Արձակուրդում գտնվող վարչապետն իրավունք ունի օգտվել իրեն հատկացված ուղղաթիռից

«Ոչ» քարոզչական կողմի ղեկավար, իրավաբան Ռուբեն Մելիքյանը մարտի 10-ին Ֆեյսբուքի իր էջում գրել է, որ արձակուրդում գտնվող վարչապետ Նիկոլ Փաշինյանն իրավունք չունի օգտվելու պետական ուղղաթիռից՝ քարոզարշավի նպատակով Սյունիք հասնելու համար։

Նշենք, որ մարտի 9-ին վարչապետ Նիկոլ Փաշինյանը հայտարարել էր, որ արձակուրդ է վերցրել ապրիլի 5-ին կայանալիք սահմանադրական հանրաքվեի «Այո»-ի քարոզարշավին ներգրավվելու համար: Մարտի 10-ի առավոտյան նա ուղղաթիռով մեկնել էր Սյունիքի մարզի Ագարակ բնակավայր: 

Այս կապակցությամբ Մելիքյանը, մասնավորապես, գրել է. «Այսօրվանից Նիկոլ Փաշինյանը արձակուրդում է և իր հայտարարության համաձայն՝ զբաղվելու է քարոզչությամբ։ Հարց. ունի՞ ՀՀ քաղաքացի Ն.Փաշինյանն իրավունք օգտվելու պետական ուղղաթիռից՝ քարոզարշավի նպատակով հարավային Սյունիք հասնելու համար։ Ակնհայտ է, որ ՈՉ, քանի որ այդ միջոցից և առհասարակ ներքին ավիացիայից օգտվելու հնարավորություն «ՈՉ»-ը չունի»։

«Փաստերի ստուգման հարթակը» որոշեց պարզել, թե արդյո՞ք արձակուրդում գտնվող վարչապետն իրավունք ունի օգտագործել ի պաշտոնե իր տրամադրության տակ գտնվող ուղղաթիռը:

Հատկանշական է, որ վարչապետը, լինելով հատուկ պետական պաշտպանության ենթակա անձ, կարող է օգտվել իրեն տրամադրված բոլոր միջոցներից՝ անգամ գտնվելով արձակուրդում:  

«Ընտրական օրենսգրքի» 23-րդ հոդվածի առաջին մասի 2-րդ կետում էլ նշվում է, որ արգելվում է նախընտրական քարոզչության նպատակով ծառայողական պարտականությունների իրականացման համար տրամադրված տարածքների, տրանսպորտային և կապի միջոցների, նյութական ու մարդկային ռեսուրսների օգտագործումը, բացառությամբ «Հատուկ պետական պաշտպանության ենթակա անձանց անվտանգության ապահովման մասին» օրենքով պետական պահպանության ենթակա բարձրաստիճան պաշտոնատար անձանց նկատմամբ կիրառվող անվտանգության միջոցառումների։ 

Այդ օրենքի 4-րդ հոդվածը նախատեսում է պետական պահպանության օբյեկտների անհատական պահպանություն, հատուկ կապի և տրանսպորտային սպասարկման իրականացում, ինչպես նաև նրանց անվտանգությանն սպառնացող վտանգի մասին տեղեկատվության տրամադրում: Ըստ 5-րդ հոդվածի՝ նախագահը, վարչապետը և Ազգային ժողովի նախագահը՝ իրենց պաշտոնավարման ժամանակահատվածում, իսկ վարչապետի թեկնածուն` մինչև վարչապետ նշանակելու հարցի լուծումը, իրավասու չեն հրաժարվելու պետական պահպանությունից:

Հոդված 6.1-ով վարչապետին նրա նշանակվելուց հետո տրամադրվում է պետական պահպանություն՝ նրա մշտական և ժամանակավոր գտնվելու վայրերում։

Համաձայն «Պաշտոնատար անձանց գործունեության ապահովման, սպասարկման և սոցիալական երաշխիքների մասին» օրենքի 7.6 հոդվածի՝ վարչապետին սպասարկելու նպատակով տրամադրվում է հատուկ սարքավորված ինքնաթիռ և ուղղաթիռ։

Իսկ ահա «Վարչական իրավախախտումների վերաբերյալ» օրենսգրքի 40.8-րդ հոդվածի 2-րդ մասի համաձայն, նախընտրական կամ հանրաքվեի քարոզչության նպատակով ծառայողական պարտականությունների իրականացման համար տրամադրված ֆինանսական, տեղեկատվական միջոցները, տարածքները, տրանսպորտային և կապի միջոցները, նյութական և մարդկային ռեսուրսները, բացառությամբ «Հատուկ պետական պաշտպանության ենթակա անձանց անվտանգության ապահովման մասին» օրենքով բարձրաստիճան պաշտոնատար անձանց նկատմամբ կիրառվող անվտանգության միջոցառումների, օգտագործելը համարվում է խախտում և  առաջացնում է տուգանքի նշանակում:

Այսինքն, ըստ վերոնշյալ օրենքների, վարչապետը, լինելով հատուկ պետական պաշտպանության ենթակա անձ, կարող է օգտվել իրեն հասանելիք անվտանգության միջոցառումներից թե՛ արձակուրդի ընթացքում, թե՛ քարոզչության ժամանակ։

Լուսինե Ոսկանյան