Խոցված ադրբեջանական ԱԹՍ՝ Վարդենիսի տարածքում․ լուսանկարներ, տեսանյութ

Սեպտեմբերի 27-ի վաղ առավոտյան ադրբեջանական զինված ուժերը, խախտելով հրադադարի ռեժիմը, արցախա-ադրբեջանական շփման գծի ողջ երկայնքով սկսել են լայնածավալ հարձակում դիրքերի ուղղությամբ՝ հրետակոծելով նաև Արցախի խաղաղ բնակավայրերը։

Արցախի տարածքում պատերազմական գործողություններ սկսելուց բացի, ադրբեջանական կողմը հարվածներ է հասցրել նաև Հայաստանի Հանրապետության Վարդենիս քաղաքի և նրա շրջակա գյուղերի ուղղությամբ։ Ադրբեջանական անօդաչու թռչող սարքերը հատել են ՀՀ օդային տարածքը։  

«Փաստերի ստուգման հարթակի» տրամադրության տակ են հայտնվել տեսանյութ և լուսանկարներ, թե ինչպես են Գեղարքունիքի մարզի Լուսակունք գյուղի բնակիչները գյուղի հարակից տարածքից հավաքում խոցված ԱԹՍ-ի կտորները։

Պաշտպանության նախարարության ներկայացուցիչ Արծրուն Հովհաննիսյանը Fip.am-ի հետ զրույցում հաստատեց Լուսակունք գյուղի տարածքում ադրբեջանական ԱԹՍ-ի խոցման մասին տեղեկատվությունը։

ԱԹՍ-ի խոցման մոտավոր տեղադիրքը, ինչպես նաև լուսանկարներն ու տեսանյութը՝ ստորև։