«5-րդ ալիքը» թերի է ներկայացնում Նիկոլ Փաշինյանի վերաբերյալ «Գելափի» տվյալները

«5-րդ ալիքը» դեկտեմբերի 20-ին ռեպորտաժ է պատրաստել, որում ներկայացվում են MPG ընկերության հարցմանը արդյունքները։ 

Նիկոլ Փաշինյանի վարկանիշը

«5-րդ ալիքը» «Հիասթափության տարի. «Գելափի» թվերով Փաշինյանի վարկանիշն ընկել է» վերնագրով ռեպորտաժում նշում է. «Պարզվում է՝ կառավարության ղեկավարի վարկանիշը մեկ տարում ընկել է գրեթե երկու անգամ՝ «Գելափի» հարցման տվյալներով»։

MPG-ն հադիսանում է Gallup International Association-ի հայաստանյան ներկայացուցիչը։ Հարցումը իրականացվել է 2019 թ. նոյեմբերի 9-ից դեկտեմբերի 1-ն ընկած ժամանակահատվածում՝ 1,517 քաղաքացու շրջանում։ Հարցման արդյունքները հանրությանը ներկայացվել են դեկտեմբերի 20-ին MPG ընկերության տնօրեն Արամ Նավասարդյանի կողմից։ 

«5-րդ ալիքի» ռեպորտաժում լրագրողը նշում է, որ 2018-ի սեպտեմբերին հարցվածների մոտ 61 տոկոսը լիովին դրական էր գնահատել քաղաքական գործիչ Նիկոլ Փաշինյանին, իսկ 2019-ին վարկանիշը քիչ-քիչ ընկել է՝ արդեն նոյեմբերին հասնելով մոտ 37 տոկոսի։

«Եթե մենք համեմատենք 2018-ի սեպտեմբերի ցուցանիշի հետ, այն ժամանակ մեր մոտ 61.2 տոկոսը լիովին դրական էր պատասխանել և ավելի շուտ դրական՝ 34.2 տոկոսը»,- ռեպորտաժում ներկայացվում է Արամ Նավասարդյանի ասուլիսից մի հատված։ 

Այստեղ, սակայն, կա հստակ մանիպուլյացիա, քանի որ «5-րդ ալիքի» կողմից ներկայացվում են քաղաքական գործիչ Նիկոլ Փաշինյանին միայն «լիովին դրական» գնահատածների տոկոսները՝ պատկեր ստեղծելով, թե Փաշինյանի վարկանիշը կրկնակի իջել է։

Ստորև ներկայացնում ենք MPG-Gallup International ընկերության կողմից իրականացված հարցումներում քաղաքական գործիչ Նիկոլ Փաշինյանին տրված գնահատականները՝ 2018-ի սեպտեմբերին և 2019-ի նոյեմբերին։

Այսինքն՝ 2018-ի սեպտեմբերի համեմատ՝ 2019-ի նոյեմբերին հարցվածների քանակը, որոնք Փաշինյանին «լիովին դրական» են գնահատել, նվազել է՝ 61.2-ից դառնալով 36.8 տոկոս։ Միաժամանակ, Փաշինյանին «ավելի շուտ դրական» գնահատածները ավելացել են՝ 34.2-ից դառնալով 50.4 տոկոս։ Ընդհանուր դրական («լիովին» և «ավելի շուտ») գնահատածների տոկոսն իջել է՝ 95.4-ից դառնալով 87.2 տոկոս։ 

Ընդհանուր պատկերը սա է։ Սակայն ըստ «5-րդ ալիքի»՝ Փաշինյանի «վարկանիշը մեկ տարում ընկել է գրեթե երկու անգամ», որը հստակ մանիպուլյացիա է և չի համապատասխանում իրականությանը։

Ավելին, ըստ նույն հարցման՝ վարչապետի գործունեությանը հավանություն են տվել 83.2 տոկոսը, իսկ հավանություն չի տվել 13.5 տոկոսը։

Ըստ նույն ընկերության կողմից արված հարցումների՝ վարչապետի գործունեությանը անցած տարվա սեպտեմբերին հավանություն է տվել հարցվածների 89 տոկոսը։ 

Այսինքն՝ մեկ տարվա ընթացքում վարչապետի աշխատանքը դրական գնահատողների տոկոսը 89-ից իջել է 83 տոկոս՝ 6 միավորով։ Սա ևս խոսում է այն մասին, որ Փաշինյանի վարկանիշը նվազել է, սակայն ոչ կրկնակի։ 

Հովհաննես Նազարեթյան