Երբ պետք է՝ դրամով, երբ պետք է՝ դոլարով․ Պապոյանը մանիպուլացնում է ՀՆԱ ցուցանիշները՝ նախկինում և հիմա

Ազգային ժողովի «Քաղաքացիական պայմանագիր» խմբակցության պատգամավոր Գևորգ Պապոյանն ապրիլի 18-ին հայտարարել է, թե 2008-17 թվականներին Հայաստանի ՀՆԱ-ն դոլարային արտահայտությամբ չի աճել։ Պատգամավորի պնդմամբ, պատերազմում պարտության պատճառը դա էր։

Մինչդեռ երկու տարի առաջ Պապոյանը, դարձյալ ԱԺ ամբիոնից խոսելով ներկա իշխանության տարիներին ՀՆԱ ցուցանիշի մասին, ներկայացնում էր այն դրամային արտահայտությամբ՝ պնդելով, որ 2007-ի համեմատ 2020-ին երկրի ՀՆԱ-ն կրկնապատկվել է։

Այսինքն, Պապոյանը, իրենց իշխանությանը ձեռքբերում վերագրելու նպատակով, ՀՆԱ աճը ներկայացնում էր դրամային արտահայտությամբ, քանի որ այդպես հնարավոր էր 2007-ի համեմատ կրկնակի աճ ներկայացնել։   

Միևնույն ժամանակ, նախկին իշխանությունների օրոք ՀՆԱ ցուցանիշը պատգամավորը ներկայացնում է դոլարային արտահայտությամբ, քանի որ այդպես ՀՆԱ-ն չի աճել, ինչը, ըստ Պապոյանի, ձախողված տնտեսական քաղաքականության հետևանք էր։

Հատկանշական է նաև այն, որ Պապոյանը շրջանցում է այդ ժամանակահատվածում դոլարի նկատմամբ դրամի արժեզրկման փաստը, ինչը ամենամեծ ազդեցությունն ունի ՀՆԱ-ի դրամային և դոլարային մեծությունների տարբերության վրա։

Այսպես, 2008 թվականին դոլարի միջին տարեկան փոխարժեքը 305 դրամ էր, ինչը նշանակում է, որ եթե նույն փոխարժեքը լիներ նաև 2017 թվականին, ապա ՀՆԱ-ն դոլարային արտահայտությամբ կկազմեր ոչ թե 11․5 մլրդ դոլար, այլ 18․2 մլրդ դոլար։ 

2017 թվականին դոլարի միջին տարեկան փոխարժեքը կազմել էր արդեն 483 դրամ։

Հետևաբար՝ ՀՆԱ-ի մեծությունը դոլարային արտահայտությամբ 2008 թվականի հետ համեմատելն ու փոխարժեքի տարբերությունը չնշելը մանիպուլյատիվ է։ 

Այսպիսով, Պապոյանը քաղաքական նպատակահարմարությամբ պայմանավորված մանիպուլացնում է  գործող ու նախկին իշխանությունների օրոք ՀՆԱ ցուցանիշները։ 

Սևադա Ղազարյան