Ոստիկանությունը հրաժարվում է տրամադրել տեղեկությունը, որն ինքը հրապարակել էր 2 օր առաջ

Օրեր առաջ Ֆրանսիայի հրապարակում տեղադրված վրաններից մեկում մահացավ ընդդիմադիր «Դիմադրություն» շարժման մասնակիցներից մեկը։ Այս դեպքից անմիջապես հետո քաղաքացու մահվան պատճառների շուրջ երկկողմանի շահարկումներ սկսվեցին։ 

Իշխանամետ մամուլը, հղում անելով անանուն աղբյուրներին, հայտնում էր, որ քաղաքացին մահացել է թմրանյութերի գերդոզավորումից։ Նույնիսկ  ՔՊ խմբակցության պատգամավոր Վահագն Ալեքսանյանը ակնարկեց դրա մասին՝ դեպքի հաջորդ օրը ԱԺ ամբիոնից կոչ անելով ոստիկաններին «․․․հնարավորինս շուտ մտնել ու ստուգել էդ մարդկանց, նման նյութեր երկնած մարդկանց ապաստարանները որպես էդպիսին, որպեսզի հնարավորինս շուտ կանխվի թմրամիջոցներից հերթական գերդոզավորման դեպքերը, որոնք գուցե ունենան մահվան ելքեր»։  

*Նյութի հրապարակումից հետո Վահագն Ալեքսանյանը կապվեց Fip.am-ի խմբագրության հետ և հայտնեց, որ իր՝ մեջբերվող հայտարարության մեջ Ֆրանսիայի հրապարակում տեղադրված վրանում քաղաքացու մահվանը վերաբերող ակնարկ չկա։ 

 Մյուս կողմից, ընդդիմադիր «Դիմադրություն» շարժման առաջնորդներից Իշխան Սաղաթելյանը և Արմեն Աշոտյանը քաղաքացու մահը կապեցին շտապօգնության մեքենայի բացակայության և ուշ օգնություն ցուցաբերելու հետ, իսկ Էդուարդ Շարմազանովը վախճանվածին համարեց նահատակ։ 

«Փաստերի ստուգման հարթակը», մահվան իրական պատճառը պարզելու ակնկալիքով, հենց նույն օրը՝ մայիսի 5-ին, պաշտոնական հարցմամբ դիմեց ՀՀ ոստիկանություն։ Հարցմամբ խնդրել էինք մեզ տրամադրել տեղեկություն քաղաքացու մահվան պատճառի մասին, ինչպես նաև հարցրել էինք, թե արդյո՞ք անձը մահացել է թմրանյութի գերդոզավորումից և արդյո՞ք քաղաքացու մարմնի վրա եղել են թմրանյութի օգտագործման արտաքին նշաններ։ Հաշվի առնելով այն հանգամանքը, որ հայցած տեղեկությունը կարող էր պարունակել նախաքննական կամ բժշկական գաղտնիք՝ խնդրել էինք տեղեկությունը տրամադրել առանց անձի ինքնությունը բացահայտելու։

Մահվան հաջորդ օրը Armlur.am-ը փաստաթուղթ հրապարակեց և գրեց, որ այն ապացուցում է, որ քաղաքացին մահացել է ոչ թե գերդոզավորումից, այլ սուր սրտային անբավարարությունից: Իրականում սակայն, մահվան հանգամանքները պարզելու համար պետք է իրականացվեր դատաբժշկական փորձաքննություն, հետևաբար մահվան ճշգրիտ պատճառը կպարզվեր միայն այդ փորձաքննությունից հետո։

Հրապարակված փաստաթղթից ակնհայտ էր, որ այն դատաբժշկական փորձաքննության պատասխանը չէր։ 

Armlur.am-ի մանիպուլյացիաների և թեմայի վերաբերյալ FIP.am-ի անդրադարձը կարդացեք այստեղ։

Թեմայի շուրջ պարզաբանում ստանալու համար մայիսի 10-ին հեռախոսով կապ հաստատեցինք ոստիկանության հետ։ Մեզ ասացին, որ դատաբժշկական փորձաքննության արդյունքները չկան, սակայն դրանից մոտ երկու ժամ անց ոստիկանությունը հաղորդագրություն տարածեց՝ ըստ էության հաստատելով, որ քաղաքացու մահվան պատճառը թմրանյութերի գերդոզավորումն է։ 

Հաջորդ օրը՝ մայիսի 11-ին, ոստիկանությունը, մեր մայիսի 5-ի գրավոր հարցմանն ի պատասխան, մերժեց տրամադրել մեր հայցած տեղեկությունը՝ պատճառաբանելով, որ այն խախտում է անձի անձնական և ընտանեկան կյանքի գաղտնիությունը։

Փաստացի, ոստիկանությունն անձնական տվյալների պաշտպանության պատճառաբանությամբ հրաժարվում է մեզ տրամադրել նույն տեղեկությունը, որը երկու օր առաջ արդեն իսկ հրապարակել էր։

Ստացվում է, որ կա՛մ ոստիկանությունը մահացած քաղաքացու վերաբերյալ հայտարարություն անելիս խախտել է քաղաքացու անձնական տվյալների պաշտպանության մասին օրենքը, կա՛մ մեր հարցմանը մերժելով խախտում է տեղեկատվության ազատության մասին օրենքը։

Նարեկ Մարտիրոսյան