Կապանում երեխայի և ընտանիքի աջակցության կենտրոնը վաղուց է գործում. նախարարությունը ապակողմնորոշում է

Աշխատանքի և սոցիալական հարցերի նախարարությունը հունվարի 14-ին հայտնել էր, որ Սյունիքի մարզում երեխայի և ընտանիքի աջակցության կենտրոն է ստեղծվելու: 

«Սյունիքի մարզի Կապան քաղաքում կստեղծվի երեխայի և ընտանիքի աջակցության կենտրոն, որտեղ կարճաժամկետ շուրջօրյա խնամք կստանան Սյունիքի և հարակից մարզերի՝ կյանքի դժվարին իրավիճակում հայտնված 0-ից մինչև 18 տարեկան երեխաները, իսկ 2-ից մինչև 18 տարեկան երեխաներին կտրամադրվի ցերեկային աջակցության ծառայություն»,- հաղորդել էր նախարարության պաշտոնական կայքը:

«Փաստերի ստուգման հարթակ» է դիմել ընթերցողներից մեկը՝ հայտնելով, որ կենտրոնն արդեն տարիներ շարունակ գործում է, և խնդրել էր անդրադառնալ թեմային: 

Երեխայի և ընտանիքի աջակցության կենտրոնի ստեղծումը

2017 թվականին Կարեն Կարապետյանի ղեկավարած կառավարությունը որոշում էր կայացրել «Կապանի երեխաների խնամքի և պաշտպանության գիշերօթիկ հաստատություն» պետական ոչ առևտրային կազմակերպությունը (ՊՈԱԿ) վերակազմակերպել «Սյունիքի մարզի երեխայի և ընտանիքի աջակցության կենտրոն» հիմնադրամի: 

Այսինքն, ըստ որոշման՝ գիշերօթիկ հաստատության իրավաբանական կարգավիճակը փոփոխվել էր:

Հաստատության նպատակն է կանխել երեխաներ ունեցող ընտանիքների՝ կյանքի դժվարին իրավիճակում հայտնվելը և օգնել դուրս այդ իրավիճակից, այդ թվում՝ թե՛ կազմակերպությունում ցերեկային ժամերին` կազմակերպության ներքին իրավական ակտերով սահմանված ժամանակահատվածում, և թե՛ կազմակերպությունից դուրս՝ արտակենտրոն ծառայությունների միջոցով։ Հաստատությունը նաև խնամք է տրամադրում հաշմանդամություն ունեցող 3-18 տարեկան երեխաներին, ինչպես նաև աջակցում ընտանեկան բռնության ենթարկված անձանց և նրանց ընտանիքի անդամներին:

Կառավարության նոր որոշումը

Կառավարության այս տարվա հունվարի 14-ին նիստի չզեկուցվող հարցերի շարքում էր «Սյունիքի մարզի երեխայի և ընտանիքի աջակցության կենտրոն» ՊՈԱԿ ստեղծելու, գույք հետ վերցնելու և գույք ամրացնելու և 2017-ի որոշումն ուժը կորցրած ճանաչելու մասին որոշումը:

Ըստ որոշման՝ հիմնադրամին վերադարձվել է նախկին կարգավիճակը․ այն դարձել է ՊՈԱԿ: 

Fip.am-ը կապ հաստատեց Աշխատանքի և սոցիալական հարցերի նախարարության հետ՝ պարզելու, թե ինչ փոփոխություններ է ենթադրում նոր որոշումը: Նախարարության մամուլի խոսնակ Զառա Մանուչարյանը նշեց, որ Կապանի կենտրոնն իսկապես գործում է 2018 թվականից, իսկ նոր որոշմամբ ավելացել է ճգնաժամային բաղադրիչը. «Եթե նախկինում 100 երեխա ստանում էին ցերեկային աջակցություն, հիմա ճգնաժամային բաղադրիչով ևս 50-ը ստանալու են արդեն շուրջօրյա խնամք»: 

Այսպիսով, Աշխատանքի և սոցիալական հարցերի նախարարության հաղորդագրությունը, ըստ որի՝ Սյունիքում երեխայի և ընտանիքի աջակցության կենտրոն կստեղծվի, ապակողմնորոշող է, քանի որ կենտրոնը գործում է արդեն տարիներ շարունակ: Կառավարության որոշմամբ ընդամենը փոխվել է կենտրոնի կազմակերպաիրավական ձևը և ավելացել է ճգնաժամային բաղադրիչը:

Լուսինե Ոսկանյան