ՓԱՍՏԱՉԱՓ
Խոշորացույց
Թիվ-թվանք
Ազգային ժողովում սեպտեմբերի 16-ին «Բարգավաճ Հայաստան» խմբակցության պատգամավոր Արման Աբովյանը, անդրադառնալով «Տեսանկարահանող կամ լուսանկարահանող սարքերով հայտնաբերված ճանապարհային երթևեկության կանոնների խախտումների վերաբերյալ գործերով իրականացվող վարչական վարույթի առանձնահատկությունների մասին» օրենքի նախագծին, հայտարարեց, որ դրա ընդունման դեպքում ՀՀ-ում խախտում արձանագրող տեսախցիկների թիվն անհամեմատ կաճի։
«Հարկ եմ համարում ընդգծել շատ կարևոր մի փաստ, որի մասին շատ քիչ խոսվեց։ Այսօր Հայաստանում գործում է մոտավորապես 2,000 ստացիոնար տեսախցիկ՝ կամերաներ, և այս օրենքն ընդունելուց հետո, փաստացի, կամերաների թիվը կարող է դառնալ 502,000, ոչ թե կարող է, այլ էականորեն կաճի»,- ասաց Աբովյանը։
«Իմ քայլը» խմբակցության պատգամավորներ Սիսակ Գաբրիելյանի ու Արմեն Փամբուխչյանի հեղինակած օրինագիծը հնարավորություն է ստեղծելու քաղաքացիների համար տեսանկարահանել երթևեկության խախտումներն ու օնլայն հավելվածի միջոցով ուղարկել ոստիկանություն, որն էլ վարչական վարույթ կհարուցի։
«Փաստերի ստուգման հարթակը» պարզեց, թե իրականում ներկայում որքան տեսախցիկ և արագաչափ է տեղադրված ՀՀ-ում, և արդյո՞ք ԲՀԿ պատգամավորի նշած տվյալը համապատասխանում է իրականությանը։
Ի պատասխան Fip.am-ի հարցմանը, ոստիկանությունից տեղեկացրեցին, որ 2019-ի սեպտեմբերի 16-ի դրությամբ Երևանի խաչմերուկներում և ճանապարհի առանձին հատվածներում երթևեկության նկատմամբ հսկողություն է իրականացվում 676 տեսանկարահանող սարքերի միջոցով։ Երևանից դուրս այս պահի դրությամբ տեսանկարահանող սարքեր տեղադրված չեն։ Այսինքն, իրականում Արման Աբովյանի նշած թվից (2000) երեք անգամ պակաս տեսանկարահանող սարքեր են տեղադրված Հայաստանում։
Ոստիկանությունից նաև հայտնեցին, որ ամբողջ Հայաստանում ավտոճանապարհներին գործում է 164 լուսանկարահանող արագաչափ սարք։
Այսինքն, նույնիսկ եթե Աբովյանը նկատի ունեցած լիներ բոլոր տեսանկարահանող և լուսանկարահանող սարքերը, ապա այդ դեպքում էլ ընդհանուր թիվը 840 է, ինչը ԲՀԿ պատգամավորի նշած թվից 2.4 անգամ քիչ է։ Այսպիսով, Աբովյանի ներկայացրած թիվը սխալ է և իրականից էականորեն տարբերվող։
Հովհաննես Նազարեթյան
