Հայկական մեդիան բավականաչափ օպերատիվ կերպով արձագանքում է արևմտյան երկրների առաջնորդների հանդեպ սեփական երկրների բնակիչների ունեցած վստահության վարկանիշերի փոփոխությանը, սակայն Սերժ Սարգսյանի՝ Հայաստանում ունեցած վստահության վարկանիշի մասին տեղական լրատվամիջոցների մեծամասնությունը երբևէ հրապարակումներ չի անում:
10 տարի, 10 տոկոս
Օգոստոսի 23-ին «Փաստարկ» մամուլի ակումբում տեղի ունեցած ասուլիսի ընթացքում սոցիոլոգ Ահարոն Ադիբեկյանը, ներկայացնելով հերթական հետազոտության արդյունքները, հայտարարել է, որ Սերժ Սարգսյանի ժողովրդականության վարկանիշը կազմում է 10 տոկոս: Կարեն Կարապետյանի և Գագիկ Ծառուկյանի վարկանիշերը, ըստ սոցիոլոգի, համապատասխանաբար կազմել են 60 և 20 տոկոս: Սակայն, Ադիբեկյանի ասուլիսը լուսաբանած բոլոր լրատվամիջոցները, բացի rusarminfo.ru-ից, ներկայացրել են սոցիոլոգի հայտարարության միայն այն մասը, որը վերաբերում է գործող վարչապետին և Գագիկ Ծառուկյանին՝ լռելով Սերժ Սարգսյանի ցածր վարկանիշի մասին: Ուշագրավ է, որ ռուսալեզու այս լրատվականը, որից հաճախ հրապարակումներ կարելի է տեսնել ՀՀ-ում ՌԴ դեսպանատան սոցիալական հարթակներում, առաջիկա վարչապետի ընտրությունից առաջ անկաշկանդ կերպով հրապարակում է այս տեղեկատվությունը՝ փորձելով այդ ֆոնին ընդգծել Կարեն Կարապետյանի ունեցած վարկանիշի անհամեմատ բարձրությունը:
Ադիբեկյանի ասուլիսը լուսաբանած միակ հեռուստաընկերությունը՝ «Կենտրոնը», օգոստոսի 23-ի «Էպիկենտրոն»-ի հիմնական թողարկման ընթացքում օգտագործել է նրա հայտարարության միայն այն հատվածը, որտեղ սոցիոլոգը պատմում է, որ երկրում «ստեղծված վիճակը հնարավոր է սոցիալական դժգոհության պատճառ դառնա, բայց մարդկանց փողոց դուրս գալու և երկարատև պայաքարի հիմք չի լինի»: Ասուլիսից տեսագրություն հրապարակել է նաև globnews.am-ը, որում տեղ է գտել ասուլիսի կրկին նույնաբովանդակ մեկ այլ հատված: Սերժ Սարգսյանի 10 տոկոսանոց վարկանիշի մասին բոլորը նախընտրել են լռել:
Հանրային հեռուստաընկերության «Օրակարգ» հաղորդումը ևս այս ասուլիսը չլուսաբանեց, սակայն «Օրակարգ»-ում հաճախ կարելի է լսել, օրինակ, Մակրոնի կամ Թրամփի հանդեպ նրանց ղեկավարած երկրներում բնակչության բացասական վերաբերմունքի մասին, տեսնել «Նա [Թրամփը] մեր նախագահը չէ» գրություններով պաստառների լուսանկարներ՝ զուգորդված ԱՄՆ-ում տեղի ունեցող իրադարձությունների մեկնաբանությամբ:
«Մեր դարդին»
«Արմենպրես» պետական լրատվական գործակալությունը, լուսաբանելով Ադիբեկյանի ասուլիսը, գրում է, որ հայ հասարակությունն «ամենաարդար որոշումներն ակնկալում է Կարեն Կարապետյանից»՝ կրկին չանդրադառնալով Սերժ Սարգսյանի մասին հրապարակմանը: Փոխարենն «Արմենպրեսը» նախընտրում է պատմել ԱՄՆ նախագահ Թրամփի վարկանիշի նոր «հակառեկորդի» մասին: Նույն «հակառեկորդի» մասին կպատմեր նաև tert.am-ը, սակայն Սարգսյանի վարկանիշի վերաբերյալ ասուլիսը լուսաբանելիս՝ կրկին նախընտրել է սահմանափակվել գործող վարչապետի «ամենաարդար որոշումների» մասին հատվածով:
Սեփական երկրի նախագահի վստահության վարկանշն իմանալու հնարավորություն տալու փոխարեն հայ ընթերցողին պարբերաբար պատմում են, թե ինչպես է օրինակ, Գերմանիայի կանցլեր Անգելա Մերկելի ժողովրդականության վարկանիշը նվազում 10 կետով՝ հասնում մինչև 59 տոկոսի կամ թե ֆրանսիացիների քանի տոկոսն է գոհ Մակրոնի աշխատանքից, և ինչպես է նրա վարկանիշը անկում ապրել 10 տոկոսով ու լռում են, այն մասին, որ Սերժ Սարգսյանի վարկանիշը կազմում է ընդամենը 10 տոկոս:
