«Արմենիկումի» մասին ստի 18-ամյակը կամ ՁԻԱՀ-ի դեմ պայքարի օր

Դեկտեմբերի 1-ն ամբողջ աշխարհում նշվում է որպես ՁԻԱՀ-ի դեմ պայքարի միջազգային օր։

Այս թեման, թերևս, յուրահատուկ երանգներ ունի Հայաստանում, եւ դա կապված է, առաջին հերթին, «Արմենիկում» կոչվող դեղամիջոցի հետ, որը, ինչպես սպասվում էր ժամանակին, պետք է հաղթահարեր այդ հիվանդությունը եւ փրկեր աշխարհը։

1998 թվականի դեկտեմբերին, իրոք, Հայաստանում քննարկվող թիվ մեկ թեմաներից մեկը հենց «Արմենիկումն» էր։ Եւ դա՝ շնորհիվ այն ժամանակ ներքին գործերի եւ ազգային անվտանգության նախարարի պաշտոնը զբաղեցնող Սերժ Սարգսյանի հայտարարության։ Հենց վերջինս էր այդ ժամանակ ազդարարել, որ Հայաստանում հայտնաբերվել է «Արմենիկում» անունը կրող դեղամիջոցը, որը լիովին բուժում է դարի ժանտախտը` ՁԻԱՀ հիվանդությունը:

Նման բարձրաստիճան պաշտոնյայի այսօրինակ աղմկոտ հայտարարությունը, իրոք, բուռն ռեզոնանս էր առաջացրել հայ հանրության շրջանում, որը սույն տեղեկատվությունն ընդունել էր որպես բացահայտված ազգային-պետական գաղտնիք, ինչի շնորհիվ մեր երկիրը միլիարդավոր դոլարների եկամուտներ է ունենալու։

Այդ օրերից անցել է արդեն 18 տարի։

Ինչպես տեսնում ենք՝ «Արմենիկումը» Հայաստանին որևէ եկամուտ չի բերել, աշխարհում այդ մասին կարծես թե մոռացել են, իսկ դեղամիջոցի արդյունավետությունը միայն սփոփվելու հնարավորություն է տալիս։ Իսկ իրականում՝ գործ ենք ունեցել ամենաիսկական կեղծ տեղեկատվության հետ, որը ժամանակին տարածվել է՝ հանրության ուշադրությունը շեղելու, մոլորության մեջ գցելու եւ այլ նպատակներով։