ՓԱՍՏԱՉԱՓ
Խոշորացույց
Թիվ-թվանք
«168 ժամ» թերթը սեպտեմբերի 24-25-ի համարում «Գործարքի «քավորը» պատգամավոր է» վերնագրով հոդված է հրապարակել, որում, հղում անելով իր աղբյուրներին, գրում է Պաշտպանության նախարարությունում դիզվառելիքի ձեռքբերման հետ կապված «հասունացող սկանդալի» մասին։
Թերթը, մասնավորապես, գրում է, որ վարչապետ Նիկոլ Փաշինյանը հակված է, որ ՊՆ ղեկավարությունը գնումների գործընթացի արդյունքում համաձայնի օգտվել իրանական դիզվառելիքից, որի որակը, ըստ կարծիքների, բավական ցածր է, և հատկապես ձմռանն այն կարող է օգտագործման համար պիտանի չլինել։ Այնուհետև, կրկին հղում անելով աղբյուրներին, թերթը նշում է, որ «այս գործի գլխին կանգնած է 2018 թ. դեկտեմբերի 9-ին իշխանական «Իմ քայլը» դաշինքով առաջադրված և պատգամավոր դարձած Ռոման Մուրադյանը»։
Նախ նշենք, որ «Իմ քայլը» դաշինքով ԱԺ արտահերթ ընտրություններին առաջադրված Ռոման Մուրադյանը Ազգային ժողովի պատգամավոր չի դարձել։ Նա զբաղեցնում էր «Իմ քայլը» դաշինքի ցուցակի 162-րդ տեղը և ընտրությունների վերջնարդյունքում չի ընդգրկվել ԱԺ «Իմ քայլը» խմբակցության պատգամավորական կազմի մեջ։ Թերթի հրապարակման վերնագիրը և տեքստը, ըստ որի՝ քննարկվող գործարքի հետևում կանգնած է պատգամավոր, չի համապատասխանում իրականությանը։
«Փաստերի ստուգման հարթակը» կապ հաստատեց Ռոման Մուրադյանի հետ՝ ճշտելու, թե ինչ առնչություն նա ունի քննարկվող գործարքի հետ։ Վերջինս նշեց, որ իր հետ փոխկապակցված «Գազօիլ» ՍՊԸ-ն այս տարվա սեպտեմբերի 18-ին հաղթել է ՊՆ-ի կողմից հայտարարած դիզելային վառելիքի մատակարարման մրցույթում։ Ընկերությունը, ըստ կնքված պայմանագրի, պետք է մատակարարեր 4779 տոննա ամառային դիզվառելիք։ Բացի «Գազօիլ» ՍՊԸ-ից, մրցույթին հայտ էին ներկայացրել նաև «Ֆլեշ» և «ՍիՓիԷս Օիլ» ընկերությունները, սակայն նրանց ներկայացրած գնային առաջարկներն ավելի բարձր էին։ Նույն չափաքանակը «Գազօիլ» ՍՊԸ-ն առաջարկել է մատակարարել 2,389,495,221 դրամով, իսկ «Ֆլեշ» և «ՍիՓիԷս Օիլ» ՍՊԸ-երը, համապատասխանաբար, 2,475,522,000 և 2,465,964,000 դրամով։
Ինչ վերաբերում է դիզվառելիքի որակին և ձմռան ամիսներին դրա պիտանի չլինելուն, ապա ՊՆ-ի հետ կնքված պայմանագրից տեղեկանում ենք, որ ընկերությունը պարտավորվել է մատակարարել ամառային դիզվառելիք, որը պիտանի է հատուկ ջերմաստիճանի ժամանակ օգտագործման համար, իսկ ձմռան համար ձեռք է բերվում ձմեռային դիզվեռալիք։ Այս նրբությունը, սակայն, տեղ չի գտել թերթի հրապարակման մեջ։
Fip.am-ի հետ զրույցում Մուրադյանը, այնուամենայնիվ, հաստատեց, որ այս փուլում խնդիրներ են ծագել ՊՆ-ի հետ։ Չնայած իրենք ներկրել են «Եվրո-5» ստանդարտի դիզվառելիք, որը սահմանին «Ստանդարտների ազգային ինստիտուտ» ՓԲԸ-ի լաբորատորիայում իրականցված փորձաքննության արդյունքում ստացել է համապատասխան սերտիֆիկատ, սակայն ՊՆ մատակարարելուց հետո, հենց նախարարության լաբորատորիայում իրականացված փորձաքննությունը խնդիրներ է արձանագրել։ Մուրադյանը պնդում է, որ ՊՆ-ի լաբորատորիան, ի տարբերություն «Ստանդարտների ազգային ինստիտուտ» ՓԲԸ-ի, հավատարմագրված չէ, իսկ դիզվառելիքը ստուգվել է «յուղի չափիչ սարքով»։
«Սահմանի վրա մեր դիզվառելիքը ստուգվել է, եթե այն չհամապատասխաներ ստանդարտներին, ապա թույլ չէին տա ներկրել, քանի որ լաբորատորիան տալիս է իր եզրակացությունը»,- նշում է Մուրադյանը։
Վերջինս նշեց, որ ՊՆ-ում հանձնաժողով է ստեղծվել, որը կքննի այս գործը, և ինքը «վստահում է հանձնաժողովի պրոֆեսիոնալությանը»։
Fip.am-ը կապ հաստատեց նաև պաշտպանության նախարարի մամուլի խոսնակ Արծրուն Հովհաննիսյանի հետ։ Վերջինս նշեց, որ այս հարցն այժմ ՊՆ նախարար Դավիթ Տոնոյանի ուշադրության տակ է։
«Խոշոր գնումների մրցույթներում մշտապես ռիսկեր են լինում։ Ամեն ինչ արվելու է, որպեսզի խնդիրը լուծվի առողջ մրցակցության և օրենքի սահմաններում»,- ասաց Հովհաննիսյանը։
Թերթը, ըստ այդմ, ստել է՝ Մուրադյանին ներկայացնելով որպես «Իմ քայլը» խմբակցության պատգամավոր։ «168 ժամը» նաև մանիպուլյացիա է արել՝ չնշելով, որ ձեռք է բերվել ամառային դիզվառելիք, և բացի դա, չի փորձել կապ հաստատել շահագրգիռ կողմերի հետ՝ համակողմանի և ճշտված տեղեկատվություն մատուցելու համար։
