Հայ և ադրբեջանցի զինվորների բախումը տեղի է ունեցել ոչ թե սահմանին, այլ սահմանից 2.4 կմ խորությամբ

Մայիսի 25-ին համացանցում տեղեկություն տարածվեց, որ Սյունիքում՝ Սիսիանի հատվածում, կրակոցներ են եղել, և հայկական կողմից վիրավորներ կան։ Ժամեր անց Պաշտպանության նախարարությունը հերքեց այդ տեղեկությունը։

Նույն օրը լրատվականներում և տելեգրամյան ալիքներում տեսանյութ տարածվեց, որում  հայ և ադրբեջանցի զինվորների միջև բախում էր։ Լրատվականներից որոշները նշել էին, որ միջադեպը տեղի է ունեցել Սյունիքում։

«Փաստերի ստուգման հարթակը» որոշեց պարզել, թե որտեղ է իրականում տեղի ունեցել միջադեպը՝ տեսանյութի տեղորոշման միջոցով։

Նախորդող դեպքերը

Ավելի վաղ նույն օրը՝ մայիսի 25-ին, «Ժողովուրդ» օրաթերթը հայտնել էր, որ Գեղարքունիքի մարզի Վերին Շորժա բնակավայրում վիճաբանություն է տեղի ունեցել հայ և ադրբեջանցի զինվորականների միջև, ինչի հետևանքով հակառակորդի արձակած կրակոցից հայ զինծառայողը մահացու վիրավորում է ստացել։ Շատ չանցած Պաշտպանության նախարարությունը հաստատեց տեղեկությունը և նշեց, որ դեպքը տեղի է ունեցել Վերին Շորժայի սահմանային հատվածում։

Սակայն 168.am-ը կապ էր հաստատել Վերին Շորժա վարչական շրջանի ղեկավար Արտյոմ Երանոսյանի հետ, որը վստահեցրել էր, որ համայնքի տարածքում նմանատիպ դեպք տեղի չի ունեցել։ «․․․Այլ տարածքում է թշնամին կրակել, ոչ թե մեր տարածքում։ Եթե Պաշտպանության նախարարությունը նման բան է գրել, ուրեմն՝ չի հասկանում։ Վերին Շորժայում հիմա ես նստած եմ, նման դեպք չկա, այստեղ տարբեր համայնքներ կան։ Ես պաշտոնապես սա ձեզ ասեմ՝ չկա նման բան, հիմա փորձում եմ հասկանալ՝ որտեղ է»,- հայտնել էր Երանոսյանը։

Տեղորոշում

Կողմնորոշվելով տեղի ունեցած միջադեպի տեսանյութում երևացող ռելիեֆով՝ գտնում ենք տեղանքը Google Earth ծրագրում։

Համընկնում են նաև հետևում գտնվող լեռները։

Կոորդինատները`  40° 2’10.84″N,  45°48’57.20″E:

Փաստացի, դեպքը տեղի է ունեցել ոչ թե Սյունիքի, այլ Գեղարքունիքի մարզում՝ Վերին Շորժա գյուղից ուղիղ գծով 6 կմ դեպի հարավ, և ոչ թե սահմանային հատվածում, ինչպես հայտնել է նախարարությունը, այլ Հայաստանի Հանրապետության տարածքում՝ սահմանից 2․4 կմ խորության վրա։

Հավելենք, որ «Փաստերի ստուգման հարթակի» լրագրողներն օրեր առաջ այցելել էին Վերին շորժա գյուղ, ինչպես նաև ադրբեջանցի զինվորների ներխուժած հատվածներ, որտեղ և ֆիքսել էին տեսանյութում երևացող ադրբեջանցի զինծառայողների վրանը։ 

Հայկ Հովհաննիսյան