Ոչ թե Կիևի «Դինամոն» է, այլ ազգայնական խմբավորում․ ֆուտբոլային ակումբը կապ չունի լուսանկարի հետ

Փետրվարի 24-ին Ուկրաինայի տարածքում Ռուսաստանի նախաձեռնած ռազմական գործողությունների մեկնարկից ի վեր՝ համացանցում ակտիվորեն շրջանառվում են լուսանկարներ, որոնք կամ հին են և կապ չունեն այս պատերազմի հետ, կամ աղավաղվում են դրանց հանգամանքները։

Այդպիսի լուսանկարներից է իբրև թե Կիևի «Դինամոյի» ֆուտբոլիստների խմբակային լուսանկարը։

Համացանցի օգտատերերն այն տարածում են՝ լուսանկարում պատկերված զինված համազգեստավոր անձանց ներկայացնելով իբրև Կիևի Դինամոյի ֆուտբոլիստներ։

Լուսանկարը լայնորեն տարածվել է համացանցում, այդ թվում՝ հայալեզու հատվածում։  Նույնիսկ «Գուգլ» (Google) որոնման համակարգն է այն ասոցացնում Ուկրաինայի մայրաքաղաքը ներկայացնող ֆուտբոլային թիմի հետ։

Իրականում լուսանկարը որևէ կապ չունի հայտնի ֆուտբոլային ակումբի հետ։ Իսկ դրանում պատկերված անձինք ուկրաինական ծայրահեղ ազգայնական «Гонор» խմբավորման անդամներն են։

Լուսանկարը տեղադրվել է հենց խմբավորման ինստագրամյան էջում և խմբի ղեկավար Սերգեյ Ֆիլիմոնովի ֆեյսբուքյան էջում փետրվարի 25-ին։

Այսպիսով փաստենք, որ զինվորական համազգեստներով անձանց լուսանկարը, որը համացանցում տարածվել է իբրև Կիևի «Դինամոյի» ֆուտբոլիստների՝ պատերազմի մասնակցության ապացույց, որևէ կապ չունի ֆուտբոլային ակումբի հետ, և դրանում պատկերված անձինք ուկրաինական ծայրահեղ ազգայնական «Гонор» խմբավորման անդամներն են։

Սևադա Ղազարյան

Մհեր Թարոյան