Վարկի մարում, նվիրատվություն, արտագնա հանգիստ․ ինչի վրա և ինչքան են ծախսում պատգամավորները

2022-ի հունվարի 1-ից հայտարարատու պաշտոնատար անձանց համար պարտադիր է դարձել ծախսերի մասին տվյալների հայտարարագրումը, եթե դրանց միանվագ արժեքը գերազանցում է 2 միլիոն դրամը կամ դրան համարժեք արտարժույթը, կամ նույն տեսակի ծախսերի հանրագումարը գերազանցում է 3 միլիոն դրամը։ Կան պատգամավորներ, որոնք հայտարարագրել են նաև վերը նշված գումարը չգերազանցող որոշ ծախսեր։

FIP.am-ն ուսումնասիրել է Ազգային ժողովի պատգամավորների 2021-ի տարեկան հայտարարագրերը՝ հասկանալու, թե ինչ ծախսեր են արել պատգամավորները։

ԱԺ մի շարք պատգամավորներ 2021-ի տարեկան հայտարարագիր դեռևս չեն ներկայացրել, ուստի նրանց ծախսերը հնարավոր չի եղել ուսումնասիրել։ 2021-ի տարեկան հայտարարագիր չներկայացրած պատգամավորներն են Արամ Վարդևանյանը, Արթուր Ղազինյանը, Գեղամ Մանուկյանը և Ասպրամ Կրպեյանը։ 

2021-ի տարեկան հայտարարագիր է ներկայացրել ԱԺ 103 պատգամավոր, որոնցից 22-ը 2 միլիոնը գերազանցող ծախսեր են հայտարարագրել։

Ամենաշատ ծախսերն ունեցել են «Քաղաքացիական պայմանագրից» պատգամավորներ Խաչատուր Սուքիասյանը և Գուրգեն Արսենյանը և «Հայաստան» խմբակցությունից Վահե Հակոբյանը և Հռիփսիմե Ստամբուլյանը։ 

Խաչատուր Սուքիասյանը ծախսել է ընդհանուր 142 միլիոն 600 հազար դրամ և 20 հազար դոլար, Գուրգեն Արսենյանը՝ ֏25 միլիոն և $73 հազար, իսկ Վահե Հակոբյանը` ֏37․6 միլիոն և €11,38 հազար, Հռիփսիմե Ստամբուլյանը՝ ֏77․4 միլիոն։

«Քաղաքացիական պայմանագիր» խմբակցությունից 2 միլիոն դրամը գերազանցող ծախսերի հայտարարագիր է ներկայացրել 13 պատգամավոր, «Հայաստան» դաշինքից՝ 7, իսկ «Պատիվ ունեմ» դաշինքից՝ 2։ Ըստ այդմ, ներկայացված են հիմնականում հանգստի, վարկի մարման, անշարժ գույքի վարձակալության, նվիրատվության համար արված ծախսերը։ 

Հանգստի համար ամենամեծ գումարը ծախսել են «Հայաստան» դաշինքից Վահե Հակոբյանը (֏32․5 միլիոն), «Քաղաքացիական պայմանագիր» խմբակցությունից Խաչատուր Սուքիասյանը (֏10 մլն  և $20 հազար) և Գուրգեն Արսենյանը ($25 հազար)։ 

«Քաղաքացիական պայմանագիր» խմբակցության՝ ֏2 միլիոնը գերազանցող ծախս ներկայացրած պատգամավորներից 8-ը որպես ծախսի նպատակ նշել են վարկի մարումը։ «Հայաստան» դաշինքից 3-ն են որպես ծախս նշել վարկի մարումը, իսկ «Պատիվ ունեմ» դաշինքից՝ 1-ը։

Պատգամավորները գումար են ծախսել նաև անշարժ գույքի վերանորոգման համար։ Այսպես, «Քաղաքացիական պայմանագիր» խմբակցության պատգամավոր Գուրգեն Արսենյանը ծախսել է 25 միլիոն դրամ՝ անշարժ գույքի վերանորոգման համար, իսկ պատգամավոր Խաչատուր Սուքիասյանը նույն նպատակով ծախսել է 40 միլիոն դրամ։

«Քաղաքացիական պայմանագիր» խմբակցությունից պատգամավորներ Զարուհի Բաթոյանը շարժական կամ անշարժ գույքի վարձակալության համար ծախսել է ֏965 հազար, իսկ Արթուր Հովհաննիսյանը՝ ֏1․2 միլիոն։ «Հայաստան» դաշինքից Անդրանիկ Թևանյանը անշարժ կամ շարժական գույքի վարձակալության համար ծախսել է ֏5․88 միլիոն։ 8-րդ գումարման ԱԺ պատգամավորներից չորսն իրենց հայտարարագրերում նշել են, որ նվիրատվություն են արել։

Պատգամավորները հայտարարագրել են նաև այլ ծախսեր։ ՔՊ-ական պատգամավոր Խաչատուր Սուքիասյանը հայտարարագրել է ֏47․6 միլիոն՝ ծախսի նպատակը նշելով՝ այլ ծախսեր։ ՔՊ-ական մեկ ուրիշ պատգամավոր՝ Արմեն Խաչատրյանը, հայտարարագրել է 50 հազար դոլար այլ ծախսեր։ «Քաղաքացիական պայմանագիր» խմբակցությունից Վահագն Հովակիմյանը որպես այլ ծախս է հայտարարագրել ֏5 միլիոն։ «Հայաստան» դաշինքի պատգամավոր Էլինար Վարդանյանը որպես «այլ ծախս» նույնպես ֏5 միլիոն է հայտարարագրել, նույն դաշինքից մեկ այլ պատգամավոր՝ Վահե Հակոբյանը, նույն տողի տակ՝ ֏2․565 միլիոն դրամ։ Այլ ծախսեր է ունեցել նաև «Հայաստան» դաշինքի պատգամավոր Անդրանիկ Թևանյանը, դրանք կազմել են  9․84 միլիոն դրամ։

«Քաղաքացիական պայմանագիր» խմբակցության անդամ Գևորգ Պապոյանը միակ պատգամավորն է, որը որպես ծախս է նշել նաև ուսման կամ դասընթացների համար ծախսված 165 հազար դրամ գումարը։

Շուշան Ստեփանյան