Հանրային հեռուստատեսության «աղավաղված թարգմանությունը»

Ապրիլի 3-ին Հայաստանի հանրային հեռուստաալիքը, լուրերի հիմնական Օրակարգի ժամը 21:00-ի թողարկման ընթացքում, լուսաբանելով ԵԱՀԿ ԺՀՄԻԳ Ընտրությունների դիտորդական առաքելության գնահատականը ՀՀ ԱԺ ընտրությունների վերաբերյալ` աղավաղել է առաքելության ղեկավար Յան Պետերսենի գնահատականը:

Հեռուստաալիքն անդրադառնալով ԵԱՀԿ ԺՀՄԻԳ հայտարարության միայն դրական կողմերին և բաց թողնելով քննադատական հատվածները` ուղիղ մեջբերում է կատարել ԵԱՀԿ ԺՀՄԻԳ Ընտրությունների դիտորդական առաքելության ղեկավար Յան Պետերսենից: Մասնավորապես, Հանրային հեռուստատեսության թարգմանության համաձայն՝ Պետերսենը երեկ Արմենիա Մարիոթ հյուրանոցում կայացած մամուլի ասուլիսի ընթացքում նշել է, որ «ԵԱՀԿ ԺՀՄԻԳ բոլոր դիտարկում-նկատառումներն այս անգամ հաշվի էին առել: Այս ընտրություններում իրավիճակը բարելավվել է քվեարկության գաղտնիության առումով: Սա պետք է ընդգծել, քանի որ լուծվել է նախկինում եղած քվեներ գնելու խնդիրը»:

Մինչդեռ, իրականում Յան Պետերսենը նշել է. «Նախնական զեկույցը… պարունակում է դրական և բացասական էլեմենտներ և ես կարծում եմ, որ իմ գործընկերներն արդեն շատ լավ նկարագրեցին մեր մտահոգությունները: Կարիք չկա, որ ես մանրամասն կենտրոնանամ դրանց վրա: Ես պարզապես կցանկանայի շեշտել մի քանի կետ:

Դրանցից մեկը քվեարկության գաղտնիությունն է և ընտրակաշառքի խնդիրը: Մենք տեսնում ենք, որ այս ընտրություններին քվեարկության գաղտնիության հարցում իրավիճակը բարելավվել է և ես շեշտում եմ սա, քանի որ դա առաջին քայլն է ձայներ գնելու վաղեմի փորձը փոխելու ուղղությամբ: Խոսքը վերաբերում է ընտրակաշառքներին, ընտրողների վրա ճնշումներին․ այս հարցերը մեծ կարևորություն ունեն մեր օրակարգում: Եվ դուք կտեսնեք մեր նախնական եզրակացության մեջ «վստահության բացակայություն» արտահայտությունը հանդիպում է բավականին հաճախ, ինչը նշանակում է, որ սա մի բան է, որով պետք է զբաղվել»:

Ընդ որում, Հ1-ի հաղորդման ընթացքում նույնիսկ կարելի է հետևի ֆոնին լսել Պետերսենի հայտարարության անգլերեն տեքստը, որը հստակ չի համապատասխանում Օրակարգի թարգմանությանը: Բնականաբար, սա պատահականություն չէ, այլ մտադրված քարոզչական քայլ է, որը նպատակ է հետապնդում հանրությունից թաքցնել ԵԱՀԿ ԺՀՄԻԳ-ի բացասական գնահատականն ու քննադատական դիտարկումները հանրության լայն շերտերից: Մինչդեռ, հիշեցնենք, որ Հանրային հեռուստատեսությունը պարտավոր է պահպանել չեզոքություն և պարզապես տեղեկատվություն հաղորդել ՀՀ քաղաքացիներին, որոնց գրպանից վճարվող հարկերի շնորհիվ էլ պահպանում է իր գոյությունը: