«Քաղաքացիական պայմանագրի» լոգոն ավելի հին է, քան թուրքականը․ տարածվող տեղեկությունը կեղծ է

Համացանցում և մամուլում ակտիվորեն տարածվում է տեղեկություն, թե «Քաղաքացիական պայմանագիր» կուսակցության պատկերանիշը (լոգոն) կրկնօրինակված է թուրքական նմանատիպ լոգոյից։ Տեղեկության սկզբնաղբյուրը վարչապետի աշխատակազմին կից «Տեղեկատվության և հանրային կապերի» ՊՈԱԿ-ի նախկին աշխատակից Անդրանիկ Հովհանիսյանն է, որի մուտքն արգելված է Հայաստան։ 

Հաշվի առնելով այն փաստը, որ ձեռքսեղմում պատկերող այս նշանները շատ տարածված են համացանցում և օգտագործվում են տարբեր կազմակերպությունների կողմից, «Փաստերի ստուգման» հարթակը որոշել է ուսումնասիրել հայաստանյան մամուլում տարածվող տեղեկատվության ճշմարտացիությունը։

Տեղեկությունը ստուգելու համար որոնողական համակարգերով անհրաժեշտ է իրականացնել երկու պարզ որոնում։

Նախքան դա, սակայն, նշենք, որ շրջանառվող թուրքական լոգոն, որի վրա գրված է «հայրենական արտադրություն», փակցվում է Թուրքիայում արտադրվող ապրանքների մեծամասնության վրա։  

Պարզելու համար, թե երբ է թուրքական այս լոգոն կիրառության մեջ դրվել, անհրաժեշտ է որոնել այն ցանկացած որոնողական համակարգով։ Լուսանկարների որոնման հարթակ Tineye.com կայքում փնտրելու արդյունքում պարզ  է դառնում, որ թուրքական այս լոգոն առաջին անգամ համացանցում հայտնվել է 2018 թվականին։

Տարբերանշանի հեղինակը Վանի առևտրի պալատն է։ Պալատի կայքում կա նաև նոր լոգոյի մասին հայտարարությունը՝ հրապարակված 2018 թվականի հոկտեմբերի 3-ին։ Լոգոն հաստատվել է նաև երկրի Ֆինանսների նախարարության կողմից։ 

Ինչ վերաբերում է «Քաղաքացիական պայմանագիր» կուսակցության տարբերանշանին, ապա հայտնի է, որ կուսակցությունը հիմնադրվել է ավելի վաղ՝ 2015-ին, իսկ որպես նախաձեռնություն այն նույն տարբերանշանով գործում էր դեռ 2013-ից։ 

 

Պարզ է, որ ՔՊ-ն չէր կարող գողանալ ավելի ուշ ստեղծված տարբերանշանի գաղափարը։ Սակայն սա չի նշանակում, թե Վանի առևտրի պալատն է «գողացել» կուսակցության տարբերանշանը։ Իրականում ձեռքսեղմում պատկերող նույնանման վեկտորային պատկերները շատ տարածված են և օգտագործվում են տարատեսակ նպատակներով և ձևերով։ Իսկ համացանցում դրանք հայտնվել են ավելի վաղ, քան «Քաղաքացիական պայմանագիր» կուսակցության լոգոն։ 

Անի Ավետիսյան