին ուղղված գումարի՝ իր խոսքով ամբողջությամբ սպառման հետ այն դեպքում, որ այդ գումարներն առաջին կիսամյակի դրությամբ չէին սպառվել, ինչպես երևում է ԱԺ-ից ստացված պաշտոնական փաստաթղթում (ծախսվել էր, ինչպես նշվեց, այդ գումարի 56 տոկոսը)։

Նշենք նաև, որ Արմեն Աշոտյանն իր գրառման մեջ հայտարարում է, որ Fip.am-ը «մեղադրում է որոշ լրատվականներին» իր պնդումը տարածելու մեջ, ինչը, սակայն, չի համապատասխանում իրականությանը։ Հոդվածում ընդամենը նշվում է, թե որ լրատվականներն են տարածել գրառումը, և որևէ մեղադրանք չկա այդ ԶԼՄ-ների հասցեին։