Հաջողա՞կ, թե՞ սնանկ գործարար․ ով է ՀՖՖ նախագահի թեկնածու Թովմաս Գրիգորյանը

Հայաստանի ֆուտբոլի ֆեդերացիայի հիմնադիր անդամները դեկտեմբերի 23-ին ժողով են գումարելու և ընտրելու ֆեդերացիայի նոր գործադիր կոմիտե և նախագահ։ Ֆեդերացիայի նախագահի թեկնածուներն են հայտնի ֆուտբոլիստ Խորեն Հովհաննիսյանը, ՀՖՖ գլխավոր քարտուղար Արմեն Մելիքբեկյանն ու «Լոռի» ֆուտբոլային ակումբի նախագահ Թովմաս Գրիգորյանը, որը նաև ֆուտբոլի ֆեդերացիայի նախկին նախագահ Արթուր Վանեցյանի խորհրդականն էր։

Որոշ լրատվամիջոցներ արդեն սկսել են որպես ֆեդերացիայի նախագահի հաղթող թեկնածու ներկայացնել Թովմաս Գրիգորյանին։ Նոյեմբերի 29-ին «Ժողովուրդ» օրաթերթը գրել էր, որ «ըստ իր աղբյուրների, ֆուտբոլային և ֆինանսապես կայացած մարդ լինելուց զատ՝ Գրիգորյանը լավ կապեր ունի իշխանության տարբեր թևերի հետ»։ Դեկտեմբերի 7-ին էլ ֆուտբոլային հայտնի մեկնաբան, «Ֆուտբոլ պլյուս» պարբերականի հիմնադիր Սուրեն Բաղդասարյանը 168․am-ի «Ռեվյու» հաղորդման ընթացքում, ներկայացնելով Թովմաս Գրիգորյանին, ասել էր. «Ֆեդերացիան ղեկավարելու համար լավ մենեջեր պետք է լինես, լավ կառավարիչ պետք է լինես, ֆուտբոլային մարդ պետք է լինես, ֆինանսապես կայացած անձնավորություն պետք է լինես։ Թովմաս Գրիգորյանն ինքը գործարար է, ընդ որում՝ ինքն ինչ աշխատանք ձեռնարկել է, հաջողության է հասել»։ Գրիգորյանի՝ հաջողակ բիզնեսմեն լինելու մասին պնդումները, սակայն, հեռու են իրականությունից։ 

Դատական տեղեկատվական համակարգից տեղեկանում ենք, որ 2015-ի մայիսի 19-ին Լոռու մարզի ընդհանուր իրավասության դատարանը բավարարել էր «ՎՏԲ-Հայաստան» բանկի դիմումն ու Թովմաս Գրիգորյանին ճանաչել էր սնանկ։ Գրիգորյանի բանկային չկատարած պարտավորությունները գերազանցել էին 8 միլիոն դոլարը։ Նրան պատկանող գույքի վրա նաև արգելանք էր դրվել։ Գրիգորյանը «Թալգրիգ» ընկերության սեփականատերն է, և վարկերը ձևակերպվել էին «Թալգրիգի» և բանկի միջև։ 

Մեկ այլ դատական ակտով 2012-ին Գեղարքունիքի մարզի առաջին ատյանի ընդհանուր իրավասության դատարանը որոշել էր Թովմաս Գրիգորյանի ազգական Գրիգոր Գրիգորյանից և «Թալգրիգից» հօգուտ «Յունիբանկի» բռնագանձել 4000 դոլար՝ չկատարած վարկային պարտավորությունների համար։ 

Թովմաս Գրիգորյանը երկու այլ ընկերությունների սեփականատեր է՝ «Մանկական զվարճալիքների կենտրոն» և «Լենա Թովմասյան» ընկերությունները։ Այս ընկերությունները 2012-ին Խանջյան 20 հասցեում իրականացրել էին շինարարություն, որի ընթացքում փլուզում էր տեղի ունեցել, ինչի հետևանքով կիսակառույցի փլուզման տակ էր մնացել 11 շինարար։ Հետագայում Երևանի քաղաքապետարանը հաղորդել էր, որ շինարարությունն ապօրինի է եղել։ Շինարարությունն իրականացվում էր Խանջյան փողոցում գտնվող «Ջոս» ժամանցային համալիրի հարևանությամբ, իսկ «Ջոսի» սեփականատերը Թովմաս Գրիգորյանն է (նրան պատկանող «Լոռի» ֆուտբոլային ակումբի մարզաշապիկների վրա գովազդվում է «Ջոսը»)։ Թովմաս Գրիգորյանին է պատկանում նաև Երևանի Աջափնյակ վարչական շրջանում գտնվող «Կալիֆորնիա» հյուրանոցը։ Նա երկար տարիներ աշխատել է նաև ՀՖՖ նախկին նախագահ Ռուբեն Հայրապետյանի հետ՝ գլխավորելով ֆեդերացիայի ֆինանսական կոմիտեն։ Գրիգորյանի ընկերությունները Հայաստանի 1000 ամենախոշոր հարկատուների ցանկից բացակայում են։ 

Մկրտիչ Կարապետյան