Գագիկ Ծառուկյանի կեղծ պնդումները «Պրեսսինգ» հաղորդման եթերում

«Բարգավաճ Հայաստան» կուսակցության առաջնորդ Գագիկ Ծառուկյանը նոյեմբերի 20-ին 168.am-ի «Պրեսսինգ» հաղորդաշարին տված հարցազրույցում հայտարարել է, որ 2015 թվականին ԲՀԿ-ի և ՀՀԿ-ի միջև տեղի ունեցած առճակատման ժամանակ ոչ մի քաղաքական ուժ իրենց չի աջակցել: 

Մասնավորապես, հարցազրուցավար Սաթիկ Սեյրանյանի դիտարկմանը, որ 2018 թվականին ԲՀԿ ներկայացուցիչները հեղափոխական իշխանությունների հետ միասին հայտարարել են, որ նախկինին վերադարձ չի լինելու, Ծառուկյանը նշել է. «Դու 15 թվականը [2015 թվականը-խմբ․] երևի չես մոռացել, չէ՞: … 15 թվականին ինչո՞ւ Ծառուկյանի հետ այդպես վարվեցին: Հարց եմ տալիս: … Տարաձայնություններից էր։ Ուրեմն ես հնի հետ ի՞նչ կապ ունեմ: Եթե ես իրենց հետ համաձայնվեի, նման բան չէր կարող լինել: … Ես հների դեմ էի, բայց իմ կողքին ոչ մեկ չկանգնեց»: 

Սեյրանյանի մեկ այլ դիտարկմանը, որ, այնուամենայնիվ, ՀՀԿ կառավարման տարիներին ԲՀԿ-ականները զբաղեցրել են բարձրաստիճան պաշտոններ, Ծառուկյանը նշել է, որ իրենք ունեցել են մեկ՝ սպորտի նախարարի պորտֆելը, բայց խիստ սահմանափակումներ են եղել ՀՀԿ-ի կողմից, ինչի արդյունքում դրանից հետո ոչ մի պաշտոն իրենք չեն զբաղեցրել:

«Փաստերի ստուգման հարթակը» ստուգել է, թե արդյո՞ք Գագիկ Ծառուկյանի այս և հնչեցրած այլ պնդումները համապատասխանում են իրականությանը։

ԲՀԿ-ՀՀԿ առճակատումը 2015 թվականին

Fip.am-ը մի քանի անգամ անդրադարձել է 2015 թվականին ՀՀԿ-ի և ԲՀԿ-ի առճակատման վերաբերյալ մանիպուլյացիաներին։

2014 թվականին ԲՀԿ-ն դաշինք էր կազմել ոչ իշխանական ուժերի՝ «Ժառանգության» և Հայ ազգային կոնգրեսի հետ: Նրանք դեմ էին արտահայտվում սահմանադրական փոփոխություններին՝ այդ գործընթացը որակելով որպես ՀՀԿ-ի կողմից «իշխանության վերարտադրման փորձ»:

Դաշինքը պարբերաբար անց էր կացնում ցույցեր և բողոքի ակցիաներ: Հանրապետական կուսակցության արձագանքը չուշացավ: Փետրվարի 12-ին ՀՀԿ գործադիր մարմնի նիստում գործող նախագահ, ՀՀԿ առաջնորդ Սերժ Սարգսյանը հանդես եկավ հայտնի ելույթով՝ հայտարարելով, որ «Գագիկ Ծառուկյան քաղաքական դերակատարը մեր երկրի համար դարձել է չարիք»:

Ի պատասխան՝ փետրվարի 13-ին Ծառուկյանը կուսակցության քաղաքական խորհրդի նիստի ժամանակ կոչ արեց անդադար բողոքի ակցիաներ անցկացնել՝ արտահերթ ընտրությունների հասնելու նպատակով: ԲՀԿ քաղաքական խորհրդի նիստին հաջորդեց Ծառուկյանի հանդիպումը ՀԱԿ առաջնորդ Լևոն Տեր-Պետրոսյանի և «Ժառանգություն» կուսակցության առաջնորդ Րաֆֆի Հովհաննիսյանի հետ, որից հետո հայտարարվեց, որ ոչ իշխանական ուժերի հերթական հանրահավաքը տեղի կունենա փետրվարի 20-ին: 

Պաշտոնական հաղորդագրությունների միջոցով թե՛ ՀԱԿ-ը, թե՛ «Ժառանգությունը» դատապարտեցին Սերժ Սարգսյանի ելույթը: 

Փետրվարի 18-ին, սակայն, ԲՀԿ-ն հայտարարություն տարածեց փետրվարի 20-ի հանրահավաքը չեղյալ հայտարարելու մասին: 

Հաջորդող օրերին նույնպես ՀԱԿ-ն աջակցեց Ծառուկյանին: Այսպես, ՀԱԿ խմբակցության ղեկավար Լևոն Զուրաբյանը հայտարարեց, որ ԲՀԿ-ի դեմ արշավը քաղաքական տեռոր է․ «Մարդիկ ելել են պայքարի և հարվածներ են ստացել, ցավոտ հարվածներ, ծանր հարվածներ, միգուցե հարվածներ, որոնց անգամ պատրաստ չեն եղել»:

2015-ի մարտի 5-ին Գագիկ Ծառուկյանը հայտարարեց, որ հեռանում է ակտիվ քաղաքականությունից: Ի վերջո, ԲՀԿ-ն հայտարարեց, որ խմբակցությունը կողմ է քվեարկելու սահմանադրական բարեփոխումների նախագծին: Մյուս ուժերը շարունակեցին բողոքի ակցիաներն ընդդեմ փոփոխությունների։ 

Այսպիսով, կարելի է արձանագրել, որ հենց ԲՀԿ-ն՝ Գագիկ Ծառուկյանի ղեկավարմամբ, լքեց քաղաքական պայքարն ընդդեմ սահմանադրական բարեփոխումերի: Ավելին, ԲՀԿ-ն դեմ գնաց սահմանադրական փոփոխությունների դեմ գործընթացին, որի համար պայքարում էին իր դաշնակից քաղաքական ուժերը: 

ԲՀԿ-ական նախարարները Սերժ Սարգսյանի նախագահության տարիներին

Ինչ վերաբերում է Ծառուկյանի այն պնդմանը, որ նախորդ իշխանությունների օրոք իրենք նախարարի մեկ պորտֆել են ունեցել, ապա այն ևս սխալ է։ Այսպես, 2009 թվականին ԲՀԿ-ական Գևորգ Պետրոսյանը նշանակվել էր  աշխատանքի և սոցիալական հարցերի նախարար: Բացի այդ, ԲՀԿ-ից Հարություն Քուշկյանը եղել է առողջապահության նախարար (2007-2012), Արթուր Գրիգորյանը՝ աշխատանքի և սոցիալական հարցերի նախարար (2010-2012), Հրաչյա Ռոստոմյանը՝ սպորտի և երիտասարդության հարցերի նախարար (2012-2013, 2016-2018), Վարդան Վարդանյանը՝ քաղաքաշինության նախարար (2008- 2012)։ 

Հետևաբար, Ծառուկյանի պնդումը, թե ԲՀԿ-ն հանրապետականների իշխանության օրոք ընդամենը մեկ պորտֆել է ունեցել, չի համապատասխանում իրականությանը:

Չգործող գործարանների մասին

Հարցազրույցի ժամանակ Ծառուկյանն անդրադարձել է նաև 2018 թվականից հետո Հայաստանի տնտեսական իրավիճակին և պնդել, որ կառավարությունը ներդրումները խրախուսելու համար պայմաններ չի ստեղծել: Այնուհետև նա նշել է, որ ինքը Հայաստանում բամբակի արտադրությունը զարգացնելու համար հրավիրել էր գործարարների, որոնք, սակայն, չհաջողեցին։ «…Բայց ինչո՞ւ փակվեց: Ոչ մի պայմանագիր չկապեցին, ոչ մի ուշադրություն չդարձրին…։ Մեկ տարի ոչ մի պայմանագիր չկապեցին, ոչ մի արտոնություն չտվեցին, ոչ մի հնարավորություն չտվեցին, և մարդիկ էլ թողեցին գնացին»,- ասել է Ծառուկյանը։

Գագիկ Ծառուկյանը բերել է նաև Եղվարդի գործարանի օրինակը, որը, ըստ նրա, բաց է 4 տարի, բայց թույլ չեն տալիս աշխատել՝ պատճառաբանելով ՇՄԱԳ-ի անցկացումը։ Բացի այդ, հարևանությամբ գտնվող արտադրամասի սեփականատերն է բողոքարկում, թեև, ըստ ԲՀԿ-ի առաջնորդի, նա նախնական համաձայնություն տվել էր գործարանի կառուցման համար: 

Իրականում 2 գործարաններն էլ այլ պատճառներով չեն գործում։

Այսպես, Ծառուկյանի նշած բամբակի գործարանին՝ Ծովազարդի տեքստիլ ֆաբրիկային, Fip.am-ն անդրադարձել էր նախորդ հրապարակումներից մեկում: «Ծովազարդի տեքստիլ ֆաբրիկա» ՓԲԸ-ի սեփականատերը Գագիկ Խաչիկյանն է, որը 2018 թ. ապրիլին «Բարգավաճ Հայաստան» կուսակցության առաջնորդ Գագիկ Ծառուկյանի հետ հիմնել էր «Ծառուկյան Քոթթոն Ռոդ» ՍՊԸ-ն, որտեղ Ծառուկյանը 20 տոկոս բաժնեմաս ուներ։

Ընկերությունից Fip.am-ին հայտնել էին, որ բամբակի դաշտերի բերքը չի բավականացրել արտադրությունը սկսելու համար, այսինքն՝ գործարանը չի բացվել հումքի սակավության պատճառով։

Ինչ վերաբերում է Եղվարդում նախատեսված նավթավերամշակման գործարանին, ապա այն ունի շատ ավելի բարդ պատմություն: Այսպես, 2018 թվականի հունիսին Քննչական կոմիտեն պարզել էր, որ «Արմօյլ» ՓԲ ընկերությանը նավթավերամշակման գործարանի կառուցման համար թույլտվություն տրամադրելու գործընթացում չարաշահումներ են հայտնաբերվել, մասնավորապես՝ կեղծվել էին փաստաթղթեր: Ավելին՝ գործարանի կառուցմանը դեմ էին նաև Եղվարդի բնակիչները, որոնք պարբերաբար ցույցեր էին կազմակերպում՝ պահանջելով կասեցնել գործարանի կառուցումը, քանի որ այն կարող է վնաս հասցնել շրջակա միջավայրին, մասնավորապես` հարակից բնակելի տներում ապրող քաղաքացիներին։ Բնապահպանության և ընդերքի տեսչական մարմինը 2018 թ. հուլիսին նավթավերամշակման գործարանի շինարարությունը կասեցնելու մասին որոշում էր կայացրել մինչև ըստ «Շրջակա միջավայրի վրա ազդեցության գնահատման և փորձաքննության մասին» օրենքով նախատեսված փաստաթղթերի՝ շրջակա միջավայրի վրա ազդեցության գնահատումը և փորձաքննության դրական որոշման ստացումը։ Բացի այդ, գործարանի հարևանությամբ գտնվող գործարարները նույնպես դեմ էին արտահայտվել դրա կառուցմանը, այդ թվում՝ «Ռիվալ» ՍՊԸ-ն: Infocom.am-ի հետաքննությունը պարզել էր, որ տեղի գործարարները գործարանի կառուցմանը նախնական թույլտվություն տվել էին «ԱրմՕյլ» ՓԲԸ–ի բացատրության հիման վրա, ըստ որի՝  շրջակա միջավայրին վնաս չէր հասցվելու: 

Այսպիսով, Գագիկ Ծառուկյանի պնդումը, թե Հայաստանում միանգամից 2 գործարան չեն աշխատել կառավարության ստեղծած խոչընդոտների պատճառով, չի համապատասխանում իրականությանը:

Լուսինե Ոսկանյան