Արտերկրի մեդիան շփոթում է հայ-ադրբեջանական բախումների վայրը

Սեպտեմբերի 12-ի լույս 13-ի գիշերը Ադրբեջանի՝ Հայաստանի սահմանների վրա սկսած հարձակումից հետո միջազգային մի շարք հեղինակավոր լրատվականներ սկսեցին լուսաբանել բախումները, սակայն` ներկայացնելով դա որպես բախում «Լեռնային Ղարաբաղում» կամ «Լեռնային Ղարաբաղի սահմանին»։

Այսպես, The New York Times-ը բախումների մասին իր նյութի վերնագրում գրել էր՝ «Բախումներ են սկսվել Լեռնային Ղարաբաղում՝ հերթական պատերազմի մտավախություն առաջացնելով»։ Չնայած կայքը որոշ ժամանակ անց խմբագրեց նյութը՝ սոցիալական ցանցերում այն դեռ շարունակում է մնալ նույն վերնագրով։ Սխալ վերնագրով նյութը շարունակում է արտատպված մնալ նաև մի շարք անգլիալեզու լրատվականներում։

Նույն սխալը կրկնել են նաև գերմանական Deutsche Welle-ն և ամերիկյան Washington Post-ը։ Այս լրատվականները գրել են, թե բախումները տեղի են ունեցել «Լեռնային Ղարաբաղի սահմանի մոտ»։ Չնայած այս դեպքում լրատվականները նկատի չեն ունեցել անմիջական Լեռնային Ղարաբաղի տարածքը՝ որպես բախումների վայր, ընտրված նկարագրությունը տպավորություն է ստեղծում, թե բախումների և ադրբեջանական հարձակման թիրախում Լեռնային Ղարաբաղն է եղել։

Լեռնային Ղարաբաղը հայ-ադրբեջանական վերջին բախումների հետ «խառնել են» նաև սոցիալական ցանցերի շատ օգտատերեր և, անգամ, պաշտոնյաներ։

Կալիֆոռնիացի կոնգրեսական Ջուդի Չուն իր թվիթերյան միկրոբլոգում դատապարտել է Ադրբեջանին՝ «Հայաստանի հարավում և Լեռնային Ղարաբաղում» հասցված հրետանային հարվածների համար։

The recent Azerbaijani artillery strikes in southern Armenia and Nagorno Karabakh are unconscionable. Azerbaijan must respect the ceasefire and end this violence now.

I’m calling for an immediate end to *all* military aid to Azerbaijan.

— Judy Chu (@RepJudyChu) September 13, 2022

Բախումները հայ-ադրբեջանական սահմանին են և Հայաստանի տարածքում

Ըստ սեպտեմբերի 12-ի կեսգիշերից ստացվող պաշտոնական լուրերի և անկախ լրատվամիջոցների կողմից հրապարակվող վիզուալ ապացույցների՝ բախումները տեղի են ունենում հայ-ադրբեջանական պետական սահմանին, իսկ Ադրբեջանը թիրախավորում է սահմանին մոտ գտնվող հայկական բնակավայրերը։ 

Բախումների աշխարհագրությունն ընդգրկում է Գեղարքունիքի մարզի Սոթք բնակավայրից (սահմանակից է Քարվաճառի (Քելբաջարի) շրջանին) մինչև Քաշաթաղի (Լաչին) շրջանին հարակից բնակավայրերը, ինչպես նաև վայոց ձորի մարզը՝ Ջերմուկ քաղաքով։ 

Ադրբեջանը հայկական դիրքերը թիրախավորել է նաև Գեղարքունիքի Արտանիշի ուղղությամբ, որը սահմանակից է Ադրբեջանի Գեդեբեյի շրջանին և որևէ կապ չունի Լեռնային Ղարաբաղի կամ դրա շրջակա տարածքների հետ։ 

Անի Ավետիսյան

Մհեր Թարոյան