Թբիլիսիից Երևան ճանապարհներն այնքան էլ «փայլուն վիճակում» չեն. վարչապետի պնդումների հետքերով

Հունվարի 12-ին Երևանում Հայաստանի և Վրաստանի միջև տնտեսական համագործակցության միջկառավարական հանձնաժողովի 12-րդ նիստում ՀՀ վարչապետ Նիկոլ Փաշինյանն անդրադարձել է երկու երկրները կապող ճանապարհների վիճակին՝ նշելով, որ դրանք գտնվում են «փայլուն վիճակում»։ 

«Վրաստան կատարած իմ առաջին այցի ընթացքում, երբ հանդիպում էինք Վրաստանի բիզնես հանրության ներկայացուցիչների հետ, առաջին հարցը, որ նրանք բարձրացնում էին, ասում էին, որ Թբիլիսիից Երևան եկող ճանապարհները շատ վատ վիճակում են, և ես նրանց խոստացա, որ այդ հարցն անպայման կլուծենք: Հիմա ուրախ եմ արձանագրել, որ Թբիլիսիից Երևան եկող ավտոճանապարհները գտնվում են փայլուն վիճակում»,- ասել է Փաշինյանը։

«Փաստերի ստուգման հարթակի» տրամադրության տակ են հայտնվել հունվարի 17-ին արված լուսանկարներ և տեսանյութեր, որոնցում ակնհայտորեն երևում է՝ Թբիլիսիից Երևան եկող ոչ բոլոր ճանապարհներն են գտնվում «փայլուն վիճակում»։

Օրինակ՝ Մ6 մայրուղու մի հատվածը, որն անցնում է Ալավերդի քաղաքով և կապում է Հայաստանը Վրաստանին, գտնվում է անմխիթար վիճակում։

Տեսանյութում երևացող հատվածը Մ6 մայրուղու՝ Ալավերդի քաղաքին հարակից հատվածն է։ 

Տեսանյութը՝ Գևորգ Քոթանջյանի

Տեսանյութում երևում են մայրուղու որոշ անբարեկարգ հատվածներ․ որոշ հատվածներում հին ասֆալտի մնացորդներ են, իսկ մի հատվածը գրունտային վիճակում է և դժվարանցանելի։

Ի դեպ, ճանապարհը համարվում է ամբողջովին կառուցված, երբ բացի ասֆալտապատումից, կատարվել են նաև գծանշման, ջրահեռացման աշխատանքներ, տեղադրվել են ճանապարհային նշաններ ու ճամփեզրի արգելապատնեշներ և այլն։ Մինչդեռ Մ6 մայրուղու որոշ ասֆալտապատ հատվածներում բացակայում է գծանշումը, չկա ջրահեռացման համակարգ, որոշ տեղերում տեղադրված չեն արգելապատնեշներ և այլն։

Այսպիսով, ի հեճուկս վարչապետի պնդմանը, Թբիլիսիից Երևան եկող ճանապարհներից ոչ բոլորն են գտնվում փայլուն վիճակում։

Սևադա Ղազարյան